［愛情純愛］既然忘記唔到佢，不如試下中意我⋯？: 54. 巧克力

「我地嘅關係，未到要妒忌嘅地步⋯」我降低咗聲量嘅同時悄悄地將視線移開

「哦。」岑諾新淡然地哦咗一聲，然後又道：「我會令你覺得妒忌。」

岑諾新都⋯太有自信啦掛⋯！？佢講到我一定會中意佢一樣

「睇、睇下點！」我比佢嘅自信嚇到，「我走啦！」

我轉身就走，到底岑諾新係抱住咩心態對我講呢番說話，佢就真係咁有自信？





不過，佢嘅冷靜、自信同偶爾嘅霸道，或者就係佢嘅魅力所在之處

⋯

「今個星期五就係情人節，係提高好感度嘅好時機呀！」詠妍一放lunch就對我講道

「情人節？今個星期？」我聽到詠妍講之後，先係一頭霧水咁望住佢，然後過咗兩秒，我嘅大腦總算loading完畢，「吓！？今、今個星期！？」

「係呀⋯」詠妍見到我嘅反應，有啲無奈地講道，「你唔知㗎咩⋯？」





「一時冇記起嘛⋯」我自己都有啲無奈，亦有一秒嘅慌張，「我好唔好親手整朱古力比佢？定係直接買一排朱古力比佢食會好啲？」

「親手整有心意啲。」詠妍邊睇手機邊回答道

「但我冇理由突然間喺屋企整朱古力⋯我冇同我媽講我拍拖⋯」我望住詠妍講道，「我又唔知佢中唔中意食⋯」

「你整咗比佢唔通佢唔食咩？」詠妍無奈地反白眼講道，「整嘅話份心意一定大過買，我覺得啫，你決定。」

岑諾新中唔中意食朱古力？不過佢中意食甜品嘅話應該都會中意食朱古力





我親手整朱古力嘅話，佢會唔會覺得我咁樣好細心？會唔會對我有啲心動？

「詠妍！有樣嘢想你幫我！」我捉住詠妍講道

⋯

星期四

「所以我話，點解你整朱古力比你男朋友要我上嚟陪你？」詠妍翹埋雙手企喺我隔離望住我整朱古力

「唔緊要嘛～如果我媽問起都可以賴你～」我笑一笑講道，「最多今晚留你喺度食飯啦～」

「呢個唔係問題。」詠妍無奈地講道，「諗到可以賴落我到你真係厲害⋯」

我拎住朱古力模提起小小再拍到枱上，消除氣泡同時可以令朱古力醬更加均勻，然後再將個朱古力模上下倒轉，將多餘嘅朱古力醬倒番出嚟





「你竟然一嚟就做雙層朱古力⋯佢真係好彩。」詠妍望住我整

雙層朱古力，外面簿簿嘅外殼係黑朱古力，內裏係牛奶朱古力，第一次整當然要花啲心思啦～

「仲要買個咁靚嘅盒放朱古力。」詠妍拎起我放咗喺一旁嘅朱古力盒

「情人節朱古力，當然要花啲心思。」我將朱古力模放入雪櫃，「雪半個鐘再倒牛奶朱古力～」

我同詠妍出咗去廳坐低喺梳化上，詠妍一坐低即刻就頹廢咁拎手機出嚟睇

「所以點解？點解我要陪你整？」詠妍懶得郁，只好抬眼望我

「當初提出叫我中意佢嘅人係你嘛～」我拎紙巾抹一抹手





「所以呢⋯」詠妍無奈地望住我，「所以我要陪你⋯？」

「我知道你唔介意嘅～我地係好姊妹嚟㗎嘛！」我即刻攬住詠妍，「最多比你食一粒啦～」

「仲要做白老鼠添⋯！」詠妍嘆咗一口氣，「有咩事嘅話我一定搵岑諾新算帳⋯」

喺朱古力外殼雪半個鐘後，我再倒入牛奶朱古力作為入面嘅餡，等到今晚再拎佢地出嚟放入盒，最後再等到聽日拎比佢就得啦～

⋯

翌日，2月14日，情人節

「你比咗朱古力佢啦？」詠妍行到嚟我嘅座位同時望向岑諾新

「未呀～」我搖搖頭，「我都冇帶番嚟～」





「吓？冇帶番嚟？」詠妍一臉驚訝，「咁你點比佢呀？」

「咁放學嗰陣我地會一齊走㗎嘛～」我笑一笑講道，我打算番到去先比佢，叫佢喺樓下等一陣，我上番去拎比佢

「哦～」詠妍好似鬆咗一口氣一樣，「我唔可以白白咁成為一隻白老鼠⋯！」

放學嗰陣，我同岑諾新一齊走，佢冇提過今日係情人節，亦一直都冇問我有冇整朱古力之類，睇嚟佢冇諗過我會整朱古力比佢食

「你喺度等我一陣。」我鬆開佢嘅手前對佢講道

雖然我見到佢一臉疑惑，但係我冇諗住即刻解答佢嘅疑惑嘅打算

我飛快地上番屋企，除低書包然後入廚房拎咗盒朱古力，之後又飛快地出門口落番樓下





我喺落到地面嘅時候，將盒朱古力收埋咗喺身後再行出去搵岑諾新

岑諾新就企咗喺原地冇行開，佢側住身企，一手插褲袋一手拎住手機睇

我輕手輕腳地行向佢，好想知佢會係咩反應呀！




IG Link: https://www.instagram.com/nd_cotttoncandy/?hl=zh-tw