［愛情純愛］既然忘記唔到佢，不如試下中意我⋯？: 106. 想念

孫慧伶起身準備落車，我行喺佢嘅身後

佢同當初嘅佢，真係同一個人嚟⋯？竟然會同我講啲咁嘅嘢⋯佢變咗？定佢本來就係咁樣⋯？

落咗車之後，佢一直行喺我嘅身旁，點解佢要行喺我隔離？

我下意識就向旁邊嘅空位行咗一步，拉開同佢之間嘅距離⋯到底你想點？唔好喺呢個時候，又行近我好唔好？

「拜拜～」孫慧伶對我講道，我當聽唔到一樣頭也不回地行去自己住嘅嗰一邊





既然分咗手，什至係你提出嘅分手，咁⋯就唔好再有交集比較好⋯

⋯

我坐喺書枱前，邊聽住歌邊諗緊嚟緊要買咩比蔣倩盈好

再過幾日，就係蔣倩盈嘅生日⋯我同佢嘅生日，只係差咗10日咁多

其實生日禮物，我已經諗好送咩，只係未買





「唔知佢中唔中意⋯」我心裏有啲擔心

我怕佢會唔中意呢份生日禮物⋯但諗起佢每次嘅反應，我又不禁有啲安心

其實我對佢⋯早就唔係「想試下一齊」嘅感覺⋯佢嘅反應又好，笑容都好，都好可愛⋯

每次見到佢嘅笑容，我嘅心就完全冇辦法平靜落嚟一樣，心跳只會有快冇慢

我曾經以為，呢種心動，只會對孫慧伶一個人先有，但似乎並唔係呢





拎喺手中嘅手機震咗一震，我望向手機螢幕時就見到蔣倩盈send過嚟嘅message

蔣倩盈：今日同佢地一齊去咗食甜品～下次同你一齊去食呀～

佢總係充滿活力又可愛，真係⋯

「好呀」

一個咁好嘅女仔，張景彥係點捨得去傷害佢⋯？不過，都唔重要啦已經⋯

蔣倩盈：呢間啲甜品很不錯！你應該會中意

「下次一齊去食」

我行到床邊坐低，然後灘低喺床上，今日發生咗太多事⋯





我合起雙眼稍作休息，但喺合埋眼嘅瞬間，腦海中頓時浮現出今日蔣倩盈錫我嘅情景

輕輕嘅一吻⋯喺佢靠近我嘅時候，一陣甜甜嘅香味撲鼻；我有啲緊張，心臟好似演奏緊啲咩振奮人心嘅樂章一樣；喺佢嘅唇掂到我臉頰嘅時候，我感覺到佢嘅唇上搽咗潤唇膏，少少油膩嘅感覺，但我唔抗拒呢種油油嘅感覺

「禮物⋯」我托住腮諗緊我決定好要買嘅禮物

感覺⋯女仔都中意精緻嘅嘢，所以呢種自帶閃亮效果嘅裝飾品，佢應該都會中意

蔣倩盈：我番到屋企啦！

我抬頭望向放喺枱頭嘅時鐘，8點幾

「食埋飯未」





「我仲以為宜家先6點幾⋯」

蔣倩盈：食咗啦！今日冇同你一齊番屋企，唔慣呢～

蔣倩盈：唔洗太掛住我（笑喊）

見到蔣倩盈咁樣嘅一句，我嘅嘴角不禁上揚，心裏有種淡淡嘅甜意傳嚟

「你都唔洗太掛住我」我打字嘅時候忍唔住笑意

蔣倩盈：你又知我有幾掛住你？

明明蔣倩盈唔喺我隔離，我卻感覺到佢講呢句說話時嘅語氣同表情

大概會係臉頰帶着淡淡紅霞，但係又夾雜咗想捉弄我一樣語氣





「直覺知」我回覆

冇同佢一齊放學，但明明番學嗰陣都見住佢，但都係會覺得心入面空空的⋯

⋯

翌日

我同平日一樣，喺同一個時間出門口，比佢先早一步到巴士站等佢

「早～晨！」聽到一把熟悉嘅聲音嘅我望向聲音來源，見到蔣倩盈小跑到我面前

佢跑到同我相差一步之遙嘅距離時，輕輕跳咗一步到我面前，然後雙手捉住我隻手





「早晨。」我對佢講道同時，手慣性地拖住佢，「行啦。」

喺巴士嚟到後，我同佢跟住前面嘅人上車，企喺我地平日企開嘅位置，就係輪椅位

我企喺角落位，背靠住門同輪椅位嘅玻璃，喺番學時間嘅人巴士上好多人，學生又好，上班族都好都逼喺呢架車入面

蔣倩盈朝我行近，佢嘅胸前幾乎要貼上嚟我度一樣，我低頭瞄咗一眼，然後默默地移開視線

「郁都郁唔到⋯」望住街景嘅我喺心中無奈地講道

蔣倩盈嘅雙手忽然間試探般放到我嘅腰上，我望一望佢，佢微微耷低頭，手捉住我嘅校服

「琴日冇同你一齊走⋯」蔣倩盈柔聲地對我講道，「掛住⋯」




IG Link: https://www.instagram.com/nd_cotttoncandy/?hl=zh-tw