［愛情純愛］既然忘記唔到佢，不如試下中意我⋯？: 105. 抗拒的相遇

「嗯⋯」岑諾新嘅視線移開咗一秒後又瞬間重新落喺我身上

我悄悄地抬眼望向佢，佢嘅臉頰泛起淡淡嘅紅霞，今次，係我第一次見到佢面紅⋯佢自己好似都因為覺得有啲害羞所以微微耷低頭，稍微將視線移開

望住佢一副同佢嘅冷淡成反差嘅害羞，我輕輕握緊拳一下，為呢份心情打氣

我先一頓，然後朝岑諾新邁步行咗一步，行到佢嘅面前，微微踮起腳尖、雙手輕輕地搭喺佢嘅膊頭上，喺佢淡紅嘅臉頰上，輕輕地落下一個吻

「生日快樂⋯」我柔聲地講道，「生日禮物，送咗比你啦⋯」





我抬頭望佢，喺我同佢嘅視線對上嘅一刻，我嘅心跳都漏拍了

岑諾新⋯你快啲出句聲⋯！我明明想行走，但卻冇咁嘅力去行開，我雙手掩着臉，微微耷低頭

「去買嘢食⋯」我先轉身落樓梯，「行啦⋯！」

面紅到，一個點⋯！好彩朝早呢個時間，冇咩人會行後梯，如果唔係就真係尷尬啦⋯！

我急步落樓梯，岑諾新行喺我身後，我回頭望向佢，佢下意識伸手撥撥頭髮





「仲唔行企喺度做咩？」我笑着問佢，「我肚餓啦～」

我講完就轉身行，佢會跟上我嘅步伐㗎啦～

⋯

「今日我可唔可以同佢地一齊番去？」我問岑諾新

事源係啱啱喺我同詠妍佢地幾個一齊食lunch嘅時候，佢地講起⋯





「蔣倩盈小姐，唔知道你有冇發現，你已經一個星期冇同我地一齊放學呢～」希童面帶着笑笑，用客服嘅語氣對我講道，「你會唔會過分重色輕友呢？」

「呃⋯咁我今日同你地一齊走囉～」我花咗一秒思考後回答道

「耶～」樂恩同詠妍拍手道，「咁先係㗎嘛～」

就係咁，所以我要問問佢

「可以呀。」岑諾新托住下巴，點點頭，「費是佢地話我成日霸住你啦～」

「咁我聽日再同你一齊番去呀～」我笑一笑講道，「你今日就同楊朗然佢地一齊走啦～」

「嗯，你同佢地玩得開心啲就係。」岑諾新微微一笑

所以，放學嘅時候，今日就係女子組一齊放學番屋企嘅日子





「不如一齊去食嘢呀～」樂恩提議道

「好喎！行啦～去行下再番去添啦～」希童一手挽住樂恩嘅手臂，一手挽住我嘅手臂

「Let’s go～」詠妍輕啪一下手指

唔⋯開心係開心啦，但今日唔係同岑諾新一齊放學，感覺有啲⋯好似已經有啲掛住佢⋯？

X⋯X⋯X

今日放學，我冇同蔣倩盈一齊走，亦冇同楊朗然一齊走

楊朗然佢地話去網吧一齊打機，但我今日有啲攰，想早啲番屋企休息⋯所以最後，係我自己一個人搭車番屋企





我同平日一樣，上到巴士嘅上層，坐喺窗邊嘅位置，慣性地喺一個人嘅時候戴上耳機

「今日佢唔喺度⋯好奇怪⋯」我望向窗外嘅同時喺心中不禁講道

嗯⋯？有人喺我隔離坐低咗，邊⋯個⋯？

係孫慧伶⋯佢坐低咗喺我隔離⋯

「嗨～」佢先開口同我打招呼，「自己一個嘅？唔同女朋友一齊走？」

「嗯，佢唔得閒。」我將視線移開，唔想望住佢

明明周圍仲有位，做咩要坐喺我隔離，搞到大家嘅氣氛咁尷尬⋯？

「新，你就唔好咁抗拒我嘛⋯」佢細聲地講道，我抬眼望佢嘅時候，佢又擺出一副楚楚可憐嘅表情，「我地分咗手，就唔可以做朋友啦咩⋯？」





「冇抗拒。」我淡然地講道

「你咁冷淡，仲話唔抗拒？我好了解你啦～」孫慧伶朝我笑一笑講道

聽到佢話佢好了解我嘅時候，我不禁失笑⋯了解？佢有⋯了解過我咩⋯？

「了解我？」我輕輕一笑，「我本來就對所有人都係咁，唔好話你了解我。」

「咁我地，都可以做朋友㗎～」孫慧伶堅持地講道，「你咁嘅態度，搞到我唔知點咁⋯我唔想我地嘅關係咁僵⋯」

我冇出聲，因為，我真係唔太想同佢做番朋友⋯我做唔到當佢係朋友，畢竟，我唔係佢

「其實我同你真係冇做番朋友嘅必要。」我忍唔住開口講道，「無謂令大家都唔自在。」





「如果你真係放低咗，點解會唔自在？」孫慧伶直白地問道，佢呢一問，令我心裏愕然

「你想講咩⋯」我不禁輕皺起眉頭，「你知唔知自己講緊咩⋯？」

「你覺得我講緊啲咩咪講緊啲咩～」孫慧伶微微一笑，「如果唔係，你冇必要好似心虛一樣～」

「你中意點諗就點諗。」我唔想同佢爭拗落去，對我冇好處




IG Link: https://www.instagram.com/nd_cotttoncandy/?hl=zh-tw