［愛情純愛］既然忘記唔到佢，不如試下中意我⋯？: 134. 不用亂想

「咁啱撞到⋯」我對岑諾新解釋道，「就係咁簡單⋯」

「嗯，信你。」岑諾新淡然地講道，然後又耷低頭做功課

望住岑諾新擺出醋王嘅姿態，我忍唔住偷偷一笑，我望一望課室裏嘅其他人，很好，大家都專心做自己嘢冇留意我地呢邊

我連人帶櫈坐到走廊，坐喺岑諾新旁邊，微微側着頭直盯着佢

「點呀？」岑諾新望我一眼，緩緩地開口問道





「冇點呀～」我抿一抿唇，然後細細聲地講道：「醋王。」

「我問題啦係？」岑諾新嘅眉頭輕輕一皺

「唔係。」我嘅笑意都藏唔住，直接放到臉上，「冇話係你問題呀～」

岑諾新咩都冇講，只係輕輕地搣咗我嘅手一下

「呀嘶⋯」我頓時縮起手，一臉無辜地望住岑諾新，「做咩搣我⋯痛呀！」





岑諾新望一望我之後咩都冇講，默默地耷低頭繼續做功課

「你真係要繼續嬲我呀⋯」我小心翼翼地開口問道，伸手不輕不重地拉一下佢嘅衫袖

「我冇咁小氣⋯」岑諾新一邊耷低頭做功課一邊回答我講道

聽到佢嘅回答，我對佢嘻嘻笑起嚟，佢只係沒好氣咁望我一眼，又繼續趕佢嘅功課

我稍微側着身安靜地坐喺佢嘅身旁，安靜地望住佢做功課





岑諾新偶然抬頭望咗我一眼，我諗都冇諗，拎起放喺我枱上嘅schedule book，擋住我嘅側臉，湊近佢喺佢嘅臉頰上偷偷地錫咗一啖

「嘻⋯」我將schedule book擋住正面，擋到鼻前，只露出一雙眼望住佢

岑諾新嘅嘴角不禁上揚，一聲不吭，再次坐番好做功課

「耳仔紅啦⋯」我望到佢變紅嘅耳仔，心裏覺得佢真係好可愛，有着同高冷外表唔一樣嘅反差萌

我中意佢嘅高冷，亦中意佢嘅可愛

我雙手放喺膝上，雙眼總係會不自覺地望向佢，每次望向佢，心跳都會漏一拍

「一直咁樣落去就好⋯」我喺心裏默默地許願道

我偷偷盯着岑諾新，將佢嘅反應都盡收眼底，啱啱同張景彥一齊上嚟，我發誓我對張景彥絕無半點同愛情有關嘅想法





「你咁樣望住我，好大壓力⋯」岑諾新放低筆將功課簿合上同時望向我講道

「嗯？我冇望你呀～」我笑笑口地講道，假裝自己冇望過佢，「你有幻覺啦？」

「你肯定係我幻覺？」岑諾新將功課簿收到櫃桶中，挑起眉望住我

「嗯嗯！我冇望你呀～啱啱先望你～」我輕輕抿唇，微微一笑，「係唔係你太想我望你啦？」

「叩叩。」

課室門口忽然傳嚟兩聲敲門聲，我朝門口望去同時，眼見一個女仔拎住一疊file行入嚟

佢諗都冇諗就朝我地呢邊行過嚟，呀，更正一下，係朝岑諾新行過嚟





「呢度係Physics 嘅project file。」孫慧伶將手上拎住嘅五、六個file都交到岑諾新嘅手中

順便一提，岑諾新同孫慧伶仲有張景彥都係讀物理，只係岑諾新同孫慧伶讀嘅係英文，張景彥讀中文

「差啲就唔記得咗佢兩個同科⋯」我喺心裏道，有啲唔自在地微微移開視線

「唔該。」岑諾新淡然地回答道，佢呢個反應大概之前從來都唔會對孫慧伶用

「我地班嘅齊㗎啦。」孫慧伶微笑道

孫慧伶嘅目光忽然落喺我身上，我同佢對上視線，佢朝我友善地微笑

「Okay啦。」岑諾新抬頭望咗佢一眼，然後將嗰幾個file塞到櫃桶中

孫慧伶點一點頭後轉身朝我地課室門口行去，岑諾新望一望我，好似有啲咩要講一樣，但佢又冇開口講任何嘢





「哼⋯」我扮嬲撇開臉唔望佢，輕哼一聲

「我收功課咋⋯」岑諾新講道，我眼睛嘅餘光都見到佢托住頭望我

「嗯⋯」我淡然地嗯一聲回答

「喂⋯」岑諾新伸手拍一拍我膊頭，我唔望佢，佢又伸手拍多我兩下，「你唔好諗住扮嬲。」

我聽到佢咁講，不禁瞪大眼，比佢睇穿咗我啲企圖

「我冇扮⋯！」我一下子回頭望向佢，望到過去嘅時候，卻見到岑諾新手上拎住一筒糖放喺我面前，「嘩⋯！你幾時買㗎？」

我即刻伸手去拎，岑諾新托住下巴一臉得意洋洋





「你估下？」岑諾新嘅嘴角微微上揚，望一望我手上拎住嘅糖，又望一望我

「咁識氹人呀～」我拎咗一粒糖，拆開糖紙，將糖放到口中，「成日都咁樣氹女仔？」

「冇對其他人用過。」岑諾新輕輕地捏咗我嘅臉頰一下，「唔洗亂諗。」

我不禁一笑，然後將筒糖放到裙袋中，抬眼望佢一眼同時伸手拍一拍裙袋

「仲嬲唔嬲？唔嬲啦係咪？」岑諾新望住我，佢明明係問緊我，但又代我答埋




IG Link: https://www.instagram.com/nd_cotttoncandy/?hl=zh-t