［愛情純愛］既然忘記唔到佢，不如試下中意我⋯？: 132. 沒有絕情

「我有諗過如果張景彥佢番轉頭搵我，我會點樣⋯」我嘅手放喺窗邊托住下巴，「之前嘅我大概會即刻回頭，但宜家，我大概會同佢講我地真係冇可能。」

「如果佢話仲想同你做朋友呢？」詠妍問道

「朋友呀⋯都唔係唔可以，但一齊番就唔會啦⋯」我微微低頭，苦笑道，「太攰啦，同佢一齊，為佢付出嘅真心已經夠多啦⋯」

巴士駛到埋站，樓下傳嚟八達通拍卡嘅「嘟嘟」聲，我耷低頭睇手機，都冇留意車停咗幾耐

「喂⋯」詠妍忽然間撞咗我隻手一下，搞到我都鬆咗手，手機跌喺我嘅書包上





「咩呀⋯」我輕皺一下眉頭，然後抬頭望

一抬頭就見到啱啱行到上嚟上層嘅張景彥，張景彥好似察覺到有人望住佢一樣，朝我地嘅方向望

我緩緩地移開視線，就好似見到一個普通人一樣不在乎

「你個friend。」詠妍低聲對我講道

「係喎⋯」我皮笑肉不笑地對詠妍微笑道





巴士再行駛咗一段路程後，到咗詠妍要落車嘅巴士站，詠妍同我揮揮手，然後就落咗下層等巴士埋站落車

聽到巴士車門打開嘅提示聲，我朝下面望去，望到詠妍落車，佢行咗上行人路之後仲不忘抬頭望一眼，再同我講一次拜拜

我仍然坐喺窗邊嘅位置，耷低頭睇手機，忽然感覺再有一個黑影喺我旁邊一閃而過，身旁有一個人坐低

呢個人唔係張景彥，又會係邊個呀⋯

「嗨！」我抬頭望向佢時，佢對我淺淺一笑





「嗨⋯」我對佢露出一個禮貌嘅微笑

做咩要特登起身行嚟我隔離坐，嫌大家唔夠尷尬？嫌⋯我唔夠尷尬？

「你呢個鐘數仲喺呢邊嘅？」張景彥先開口問我

「今日同詠妍佢地一齊出嚟行下。」我講道，然後又禮貌地問佢：「你宜家先番去嘅？」

其實我唔係真係好討厭張景彥，就好似我啱啱同詠妍講嘅一樣，做最普通嘅普通朋友嘅話，我係可以接受嘅⋯

「嗯，啱啱去完補習。」張景彥將書包平放喺大腿上

「補習？你補習？」我對於張景彥話佢補習呢件事有啲訝異

「嗯！」張景彥見到我嘅訝異，噗一聲就笑咗出嚟，「當然係我去補習啦！我去補習好震驚咩？」





「少少啦⋯」我有啲唔好意思咁笑咗一笑，「成績好都要補習呀⋯」

「一般啦⋯」張景彥聽到我咁講，有啲唔好意思咁伸手摸摸後頸，「又唔係真係好好嘅，至少未可以拎到星。」

記得以前聽張景彥講過，佢父母希望佢將來想做律師

無可否認一點，係張景彥佢對學習真係幾認真幾努力，佢對自己嘅成績要求高，佢嘅成績亦係有眼見嘅好，呢一點係事實

「你仲係一如既往咁對成績要求高⋯」我微微耷低頭，稍微挺直腰桿坐好起嚟

「Okay啦，有目標就要朝住目標行。」張景彥笑一笑講道，「你打算大學讀咩科？」

「未諗呀⋯」我尷尬一笑，「都未諗好可以讀咩。」





「你份人咁細心，又中意小朋友，幼教幾啱你。」張景彥講道

「你又知？」我不禁一笑，手放喺窗邊托住腮，側着頭望住張景彥

「上年學校個義工活動唔係去咗幼稚園同小朋友玩咩？」張景彥嘴角微微揚起，開始講上年嘅事，「有個小朋友同其他小朋友一齊玩唔開心嘛，你好快就察覺到，然後陪佢一齊玩遊戲嘛～」

上年嘅義工活動，的確係發生咗件咁嘅事，我見個小妹妹自己企喺一邊，上前問佢做咩唔同大家一齊玩，個妹妹話大家唔同佢玩，我先一直陪住佢同佢一齊，幫佢融入其他小朋友圈子

我對於張景彥講出嘅一番描述有啲訝異，我以為佢真係咩都冇留意到，只係因為我叫佢一齊做呢個義工活動、因為佢嘅朋友都一齊喺度佢先揀呢個

「你唔好當我真係對你一無所知啦～」張景彥下一秒笑笑口講道

聽到佢咁樣講，我只係一笑置之，如果佢早啲咁樣同我講，或者我嘅心入面會好開心好開心

我的確以為，同我拍咗拖大半年嘅佢，真係對我一無所知，以為佢真係從未留意我





但令我意想不到嘅係佢竟然會留意到一個咁細微又唔起眼嘅舉動

「我冇咁講⋯」我耷低頭，皮笑肉不笑地講道

「我未至於同一個人一齊咗大半年，都對佢咩都唔清唔楚。」張景彥望住我講道，「你將我諗得太絕情⋯」

我抬頭望向張景彥，同佢嘅視線對上，佢知道我諗咩一樣，先我一步講出答案

「冇覺得你絕唔絕情⋯」我先一步將視線移開，「只係⋯真係有啲意外⋯」




IG Link: https://www.instagram.com/nd_cotttoncandy/?hl=zh-t