［愛情純愛］既然忘記唔到佢，不如試下中意我⋯？: 78. 你是在意嗎？

放學之後，我靜悄悄地背住岑諾新留喺課室等佢

「我要點樣同佢道歉先得呢⋯？」我坐喺自己嘅座位，望住黑板發呆，「同佢講對唔住嘅話，佢都只會答我唔緊要⋯」

我望住課室嘅時鐘，已經4點9啦⋯仲有45分鐘，岑諾新先放學⋯

「呀⋯點解我，要話佢係我朋友⋯」我伏低喺枱上不禁問自己

「躂、躂⋯」





忽然喺課室門口傳嚟兩聲腳步聲，我頓時抬起頭望，岑諾新⋯？

「你點解仲喺度？」企喺課室門口嘅岑諾新望住我

「我等埋你嘛⋯」我坐好起嚟，然後起身行到去佢嘅座位

「咪話咗唔洗等我。」岑諾新行番埋位拎書包

呢種冷淡嘅態度同語氣已經維持咗一整日，佢真係在意先會咁樣㗎係唔係？





「你咁早放嘅？補課⋯」我望住佢執嘢

「小測，做完可以走。」岑諾新好似連講多兩句都唔想一樣，直接講重點就算

我望住執緊嘢嘅佢，微微耷低頭，輕輕抿唇，我⋯有啲緊張⋯

「琴日嘅事，對唔住⋯」我嘅雙手放喺身前自然垂着，兩手合十扣着，深呼吸後講道，「我真係唔係特登要咁做，真係只係因為我冇同我媽講過我拍拖，所以先⋯」

「我知，你同我講咗。」岑諾新回頭望向我





「你係唔係在意，我話你只係我朋友，冇認你係我男朋友⋯？」我伸手拉一拉佢嘅衫角，「我唔係特登要否認。」

「我知，真係唔緊要。」岑諾新坐低喺枱邊，「我地本來都冇打算真係要做男女朋友。」

聽到佢咁樣講，我嘅心有啲難受⋯

「但我地講好咗㗎嘛⋯講好咗要中意對方㗎嘛⋯」我捉住佢嘅衫袖，「對唔住，都係我唔好⋯」

「唔緊要，真係。」岑諾新搖搖頭，「唔洗覺得係自己嘅錯。」

「呀⋯你就唔好嬲我嘛⋯」我捉住佢嘅手左右晃咗兩下，打算直接用撒嬌呢一招，「等到我地真係互相中意，真心中意嘅時候，我會⋯承認你係我男朋友⋯」

「原來，你唔承認我係你男朋友呀⋯？」岑諾新嘅臉上掛上淡淡嘅微笑

「只係未同我媽媽承認嘅意思⋯」我朝佢行近咗一步，「喺朋友嘅面前，我承認啦⋯」





「嗯⋯」岑諾新微微點頭

「仲嬲⋯？」我問道

「冇⋯」岑諾新嘅手輕輕地放到我嘅臉頰上，「冇嬲。」

「真係冇嬲？」我朝佢走近咗一步，再一次追問佢

本來打算起身嘅岑諾新聽到我嘅追問後又默默地坐番好，本來都已經挺直腰桿準備起身

「咁如果我話其實我有嬲，咁點？」坐喺度嘅岑諾新微微抬起頭望向企喺佢面前嘅我

「咁⋯」我一時之間唔知道要點答佢先好





「講笑，我冇嬲。」岑諾新輕輕一笑同時伸手摸摸我頭，然後又一次準備起身孭書包，「係唔係番去⋯」

我行前多一步，雙手搭喺佢膊頭上，我嘅心仍然有啲擔心，擔心佢嬲

「你本來有嬲㗎係唔係⋯？」我問道，我好想知道問題嘅答案

「你好在意我有冇嬲？」岑諾新嘅左手輕輕地搭喺我嘅後腰，將我朝佢嘅方向拉近咗一步，「呢個問題，重要？」

「當然重要⋯你係我男朋友嘛⋯」我望咗佢一眼

岑諾新冇答我，默默地安靜咗落嚟，本來望住我嘅佢悄悄地移開咗視線，微微耷低頭

見佢靜咗落嚟，我嘅心就更緊張，咁即係點呀？即係佢仍然因為我冇承認而嬲咗我⋯？定係諗緊點答我？

「少少。」岑諾新緩緩開口講道，臉帶着淡淡嘅笑容，「呢個係答案。」





呢個答案，係唔係代表⋯佢對我都，已經有一定嘅好感⋯？

我緩緩地靠近佢，就好似係無意識嘅舉動一樣⋯

岑諾新面對我嘅舉動，微微向後靠，佢下意識就迴避我

「唔⋯！」我窒咗一下，岑諾新佢阻止咗我嘅舉動，手輕輕地掩住我嘅嘴

「噓⋯」岑諾新緩緩鬆開手，將我拉近到佢面前，喺同佢好近嘅距離下，佢微微耷低頭將額頭靠喺我嘅膊頭上

我嘅心跳即刻就加快咗，我企定定喺度，感受住自己嘅心跳噗噗、噗噗咁用力跳動着

我對佢果然有某種程度嘅好感啦已經，我會怕佢嬲怕佢唔開心⋯





「咳咳⋯！」

課室門口忽然傳嚟兩下咳聲，我頓時望過去，岑諾新緩緩抬起頭望向門口

「你仲未走嘅？」楊朗然拎住筆袋行入嚟，「趁課室冇人又閂晒燈，你兩個偷偷摸摸做咩？」




IG Link: https://www.instagram.com/nd_cotttoncandy/?hl=zh-tw