［愛情純愛］既然忘記唔到佢，不如試下中意我⋯？: 52. 可可愛愛

「你今日咁樣咪幾好。」我衝口而出地對蔣倩盈講道

「嗯？咩幾好呀？」蔣倩盈一臉天真地望向我問道，「我今日做咩？」

「冇咩。」我笑一笑同時回答佢，「冇咩特別。」

「嗯？到底做咩呀？講一半唔講一半嘅⋯」蔣倩盈抬頭望住我，一臉好奇地講道，「到底做咩呀？我今日做咩幾好呀？」

我笑而不語，然後擰頭表示冇咩特別事，但似乎我啱啱講嘅嘢挑起咗佢嘅好奇心，佢一直望住我，右手拖住我，左手捉住我嘅手腕





「到底做咩呀？你話我今日咁樣幾好，即係咩幾好呀？」蔣倩盈追問道，感覺佢嘅臉頰上都刻住「好奇」兩個字，「即係我平時唔好呀？岑諾新？」

「平時都好。」我淡定地回答道，「日日都咁可愛。」

「你話我可愛？」蔣倩盈一臉驚訝咁望住我，手用力握咗我嘅手兩下，「我今日有特別可愛咩？」

蔣倩盈微微一笑，好似因為我話佢可愛所以有啲怕醜之類⋯？

「好少聽到有人話我可愛～」蔣倩盈嘅語氣好輕鬆，同笑容一齊喺佢臉頰上嘅，係淡淡嘅紅霞





咁樣嘅佢，的確有啲⋯可愛

「係唔係即係我今日特別可愛？」蔣倩盈又笑問道

「嗯。」我下意識地點頭

佢宜家成日都笑，總好過之前成日都喊嘅⋯女仔有時真係幾麻煩，但有時，都會有可愛嘅一面

X⋯X⋯X





「好啦，我繼續直行啦～」我對岑諾新講道同時指一指前方

嚟到十字路口，就係我同岑諾新分開嘅時候，佢嘅屋企喺呢邊，我嘅屋企要再行前先到

「拜拜～咦⋯？」我提起手同佢揮揮手，本來以為佢會轉彎行入去，但佢仲行緊喺我隔離，「咦咦？你做咩直行？」

「我平時都係同你行到番去先。」岑諾新望咗我一眼，淡然地講道

「嘻嘻⋯」我不禁一笑，咁樣嘅岑諾新的確幾好，佢冷淡冷酷嘅一面

「笑咩？」岑諾新見到我笑便問道

「冇咩～」我望住佢笑着搖頭，「你真係，好識得拉好感度～」

「有咩？」岑諾新嘅嘴角微微上揚，「我冇特別要刷你嘅好感度，不過都多謝你嘅好感。」





「咩呀⋯！」我因為佢咁講而窒咗一下，「我冇話對你有好感⋯！你諗多咗啦！」

「冇好感嘅話仲同我一齊？」岑諾新就好似明知故問一樣故意問道

「想拖住先㗎咋～」我開玩笑地講道，雖然當初一齊嘅時候都唔係因為中意對方而一齊，「你對我都冇好感啦，咁仲同我一齊？」

岑諾新望向我，嘴角小幅度地微微上揚着，然後伸手輕輕地拍咗我嘅頭頂兩下

「唔知。」岑諾新回答咗兩個字，到底係答緊前面嘅句子定係後面嘅提問？

「唔知」⋯引人聯想更多嘅兩個字，岑諾新真係好識拉好感度

佢對孫慧伶係唔係都係咁樣？曾經佢都會對孫慧伶講呢啲「拉好感度」嘅說話？佢冷酷嘅一面，孫慧伶係唔係都睇過啦⋯？





咁樣嘅話，我咪顯得唔夠特別⋯

「你咁大力捉住我做咩？驚我盪失路？」岑諾新問我

「呀⋯？」我愕一愕然，原來我不禁加大咗握住佢手嘅力度，「冇心㗎冇心㗎！不過都怕你會盪失路～」

我抬頭望向佢笑一笑，放鬆番拖住佢嘅力度

「盪失路唔洗驚㗎～姐姐帶你去搵警察叔叔～」我調皮地開玩笑講道，伸手拍一拍佢嘅膊頭

「我諗我直接打比媽媽會好過去搵警察叔叔。」岑諾新淡淡地回答道，然後微微耷低頭望住我，「而且，點解你係姐姐？我生日早過你，計番條數嘅話，你叫我哥哥先合理。」

「我地同年出世㗎！」我講道，「而且你大我幾多啫！你生日都係早我10日咋嘛！」

「所以咪啱，叫聲哥哥啦。」岑諾新伸手摸摸我頭





「你咪有個妹囉！」我反駁道，「佢日日都叫住你哥哥啦！仲唔夠？」

「你同佢一樣咩？」岑諾新輕輕一笑後問道，「佢真係我個妹。」

「哼！」我哼咗一聲然後撇開臉唔望佢，「我先唔要叫你哥哥呀！我要直接叫你岑諾新！就係中意直接叫你個名！」

我鬆開佢嘅手，自己行喺前面，岑諾新冇即刻捉番住我，而係由得我，不過其實我都只係行前咗兩三步嘅距離，唔係真係直接走咗去

「倩盈⋯！」我聽到岑諾新降低咗聲量，但以我聽到嘅聲量叫咗我一聲

我頓時停下腳步，心裏愕一愕然，緩緩地回頭望向佢，毫不掩飾臉上嘅愕訝異表情

啱啱⋯岑諾新佢啱啱⋯叫我咩話⋯？








IG Link: https://www.instagram.com/nd_cotttoncandy/?hl=zh-tw