［愛情純愛］既然忘記唔到佢，不如試下中意我⋯？: 133. 普通朋友

佢冇幾絕情，佢對我嘅冷淡態度只係源於佢中意第二個，呢啲事，我都知道

「明白嘅！」張景彥點點頭，我感覺佢呢三個字當中包含咗好多嘢

「到站啦，我落車啦。」我伸手去㩒鐘，孭起書包

張景彥等巴士喺紅綠燈前低咗落嚟先起身讓位比我行出去

「拜拜。」張景彥喺我行到出走廊嘅時候對我講咗一聲





捉住扶手嘅我回頭望向張景彥，我對佢微微點一下頭，講道：「拜⋯」

巴士駛到站停低，我落車後回也不回地踏上番屋企嘅路

啱啱張景彥喺車上對我講嘅嘢，的確令我感到震驚，都係我冇諗過佢會做嘅事

我行咗兩步，手機嘅螢幕就亮起嚟，我瞄一眼手機螢幕，見到係張景彥send嘅message

「send相⋯？」我有啲疑惑，然後將相㩒開





佢將我落車一刻影咗落嚟，然後寫多句拜拜比我

「無聊⋯」我無奈一笑，回頭望一眼遠去嘅巴士

我覺得我將佢放低咗，佢對我嚟講就只係過去，以前覺得冇辦法同佢做番朋友，係因為我未放得低掛⋯

「拜」我回覆佢一個單字

⋯





「琴日去咗邊度玩？」岑諾新問我

「琴日？同詠妍佢地去咗銅鑼灣行下囉～」我笑笑講道，我忽然間靈機一動，「你問起我就記得啦！」

「嗯？」岑諾新有啲疑惑

我喺裙袋中拎咗條手繩出嚟，拉起佢隻手，將條手繩套到佢嘅手腕上

「我琴日買㗎～感覺上你會戴得好睇～」我抬眼望向佢微笑道，「你中唔中意？」

「中意，一定要中意。」岑諾新提手，望一眼手繩後伸手摸摸我頭

「係唔係真係中意㗎？」我微微鼓起兩泡腮，雙手捉住佢嘅手腕

「真係中意。」岑諾新淡淡一笑，我喺佢嘅雙眸中見到佢嘅答案，「多謝。」





「嗯！唔洗多謝！」我悄悄地伸手攬住佢

琴日同佢地一齊行緊時候，咁啱經過一間鋪頭見到呢條手繩，覺得好啱佢，岑諾新戴嘅話一定好好睇

「不過番學著夏季校服，戴住嘅話會比人睇到。」我鬆開攬住佢嘅雙手，然後拉一拉佢隻手

「陣間落車先除。」岑諾新垂眼望我，捉住我隻手，將我成個人朝佢嗰邊拉

我朝佢行近一步，剛好巴士一下剎車，我跌喺佢嘅懷中

「落車啦⋯」我企番好，然後向後行咗一步，對佢笑一笑講道

岑諾新落咗車之後，將手繩除咗落嚟，將手繩放到書包入面





我同佢行到番學校，我朝小食部行去，先行咗一步，岑諾新一下就拉住我嘅書包將我拉番後

「嗯？」我回頭望佢，「我去小食部買嘢食。」

「我仲有份功課未做完，我想番上去做埋先。」岑諾新對我講道

「嗯，好呀～」我點點頭，望住佢轉身朝前梯行去

我行到去小食部，見到啱啱買完嘢食嘅張景彥企喺一旁等緊

「早晨。」張景彥先開口朝我打聲招呼

「早晨。」我禮貌地微微一笑講道

「買早餐？」張景彥問我道





「嗯。」我點點頭，然後同小食部嘅阿姨講我要咩嘢食

阿姨先將張景彥啱啱叫嘅嘢食比佢，然後再轉身拎比我

「岑諾新呢？你唔同佢一齊嘅？」張景彥同我同時離開小食部，我同佢一齊行後梯上番課室

「佢番咗課室趕功課。」我無奈一笑

我同張景彥之間仍然保持住一段距離，雖然可以好似普通人一樣講嘢

「你終於可以好普通咁同我講嘢⋯」張景彥望咗我一眼，笑咗一笑，「可唔可以做番朋友？普通朋友。」

我聽到仍嘅提問，我先猶疑咗一下，我心裏本來覺得冇咩所謂，但宜家聽到佢問我，我卻步了⋯





「唔⋯」我猶疑地望一望佢，「最普通嘅普通朋友，都唔係唔可以⋯」

我自問我放低咗佢，打從心底咁放低咗張景彥，我見到佢嘅時候，心裏都唔會掀起浪花，就係一個普通人一樣

所以我敢肯定，我對張景彥，已經冇愛情嗰種感覺

因為經後梯，所以我先一步番到課室，喺經過窗外嘅時候，我見到岑諾新耷低頭做緊功課

我推開課室門行入課室，番到自己嘅位放低書包坐低

我先啱啱坐低，就感覺到嚟自旁邊嘅銳利目光，而且有股低氣壓直湧向我⋯




IG Link: https://www.instagram.com/nd_cotttoncandy/?hl=zh-t