［愛情純愛］既然忘記唔到佢，不如試下中意我⋯？: 100. 難以壓抑的心動

我輕輕點頭，將右手提起放到佢嘅手心，佢自然地捉住我隻手將手垂低

佢隻手真係好暖⋯我嘅左手不禁將公仔緊抱喺懷中

心臟嘅跳動起伏比平時好似更強，強到我都可以感覺到佢跳動時胸口嘅微微震動

「心跳得好勁⋯」我喺心中默默地講嘅同時微微耷低頭，望住我地嘅影子

我地行到去附近商場嘅雪糕店，企喺鋪頭入面食埋先





我食咗兩啖之後拎出手機，打算偷偷地影岑諾新，其實都唔係偷偷地，因為po喺IG story佢一定都儲睇到

我輕輕咬住膠匙羹，拎住手機先影住我手上嘅雪糕，然後悄悄地將手機邊上升邊向岑諾新嘅方向影過去

「嘻⋯」我喺心中一笑，耷低頭望住手機嘅螢幕，「應該會影到佢嘅側面⋯」

當手機影到岑諾新嘅時候，我卻影唔到佢嘅側面，因為我從手機嘅螢幕中望到佢拎住手機對住我

佢隻手放喺枱上呈L字型，手機對住我，佢望住手機嘅螢幕⋯佢影緊我⋯？





我先鬆開錄影鍵，佢好似都啱啱好影完將手機放低；我耷低頭望佢嘅手機螢幕，佢啱啱果然係影我⋯！

「你做咩偷影我呀～」我先開口講道，忽然間覺得笑意都要忍唔住一樣

「你都影我。」岑諾新望住手機中比佢影咗落嚟嘅我

「咁⋯拍拖當然要放下閃⋯」我講嘅時候，心臟緊縮咗一下，有啲緊張

雖然咁講會莫名其妙地有啲唔好意思，但我都係將呢句說話講咗出口





我當住佢面㩒咗public嘅icon，然後story就po咗出去我嘅public story

我望一望佢，佢毫不猶疑就㩒咗po public story；我抬眼望一望佢後心裏甜甜地笑，佢見到我笑起嚟，佢都笑咗一笑

我耷低頭繼續食雪糕，我悄悄地偷瞄咗佢一眼

「呢一刻⋯感覺好美好⋯」我喺心中不禁講道

美好嘅事，就自然會想留住⋯宜家佢之所以喺我眼前，係因為曾經嘅我地將我同佢呢兩個本來冇關係嘅人拉埋一齊

冇過去嘅經歷，就唔會有宜家嘅一刻⋯我唔會話以前有邊一個選擇做錯咗，因為失去咗之前隨便一個嘅選項都好，都唔會有呢一刻⋯

我唔知道我地之間嘅美好可以維持幾耐，但係我想努力咁維繫宜家嘅美好⋯

⋯





食完甜品，我同佢以散步一樣嘅步速同步伐行番屋企

「好啦～我番到啦⋯」我停低落嚟轉身望向佢

「嗯，星期一見。」岑諾新講道

「嗯，星期一見⋯」我心裏有啲不捨，但都要番屋企

我同岑諾新對視咗兩秒之後，我輕輕提手將手抽出嚟；岑諾新動作好快地伸手將我隻手捉番住

「做咩？」我有啲疑惑咁望住佢

「冇⋯」岑諾新輕輕一笑，搖搖頭





喺我想開口問多佢一次「做咩」嘅時候，佢捉住我隻手，將我向佢嘅方向輕輕一拉

我朝佢嘅方向行前咗一步，岑諾新直接將我攬住

心臟先係遲疑咗一下，然後就開始快速跳動，呼吸都開始變得稍微淺而快

我嘅左手攬住公仔，右手搭喺佢嘅膊頭上

喺呢個近距離望住佢，我嘅臉頰變得有啲滾燙，我緩緩地撇開臉、移開視線

岑諾新意識到我想撇開臉，伸手輕輕掐住我兩邊嘅臉頰，我連視線都移唔開，完全做唔出好似上次捉弄佢一樣嘅反應

「氣氛同上次完全唔同呀⋯」我喺心中有啲不知所措地講道

總覺得佢下一秒就要錫落嚟一樣，我不禁吞咗一啖口水，手心開始冒汗，連心跳都變得好快⋯





「噗噗、噗噗、噗噗——」心跳嘅聲音直接從體內傳到我嘅耳仔，連耳膜都震動緊，冇任何行動嘅佢令我更緊張

比佢矮嘅我偷偷望向佢嘅喉嚨，見到佢嘅喉核郁咗一下

「佢真係打算⋯錫⋯？」我喺心中不禁猜想，臉頰變得更滾燙

如果宜家係朝早或者晏就，一定會睇到我塊面紅到好似蘋果一樣

「夜啦⋯」岑諾新忽然間鬆開掐住我臉頰嘅手，淡然地講道，「早啲番去休息⋯」

「嗯⋯」我鬆開手後向後踏咗一小步，「咁⋯星期一見⋯」

我將公仔抱緊喺懷中，視線移開一下後又番到岑諾新嘅身上，手摸一摸公仔





「我地星期一會再見，唔洗唔捨得。」岑諾新嘅手溫柔地放喺我頭頂

「我冇唔捨得囉⋯！」我因為佢嘅一句，頓時又心跳加速，「我地又唔係唔再見！」

「番去啦。」岑諾新講道

我點點頭然後轉身朝大堂門口行去，喺打開門前入去前，我回頭望咗岑諾新一眼，同佢揮一揮手先邁步行入去

今日心跳加速嘅次數都太多啦掛⋯！




IG Link: https://www.instagram.com/nd_cotttoncandy/?hl=zh-tw