［愛情純愛］既然忘記唔到佢，不如試下中意我⋯？: 104. 差別待遇

4月6日 朝早

今日我比平時早咗出門口，去到岑諾新住嘅屋苑，喺佢屋企樓下等佢

「唔知佢陣間見到我會唔會好surprise呢～」我喺心中諗道，心裏已經有啲小興奮

我嘅雙手緊握住手機，兩秒一回頭望向大堂嘅門，每當有人推門嘅時候，我嘅心跳都漏一拍

「佢落到嚟未⋯？」我望一望向大堂嘅門，然後又望一望手機，「應該出門口啦掛⋯」





大堂嘅門打開，有人喺從大堂行出嚟，我緊張地盯着大門嘅方向

「岑諾新⋯！」我見到跟喺一個上班族身後行出嚟嘅岑諾新

我見佢行出嚟，頓時跑過去迎接佢；岑諾新剛好抬頭望向我呢邊，不禁怔了一下

「早晨！生日快樂！」我跑到佢嘅面前停低

「早晨⋯」岑諾新似乎仲未回神過嚟，定佢係未瞓醒，「你喺度嘅？」





「有人生日嘛～咪早啲出門口過嚟等佢，比個surprise佢囉～」我喺邁步行嘅同時，自然而然地伸手拖佢，「不過有人好似未瞓醒⋯」

「只係有啲意外，你會特登嚟等我⋯」喺岑諾新低頭嘅瞬間，我見到佢臉上掛住嘅笑容，「多謝你嘅生日祝福。」

「你咁平靜㗎⋯」我有啲不滿地講道，「哼⋯」

「我開心！我驚喜！我意外！」岑諾新無奈地一笑後講道，終於係有起伏嘅語氣，「多謝！」

「好啦～原諒你啦～」見佢咁配合咁比反應，我不禁笑起嚟





我地喺學校附近嘅巴士站落車，行咗一小段路之後，後面忽然傳嚟急促嘅腳步聲，喺我回頭望過去嘅時候，嗰個人已經跑得好近

「大佬生日快樂！」楊朗然跑到岑諾新嘅身旁，手一下子就搭到岑諾新嘅膊頭上

「多謝。」岑諾新淡然地點點頭

「生日快樂！」楊朗然望住岑諾新，莫名其妙地又講多一次

「嗯，多謝。」岑諾新以同一個表情、同一個反應回答楊朗然

「岑諾新，你就唔可以比下反應我？一定要咁冷淡？你生日，我同你講生日快樂喎！」楊朗然皺起眉頭，聲線裏夾雜咗滿滿嘅不悅

感覺，好似見到今朝早嘅自己一樣～我抬頭望向岑諾新，好奇佢喺聽到楊朗然咁講之後會比啲咩反應，會唔會好似今朝咁？

「同你講完多謝，你仲想我比啲咩反應？」岑諾新望向楊朗然，淡淡地講道，「你期望我比咩反應你⋯？」





「嘩你真係⋯！」楊朗然似乎比岑諾新激親，佢望向我問道：「你同佢講生日快樂，佢都係咁嘅反應㗎？如果係嘅話，我勸你唔好同佢一齊。」

「唔係⋯」我抿一抿唇後，笑道，「佢好開心咁多謝我啦～」

「嘩～岑諾新你真係，太過分啦！」楊朗然望住岑諾新不滿地講道，「你、你有異性冇人性呀！」

「你同佢，一樣咩？」岑諾新淡淡然地講道，楊朗然一副受到打擊嘅表情，「你又唔係佢。」

「你真係⋯好過分⋯」楊朗然搖搖頭

岑諾新望向我，我帶着上揚嘅嘴角撇開臉，聽到佢咁樣講，有種被偏愛嘅感覺

番到學校，我開完locker之後喺位整理好書本放入櫃桶





「咕～」肚子叫咗一聲，唔⋯有啲肚餓，今日我冇食早餐啦⋯我望向岑諾新，企起身行到佢嘅身旁，「你餓唔餓？去唔去小食部買嘢食？」

「好呀。」岑諾新將喺locker拎出嚟嘅嘢都放到櫃桶中後起身

我同佢踏出課室，自然而然地向後梯嘅方向行去，因為後梯最近我地課室

「你有冇咩生日禮物想要？」我好奇地問道，因為我真係唔知送咩比佢

「你嗰日嗰個，唔係生日禮物？」岑諾新一臉認真地問道

「嗰日嗰個？咩嗰日嗰個？」我不解地問道

「唔⋯」岑諾新欲言又止，移開視線嘅同時指尖輕輕地喺自己嘅臉頰上敲咗兩下，「呢個⋯」

「呃⋯又唔係真係嘅⋯」我嘅臉頰又開始發熱起嚟，「但你想當係嘅話，都、都可以⋯！」





「咁我嘅生日禮物係咩？」岑諾新先轉移話題番去生日禮物上

「你想要咩？我唔知你中意啲咩⋯」我微微耷低頭，心裏有啲緊張

「咁，我要呢個。」岑諾新嘅指尖又輕輕地喺臉頰上敲咗兩下，「生日禮物。」

咩、咩意思⋯？佢叫我，錫佢⋯？

「吓、吓⋯？」我有啲反應唔嚟，一時間唔知比咩反應，又唔知講啲咩好，「你、你認真嘅⋯？」

「我似講笑咩？」岑諾新卻反問我一句，「又係你問我要咩生日禮物嘅。」

「佢係認真㗎⋯」我喺心裏講道，岑諾新朝我行近咗一步





我嘅心跳好似癲咗一樣瘋狂跳動，我真係要錫佢⋯？

「淨係⋯要呢個就夠？」我不禁開口就問道，明明我就冇打算喺呢度錫佢⋯！我咁樣問，同我已經有錫佢嘅打算有咩分別？




IG Link: https://www.instagram.com/nd_cotttoncandy/?hl=zh-tw