［愛情純愛］既然忘記唔到佢，不如試下中意我⋯？: 53. 誰是你男友？

我望住岑諾新，佢移開視線唔望我，係因為叫咗我名而尷尬？

我第一次聽到佢叫我個名係冇連住姓氏，之前都唔會聽到佢咁樣叫我⋯

心跳⋯突然間變得有啲快、有啲強烈⋯胸口都因為心跳嘅變速而變得好似慢慢顫動，然而我好努力咁想保持自己嘅呼吸速度，想自己平靜啲

「你叫我⋯？」我突然間都有啲唔知點好嘅尷尬，只好露出笑容以掩飾我嘅尷尬

「你唔係叫倩盈咩？」岑諾新瞄咗我一眼





「我係呀⋯」我心中仍然有啲愕然，只係你突然間咁叫我，我有啲愕然，有啲唔知比咩反應好啫⋯

岑諾新邁步朝我走嚟，佢冇停低喺我面前，反而喺我身旁經過嘅同時一手拉起我嘅手

我成個人原地轉咗180度，然後比佢直接拉住走

突然間叫咗我一聲「倩盈」嘅佢，令我有啲緊張，心跳得好快

「岑諾新佢有咩好⋯」我喺心中問自己，「佢⋯會堅持送我番屋企，就算好似啱啱咁只係咁啱撞到，佢都會揀送我番屋企⋯」





以前同張景彥一齊嘅時候，佢好少會送我番屋企，可能因為我地住嘅地方都唔係真係好近，唔似我同岑諾新住喺同一區

「上次佢同孫慧伶⋯」我嘅腦海中忽然浮現出上次放學嗰陣見到佢兩個一齊搭巴士，「哈⋯」

我不禁無聲冷笑一下，原來佢唔係嫌我地住唔同地方，送嚟送去太麻煩，而係嫌比佢送番屋企嘅人係我⋯

中意唔中意，其實一早就好明顯，到底當初我堅持緊啲咩？明明我⋯一早就知道佢中意嘅人係孫慧伶，同我一齊只係因為我中意佢，我只係一個代替品⋯

哈⋯一個代替品，咁深情做咩⋯？好似傻仔一樣呢～





「突然唔出聲，好奇怪。」岑諾新忽然開口講道，「又諗緊啲咩唔應該諗嘅嘢？」

「咩呀⋯」我無奈地講道，「我可以諗啲咩唔諗得嘅嘢⋯？」

「例如關於張景彥之類？」岑諾新淡定地講道，但我心裏卻不禁一顫

佢識讀心術之類⋯？點解佢會知我諗緊同張景彥有關嘅嘢？

「果然。」岑諾新望住我，好似睇穿咗我一樣，心虛嘅我安靜地行喺佢嘅身旁

我緊緊地拖住岑諾新嘅手，佢嘅手比起張景彥嘅手仲溫暖⋯兩個人，都係心中冇我嘅人，點解會有咁大差別？

「又唔係諗啲咩好嘅嘢⋯」我細聲地嘟嚷道

「嗯？」岑諾新望向我，我搖搖頭





我同佢，安靜地行到番去我屋企樓下，我喺佢鬆開我嘅手前，我已經先將佢嘅手鬆開

「到啦，我番去啦。」我抬起頭望咗佢一眼講道，然後邁出向大堂走去嘅第一步，「嘩⋯！」

岑諾新用力地將我向後拉咗一下，我嘅背直撞上佢嘅胸膛，佢從後攬住我嘅腰，我嘅心因為突如其來嘅舉動而嚇得好似要跳出嚟一樣

「嚇、嚇死我⋯」我笑一笑後講道，「突然間⋯」

「唔好再諗佢，宜家，我先係你男朋友。」岑諾新用平淡嘅聲線講道，「你都太唔努力啦掛？」

「我邊有唔努力呀？」我反駁道

「一開始提出要中意對方嘅人係你，但係你又成日諗住佢。」岑諾新頓時講道





「講到好似你冇諗咁樣。」我笑道，「你妒忌？定係呷醋？」

「兩樣都唔係。 」岑諾新搖頭，語氣保持平淡，「以後可能就會係。」

「你⋯」我聽到佢咁講頓時窒咗一下，「你真係呀⋯你都係我男朋友啦，唔通我會走咗去咩⋯？」

「我又唔太擔心你會走咗去。」岑諾新將佢嘅雙手鬆開，我擰轉身面向佢，「而且，你都未有要同我分手嘅理由。」

「即係我之後就會有？」我聽到佢咁講後又不禁笑咗出嚟

「唔知，可能係我會有同你分手嘅理由都唔定。」岑諾新微微聳肩

呢個男人，真係捉摸唔透⋯！有時佢會突然間講啲霸道嘅說話，令我有啲在意、有啲心跳加速；有時佢又會講啲模棱兩可嘅說話，令我都唔知道要答佢咩好

「會係啲咩理由？」我有啲好奇，「你仲忘記唔到佢？」





「唔知，好難講。」岑諾新再一次聳肩

「放心啦，我會認真咁、努力咁好好留意你。」 我微笑道，然後瞇起雙眼，「你先要好好留意我嗰個呀！上次又偷偷地睹物思人，比我捉到啦！」

「我睹物思人？幾時？」岑諾新一臉疑惑

「上次喺籃球場呀～你望住人地個書包都望到入晒神咁，佢一番嚟你就走，唔洗唔認啦你～」我理直氣壯地講出前幾日發生嘅事

「睹物思人就冇啦，發呆就係真嘅。」岑諾新無奈地表示，「見到佢就走只係因為你都已經買完嘢飲，唔通唔走一直企喺度？睇嚟妒忌嗰個似係你多啲。」




IG Link: https://www.instagram.com/nd_cotttoncandy/?hl=zh-tw