［愛情純愛］既然忘記唔到佢，不如試下中意我⋯？: 99. 兩人

嵐嵐將籃球拋出去，但下下都撞到籃框反彈出去；蔣倩盈又唔係打開籃球，又點可能百發百中

「你唔玩呀？」蔣倩盈將籃球遞比我，「難得一齊出嚟～」

「我怕我太勁，你地冇癮。」我接過籃球，將籃球一拋，籃球直接喺穿針

「嘩～」嵐嵐高興地笑起嚟

玩完呢個之後我又跟住佢地睇行去玩氣墊球機嘅前面，呢個氣墊球⋯唔係得一塊大嘅板，仲有好多塊細板





佢兩個好似已經準備好二打一一樣企喺我對面，嵐嵐拎住coins喺一旁入機；本來都望住嵐嵐嘅我同蔣倩盈，同時將視線移開然後對望

蔣倩盈喺同我對上視線時，對我露出燦爛嘅笑容，佢都有好似小朋友一樣貪玩嘅一面

見到佢嘅笑容嘅我唔知點解下意識就撇開臉，但唔係因為唔想見到佢⋯

岑諾嵐同蔣倩盈一直都冇停過，今日對佢地嚟講係要玩得盡興嘅日子一樣，我一直只係跟喺佢地嘅身後

陪佢地一齊玩，望住佢地開心





「嵐嵐，你仲想玩啲咩呀？」蔣倩盈問道

「我想要嗰邊嗰個肉桂狗公仔！」嵐嵐拉住蔣倩盈到夾公仔機前面

「你已經好多公仔，仲要？」我望到嗰隻公仔嘅size時無奈地講道

公仔唔係真係好大，對我嚟講，大概⋯係可以佔咗大半個枕頭嘅位置嘅size

「我想要呀！」嵐嵐鼓起兩泡腮講道，「哥哥你夾比我啦！」





蔣倩盈望一望嵐嵐，然後又望一望我

「冇下次⋯」我無奈地從蔣倩盈嘅身旁行到去夾公仔機前面

我睇咗公仔嘅位置，大概預計一下喺邊度落夾之後，諗都冇諗就入coins夾公仔

鐵夾準確地將嵐嵐想要嘅公仔夾住，只要喺佢升起之後冇跌番落嚟⋯

「咔—」鐵夾上升到本來嘅位置，輕輕晃咗一下，公仔⋯冇跌番落嚟⋯！

嵐嵐已經急不及待地行到出口處等公仔跌落嚟，公仔去到用膠板圍住嘅出口處上方，「哐」一聲跌落嚟

「嘩～耶～」嵐嵐頓時推開出口處嘅膠板，將公仔抽出嚟

「咁勁嘅你⋯！」蔣倩盈輕輕地捉住我嘅手，用一副難以置信嘅表情望住我





「你要唔要？」我望到佢嘅表情後不禁問道

「你夾埋比我呀？」蔣倩盈雙眼發着光，笑容都甜甜的，「咁我要隔離細嘅就可以啦～」

我行過去隔離部機前，夾咗隻細嘅兔仔公仔比佢

「耶～」蔣倩盈高興地接過隻公仔，「多謝～」

蔣倩盈喺嵐嵐嘅身旁蹲低，拎出手機，兩個女仔拎住啱啱夾出嚟嘅公仔一齊影相，仲要冇我份，佢兩個自己影

望住蔣倩盈臉上嘅笑容，莫名其妙地覺得今日嘥錢好似都好值得⋯

喺蔣倩盈抬頭望住我笑得燦爛嘅一刻，心臟嘅收縮，好似毫不猶疑地傳嚟一個訊號一樣⋯





「仲剩咗一個coin。」我將手上最後一個coin遞比蔣倩盈

蔣倩盈接過後便順手地將個coin放入銀包中

「嵐嵐，肚餓未呀？」蔣倩盈細心地問道

「嗯！」嵐嵐點頭

「咁我地去食飯啦～」蔣倩盈笑住企起身，然後望一望我

X⋯X⋯X

食完飯之後，宜家得番我同岑諾新兩個人喺路上，因為岑諾新先將嵐嵐送咗番屋企，然後再送我番嚟

「嗯⋯我到啦⋯」我停落嚟面對住佢企，心中有少少唔想咁快分別





「嗯。」岑諾新遲疑地點頭，「咁，星期一見⋯」

「嗯⋯」我微微點頭，雙手因為無處安放而攬實隻公仔

我同佢明明都已經點頭，但係我地都冇轉身走，一直企喺原地

「嘻⋯你仲企喺度做咩？你唔係番去咩？」我微微耷低頭不禁一笑後抬頭望向岑諾新

「你自己都企喺度唔走。」岑諾新都不禁笑咗一笑

我同岑諾新都冇出聲，忽然間就dead air咁企喺原地，我有啲唔知點一樣，攬住公仔嘅雙手輕輕交搭着，因為覺得唔自在而捉實自己嘅手臂

「岑諾新你快啲開口講啲咩啦⋯！快啲講啦！」我喺心中著急地講道，悄悄地抬眼望咗岑諾新一眼





岑諾新好似猶疑緊一樣，一直企喺原地但唔出聲

「唔⋯咁我—」「食唔食飯後甜品？」

正當我開口想話「咁我番去啦⋯」嘅同時，岑諾新開口問我去唔去食甜品

「哦⋯都有少少想食甜品⋯」我強忍着笑意講道

「咁⋯行未？」岑諾新朝我伸手，示意拖手




IG Link: https://www.instagram.com/nd_cotttoncandy/?hl=zh-tw