［愛情純愛］既然忘記唔到佢，不如試下中意我⋯？: 155. 沒法收回

「蔣倩盈，你唔可以再咁大方⋯你諗得好清楚㗎啦⋯！」我喺心裏對自己講道，「一個人難受，總好過兩個人難受⋯」

我抬頭望向岑諾新，佢比我行得前一啲，我心裏唔捨得到佢，但我唔想同一個心入面有其他女仔嘅人一齊⋯

「岑諾新，對唔住⋯」我喺心裏講道同時，停咗落嚟企喺原地，先一步鬆開岑諾新嘅手，「我都唔想分開⋯但睇嚟，我地都係要分開⋯你要幸福⋯」

岑諾新回頭望向我，佢定睛地望住我，好似已經預料到我有嘢想同佢講一樣

「我地⋯分手啦⋯」我鼓起勇氣對岑諾新講道





既然你中意嘅人係孫慧伶，我成全你⋯我可以放你番去佢嘅身邊，嗰日嘅事，我都親眼睇到啦⋯

「蔣倩盈，你講咩⋯？」岑諾新頓了一頓，輕皺一下眉頭，然後又有啲愕然咁望住我，「你話分手⋯你咩意思⋯？」

「就係字面嘅意思⋯」我微微耷低頭，唔敢同佢對上視線，「我地分手⋯唔再一齊⋯我地結束啦⋯」

「你認真⋯？」岑諾新一臉嚴肅咁望住我問道

嗯⋯我認真㗎⋯我唔想成為任何人嘅代替品⋯更加冇辦法接受，再一次成為孫慧伶嘅代替品⋯！





所以，岑諾新，我要同你分手⋯

我⋯真係中意你，真係中意咗你，但既然喺你心入面嘅人係孫慧伶，忘記唔到佢嘅話，你番去搵佢啦⋯難受我可以忍耐

「嗯，我認真㗎⋯」我握緊拳頭，咬緊牙關講道，「我⋯諗清楚㗎啦，我唔想要你難做⋯而且，我地一開始，都係話試咋嘛⋯」

「你唔理我幾日，然後就同我分手？」岑諾新輕皺起眉頭問我

「嗯，我就係喺呢幾日諗清楚⋯」我講道，「一開始我地都係話試下一齊，咁就算分手，都冇問題呀⋯」





X⋯X⋯X

蔣倩盈嘅呢一句，猶如一把利刀一樣，直刺向我嘅心臟

佢唔想我難做，係唔想我因為佢同張景彥嘅事而為難，怕我會為難佢定怕我會難受？

「嗯⋯係呀，我地都係試咋嘛⋯我地當初都係咁講。」我輕輕一笑，忍着心痛講道，「你冷淡對我，就係要同我講分手？」

「我，考慮得好清楚⋯！」蔣倩盈點點頭，「我地分開啦⋯」

你因為呢一個原因，所以最後決定要番去張景彥嘅身邊⋯哈⋯做得好⋯

原來孫慧伶冇講大話，你真係中意張景彥⋯

嗰日你講咗個大話，你明明就去過海傍，但你就話自己因為頭痛而瞓著咗⋯嗰日你明明就係同張景彥一齊⋯恐怕你由嗰日開始就考慮緊要同我分手嘅事





既然你心意已決，我⋯都冇必要再講啲咩⋯

「好。」我回答道，我嘅心瞬間用力地揪咗一下，好痛⋯

你係中意張景彥嘛，番去囉！番去佢身邊囉！

「我對你嚟講，到底算啲咩⋯」

呢句說話，我好想問佢⋯我對你嘅好，係唔係就比唔上張景彥⋯？

張景彥將你嘅心傷得透徹，我嘅陪伴雖然都係為咗自己，但我地嘅難受都係喺互相陪伴嘅情況下走過⋯

佢將你傷得徹底，但你卻因為佢回頭而選擇放棄我同你之間嘅一切⋯你係唔係將我地之間嘅快樂都唔記得晒？





你對佢，係真心真意嘅中意，對我⋯哈⋯我都只係出現得合時⋯

「好，既然你要分手，就分手啦。」我忍住心臟撕裂般嘅痛對佢講道

我下意識就撇開臉，我怕望到佢臉上堅定嘅表情⋯我怕聽到佢親口講出佢仲中意張景彥⋯

蔣倩盈企喺原地，我眼睛嘅餘光見到佢嘅右手稍微抬起，但過咗半秒，佢嘅手再次垂下

「對唔住⋯」蔣倩盈耷低頭對我講道，然後轉身離開

對唔住⋯唔需要吧⋯對唔住⋯

你中意佢，你冇錯⋯

⋯





我番到屋企，心情完全歸零

我唔知道我同蔣倩盈之間點解會變成咁，我同佢明明一直都好好⋯我有邊度做得唔好⋯？

嗰日我已經打算同佢講清楚我嘅想法，但佢冇出現，仲講咗個大話

我本來仲以為，孫慧伶講嘅嘢只係大話，佢比我睇snapchat嘅location嘅時候，我仲唔敢相信

「呯！」

我一下子將房門閂上，心很累⋯我連提手去開燈嘅力都冇，我行到書枱前拉開電腦椅坐低，啱啱發生嘅一切，就好似發夢一樣








IG Link: https://www.instagram.com/nd_cotttoncandy/?hl=zh-t