［愛情純愛］既然忘記唔到佢，不如試下中意我⋯？: 76. 否認

我同詠妍佢地揮揮手講拜拜，然後孭埋書包行到去岑諾新嘅座位旁

「行得未呀？」我問道

「行得啦。」岑諾新孭起書包行出座位，順手地將櫈拍埋

我同岑諾新產到巴士，我地嘅手冇鬆開，輕輕地扣着，我地好少會真係拖得好實，好多時都只係輕輕咁扣住

「呵欠⋯」岑諾新打咗個喊露





「你仲係好眼瞓咁。」我望住有啲倦意嘅岑諾新，「琴晚咁夜瞓⋯」

「因為邊個⋯」岑諾新講嘢嘅聲線都顯得有啲攰

「今晚早啲瞓啦～」我笑一笑講道，「如果唔係聽日番學又要恰眼瞓㗎啦～」

「嗯，盡量早瞓。」岑諾新點點頭

「下次你眼瞓嘅話可以同我講嘛～」我對岑諾新講道，「唔洗死撐，你平時幾點瞓？」





「最遲都係2點幾，所以琴晚好眼瞓⋯」岑諾新點點頭

「你唔同我講？好想同我傾計咩？」我笑了一笑問道同時，感覺到自己嘅臉頰都有啲熱

「唔知呢⋯」岑諾新微微抬起下巴，輕輕一笑

我同岑諾新喺番同一個車站落車，佢先落車，然後回頭望向我朝我伸手，好似⋯有啲溫柔⋯

岑諾新望一望我，我微微側着頭，喺望到佢嘅瞬間，我嘅嘴角不禁上揚





「笑咩？」岑諾新輕輕一笑問道

「冇咩～」我搖搖頭，「只係⋯！」

前面嘅路口有一個好熟悉嘅身影行出嚟，同我先距離大約十步，我頓時鬆開咗岑諾新嘅手並將手收回

「媽？」我疑惑地望住手上拎住一袋袋嘅媽媽

「倩盈？你放學啦？」我媽見到我之後停喺原地一秒，然後朝我行過嚟

「哦，係呀。」我點點頭，我嘅心嚇到怦怦跳，「你唔洗番工咩？」

「今日我放半就呀，要買定多啲餸嘛～」我媽提一提手示意，佢嘅視線落喺企喺我身旁嘅岑諾新，「呢位係⋯」

「我、我朋友呀⋯！」我心中有啲慌張地對我媽講，但我仍然保持住自己外表睇起嚟平靜





「高大又靚仔，你男朋友呀？」我媽忽然間喺望一望岑諾新後又問道

「唔係，朋友咋⋯！」我頓時下意識就否認，抬頭望咗一望岑諾新

「阿姨你好。」岑諾新微微一笑對我媽講道

「你好。」我媽微笑着回答道

「我番去啦，聽日見。」岑諾新望向我面無表情地講道

「聽、聽日見⋯」我望住佢嘅反應，心裏有啲不知所措

岑諾新對我媽微微點一下頭然後就轉身走，我回頭望咗岑諾新一眼，佢好似有啲嬲⋯





我同我媽一齊番屋企，一番到屋企我即刻入房喺IG dm岑諾新

「啱啱對啱住⋯」我心中滿滿嘅歉意

佢會唔會都係嬲咗我？啱啱我鬆開佢隻手，仲要同我媽講佢係我朋友，嗰陣我嘅心都慌張都要跳出嚟一樣，什至我連望都唔敢望岑諾新一眼⋯

岑諾新好快就睇咗message，我一見佢Typing，心裏就更加緊張

岑諾新：唔緊要

「呀⋯死啦⋯」我不禁講道，明明佢答我一句唔緊要，但我嘅直覺卻話我知佢一定嬲咗我

「對唔住⋯因為我仲未同我媽講我拍緊拖⋯」我心急如焚地對岑諾新解釋

今次卻遲遲都收唔到岑諾新嘅回覆，平時佢都好快覆我⋯睇嚟今次，佢真係嬲咗我啦⋯





去到夜晚7點嘅時候，我聽到門鐘響起後出嚟開門，一打開家門就見到我爸著住西裝筆挺地企喺門前，手上拎住個公事包

「爸！」我高興地笑了笑

「你嚟啦？」我媽喺廚房行出嚟，「坐陣先啦，未有咁快有得食。」

「好。」我爸點點頭然後將大門閂上，然後換上拖鞋行到去梳化坐低

雖然我爸媽離咗婚，但我爸嘅拖鞋一直都喺度；我入去廚房酌咗杯水比我爸飲

「媽媽今晚煮嘅都係爸爸你中意食嘅餸呀！」我拎住水杯喺廚房行出嚟，「飲水。」

「唔該。」我爸提起左手將領呔扯鬆





我瞄到我爸左手嘅無名指上仍然帶住戒指，我媽冇帶，但係我媽頸上嘅頸鏈係我爸送比佢

有時我都唔明，佢地明明仲係相愛但點解要分開⋯就算宜家佢地一齊番，我都唔會覺得有咩問題

但佢地偏偏唔要，寧願偶爾見下面，但手上仲要帶住當初嘅結婚戒指，我都唔明佢地點諗⋯

「點呀？宜家喺學校忙唔忙呀？中五啦喎。」我爸飲咗啖水之後問我，「打算大學揀咩科呀？」

「Okay啦～都唔係真係好忙，都okay。」我坐低喺梳化嘅另一端，「大學呀⋯大學未諗呀，下年先再諗都唔遲。」

我望一望手機，手機一直都冇響過，岑諾新佢仲未覆我呀⋯




IG Link: https://www.instagram.com/nd_cotttoncandy/?hl=zh-tw