［愛情純愛］既然忘記唔到佢，不如試下中意我⋯？: 77. 本來就不是

「食飯啦！」我媽端着一碟餸行出嚟，「倩盈裝飯啦去。」

我起身行到去廚房裝飯，好耐都冇三個人，一家人齊齊整整咁食餐飯

同爸爸媽媽一齊食飯當然開心，但我總係不自覺地將視線落到放喺手旁嘅手機上，留意住有冇收到IG message

「果然冇呢⋯」我嘅心有啲失落

夜晚10點，因為我爸聽日仲要番工，所以就先番屋企





我沖完涼行番房，拎起放喺枱面嘅手機，手機螢幕一亮，Face ID自動地解鎖，係岑諾新⋯！

岑諾新：唔緊要，我同你本來就唔係真係男女朋友

我見到佢咁樣回覆，心裏一驚，佢好似真係嬲我，點算呀？

「我同你本來就唔係真係男女朋友」

一見到呢句說話喺我地嘅對話框中彈出嚟，心裏⋯忍唔住有啲難受⋯





感覺上佢嘅語氣比起平時好似更加冷淡，定只係因為我做咗啲咩虧心事，所以先會咁覺得？

「對唔住，唔好嬲我啦⋯」我回覆道，然後佢又冇再覆我

⋯

翌日，第一個小息

我望住岑諾新同楊朗然行出課室，今日岑諾新對我都冷冷淡淡咁，佢連望都冇點望過我啦⋯





「倩盈！」樂恩忽然間叫咗我一聲

「嗯？」我回過神望向樂恩，「叫我做咩呀？」

「我地叫咗你幾次啦！」樂恩輕皺起眉頭望住我，「你搞咩呀？」

「哦，sorry呀，聽唔到⋯」我苦笑道

「你今日做咩呀？心不在焉咁嘅？」希童一臉擔心咁問我，「唔舒服呀？」

「我冇事呀⋯」我搖搖頭

「你搞咩呀？有事就同我地講嘛，唔舒服就去醫療室瞓啦～」詠妍都輕皺起眉頭對我講道

「唔係呀，唉⋯」我無奈地嘆咗一口氣，帶着滿滿嘅歉意細聲地講道，「係岑諾新佢嬲咗我⋯」





「點解呀？你地平時都好好㗎～」希童不解地問道

「唉⋯係咁嘅⋯琴日放學佢送我番到屋企附近嘅時候，我見到我媽，然後因為我冇同我媽講我拍緊拖，所以我就好快咁鬆開咗佢隻手⋯」我微微耷低頭，對佢地講道，「然後我媽問佢係邊個，我就下意識答咗佢係我朋友，我媽就話佢高大靚仔，係唔係我男朋友呀，我又答佢係朋友咋⋯然後岑諾新就對我冷冷淡淡咁⋯」

「吓！？」樂恩不禁吓咗出嚟，「你答一次係朋友已經桶咗佢一刀，你仲要答第二次？」

「你鬆開佢隻手都算啦，仲要答兩次話佢係你朋友⋯」希童都皺起眉頭，「比我都嬲啦⋯」

「我一番到屋企即刻dm佢同佢道歉，但佢話唔緊要⋯」我扁起嘴講道

「佢個樣似覺得唔緊要咩？」詠妍托住腮，不禁反一下白眼，「你仲唔氹番佢？」

「我今日點同佢講嘢佢都係冷淡嘅反應⋯」我感覺好無助，「我今日又同唔到佢食飯，佢今日話同楊朗然佢地食飯呀⋯」





「佢番嚟啦佢番嚟啦！」希童同樂恩捉住我細聲地講道，「快啲去問下佢係咪真係唔一齊食飯之類！」

「去啦！」詠妍忽然間都加入，我半推半就地企咗起身朝岑諾新行去

「岑、岑諾新⋯！」我行到佢嘅身旁拉一拉佢嘅手，岑諾新望向我

「做咩？」岑諾新嘅語氣，今日聽起嚟格外冷淡

「晏就，真係唔一齊食飯？」我有啲緊張地問道

「唔啦，我同佢地食。」岑諾新拒絕咗我

「今日放學⋯」我本來想同佢講我今日放學同詠妍佢地一齊走，但係，呢一刻我講唔出口

我咁樣同佢講嘅話，佢會唔會覺得我係避緊佢⋯？





「今日我要補課，你可以同佢地一齊番去。」岑諾新對我講道

我講唔出嘅說話，佢講咗出口⋯佢一定係在意，先會係咁樣嘅反應，係唔係⋯？

「嗯⋯」我耷低頭，細聲地回答

佢嬲咗我，但我真係唔係故意咁做⋯

「我今日唔同你地一齊走，我想等埋佢⋯」我坐番低喺自己位後對佢地講道

「嗯，得啦～」希童比咗個Okay手勢我，「快啲去氹番佢啦～」

「你嗲佢兩下，佢可能就唔會嬲㗎啦～」樂恩笑了笑講道





「嗯嗯！佢應該都唔忍心真係嬲你咁耐嘅～」希童和議道

「我都希望係咁樣⋯」我微微耷低頭苦笑着講道




IG Link: https://www.instagram.com/nd_cotttoncandy/?hl=zh-tw