［愛情純愛］既然忘記唔到佢，不如試下中意我⋯？: 101. 尷尬的相遇

我沖完涼後坐喺書枱前，我將公仔放到枕頭邊，然後喺IG story影咗張相，咩caption都冇加就po咗出去

回想起啱啱喺樓下嘅時候，總覺得喺嗰個氣氛下，完全係要錫嘅節奏⋯

「呀⋯要癲啦⋯」我將手按喺胸膛，心跳又開始加速

放喺枱上嘅手機忽然一震，因手機震動而同枱面磨擦嘅聲音嚇到我成個人都震咗一下

「嚇死⋯」我望到手機螢幕亮起時鬆咗一口氣





岑諾新：番到屋企

「好呀～」我頓時回覆道

「聽日係星期日，後日先番學呀⋯咁漫長嘅⋯」我望住手機時喃喃自語講道，「我做咩會期待番學⋯」

⋯

嚟到4月頭，春天嚟啦～我地學校先搶先一步換上夏季校服，不過因為有啲怕涼，所以都係帶定長袖冷衫啦～





「我出門口啦～」我帶住換上夏季校服嘅好心情踏出家門

今日係換季嘅第一日，我除咗因為換季而開心之外，仲有啲期待陣間見到岑諾新啦～之前著夏季校服嗰陣都冇好好留意佢啦～

我踏出大堂，今日天氣好好呢～咦？

岑諾新就企咗喺我屋企大堂出面附近，喺佢平時送我番嚟時送到嘅嗰個位置

「你喺度嘅！？」我朝佢小跑過去，心入面驚訝又帶點激動





「今日換夏季校服，特登過嚟等你。」岑諾新講道

換夏季校服，所以特登過嚟等我⋯？想睇我著夏季校服嘅意思⋯？定想比我睇下佢著夏季校服嘅樣？

「換咗季，你就冇得戴住我個髮圈喺手⋯」我望住佢空空如也嘅手腕

「喺書包。」岑諾新淡淡地講道

我地一齊行去巴士站搭車，上到車我地又企番喺同一個位

我悄悄地伸手拖佢，佢明明合埋眼補眠，但喺感覺到我拖佢嘅時候，佢輕輕將我隻手捉實

我心裏甜甜地笑，我偷偷地將佢上下打量一番，著住夏季校服嘅佢，好好睇⋯

⋯





小息嘅時候，我拎起上次喺借嘅《我們仨》打算去圖書館還書，因為功課都已經做完交咗

我踏上梯級，上到去圖書館推門，行到去還書處還書

「你都嚟還書呀？」忽然間有人同我講嘢，我自然地循住聲音嘅方向望去，見到張景彥就企喺我身後

「哦，係呀⋯」我露出一個尷尬而又不失禮貌嘅微笑，「你還書？」

「嗯。」張景彥點點頭

我微微耷低頭見到佢手上拎住嘅嗰本書，係錢鍾書嘅《圍城》，不過我冇打算再開口同佢講啲咩，因為真係有啲唔自在

佢行到去我隔離嘅位置還書，我先佢一步行出圖書館，豈料佢好快搞掂，喺落樓梯嘅時候行喺我後面





「係呢，你隻手點呀？上次見你都受咗傷⋯」張景彥忽然間行到嚟我旁邊，又向我搭話

「冇咩事呀～都好番啦已經。」我禮貌地微微一笑，然後我又靜咗落嚟

我想快啲番到去課室，唔想同張景彥單獨兩個人咁樣一齊行，我又會唔自在，比人見到又會比人講閒話

我同張景彥之間都可以企多一個人，我行喺中間扶手嗰邊，一直落到去我地中五課室嘅一層

岑諾新由下層行緊上嚟，佢一直耷低頭睇手機，忽然間抬頭，佢先見到我，然後朝我身後望咗一眼，亦見到行喺我身旁嘅張景彥

「救星到啦～」我喺心中嗌道，頓時落埋嗰幾級樓梯小跑到岑諾新跑身旁

「還完書？」岑諾新收起手機，將手機放入褲袋

「嗯嗯！還完啦～」我緊隨喺岑諾新嘅身旁





我啱啱會唔會好過份⋯？唔會囉！邊度過份，我都只係為咗避免會有不必要嘅麻煩出現啫，我都冇做錯呀～

而且，佢有孫慧伶啦，比任何人見到都唔太好就係啦

我下意識回頭一望，張景彥嘅課室喺我地課室前面，近前梯多啲；我嘅班房就近後梯多啲

「尷尬死啱啱⋯」我輕輕拉一拉岑諾近嘅手，細細聲對佢講道，「超唔自在。」

「你又繼續同佢一齊行？」岑諾新反問我一句

「咁都係落樓梯⋯」我無奈地回答，「你簡直就係我嘅救星！」

「哦，多謝。」岑諾新淡然地對我講道





我跟喺岑諾新嘅身後行番埋位，等待上堂嘅鐘聲響起




IG Link: https://www.instagram.com/nd_cotttoncandy/?hl=zh-tw