［愛情純愛］既然忘記唔到佢，不如試下中意我⋯？: 46. 宣示主權？

「仲要掛個咁可愛嘅公仔～」楊朗然伸手捉住我掛喺書包上嘅企鵝，「蔣倩盈要你掛㗎啦肯定～哎～開始宣示主權啦～」

宣示主權？我地級有邊個唔知道我同佢一齊緊？冇咁嘅必要呀完全，而且佢冇講過要我掛上袋

「唔係呀，佢都有一個同款嘅公仔。」我淡定地對楊朗然講道，「冇特別要宣示主權之類。」

「你冇想話比人知佢係你嘅之類嘅想法咩？佢係唔係真係你女朋友嚟？」楊朗然忽然間拋出一句，令我有啲錯愕

「吓⋯？」我下意識地假裝自己聽唔明佢講緊啲咩，「佢又點會唔係我女朋友。」





嚇到個心都差啲離一離⋯佢咁樣講一講，我如果再講錯啲咩就好容易穿煲，所以最快嘅方法就係一嚟就扮唔知佢講緊啲咩

嗰日完全冇猶疑過就買咗呢個公仔，同佢一人一隻，唔⋯冇咩好特別嘅原因，只係覺得第一次作為約會出街，買少少嘢作為見面禮一樣比佢都唔算啲咩大事

我同楊朗然啱啱行到課室門口，蔣倩盈就從廁所嗰邊迎面行嚟

「早晨！」蔣倩盈對我微笑着講道

「早—」「早晨～」





楊朗然比我仲快，什至打斷咗我，蔣倩盈望住楊朗然嘅眼神中有一絲愕然閃過

我直接行入課室，蔣倩盈行到我身旁同時，我感覺到我個書包重咗少少，有嘢拉住我一樣

「咦，你都掛咗喺書包呀？」蔣倩盈捉住個公仔，跟喺我身後行

「哦係呀。」我番到埋位將書包除落嚟

「我都掛咗喺書包～」蔣倩盈回頭指一指自己嘅座位，「仲以為你唔會掛添～」





「蔣倩盈你終於察覺到可能有危機，要買呢啲可愛嘢嚟宣示主權啦～」楊朗然坐低喺我後面嘅座位，書包一下打橫放喺枱上

「個公仔係佢比錢㗎～」蔣倩盈好似推卸責任一樣指住我，「所以唔係我買～係佢買㗎～」

「原來係你～」楊朗然拍一拍我，「宣示主權呀～唔洗怕羞喎～」

「冇怕羞嘅必要囉好唔好⋯？」我無奈地講道，「亦唔係為咗要宣示主權。」

我同蔣倩盈對望，面對住楊朗然嘅猜測，我地都不禁一笑

如果我係真係為咗宣示主權而買，咁即係我都已經真係中意咗佢，但現階段嚟講，只可以話係「培養中」又或者係「了解中」

「只係因為個公仔好可愛，所以先買咋～」蔣倩盈企喺一旁解釋道

「一對就一對啦～明嘅明嘅～」楊朗然比出一個Okay手勢，「情趣呢啲嘢～」





我望一望蔣倩盈，自從佢提出咗「試下中意對方」呢個提議之後，佢一直都好似好努力咁想令自己中意我

佢嘅行為都變得主動好多，最近連提都唔會提起張景彥，一句都冇提過，都唔知要話佢努力克制自己定係太刻意⋯

X⋯X⋯X

放學後

今日好特別地，我同岑諾新一齊留咗喺課室做功課，我都唔知點解無端端放咗學唔番屋企要留喺課室

事源就係今日晏就同岑諾新食飯嗰陣講起⋯

「我好似成日都留喺課室做功課咁，一番到屋企做功課就唔自在。」我講道





「今日留低喺學校做完功課先番去。」岑諾新講道

然後我地最後就莫名其妙咁留咗喺學校做功課

岑諾新坐喺我隔嗰個位，我將枱拍咗過去，好似喺小學之後就冇再試過拍枱坐

我望向岑諾新，佢正經地拎住原子筆做功課

因為風扇吹嚟嘅微風將佢嘅頭髮微微吹郁，著住白裇衫嘅佢將衫袖摺起，手下意識提起輕輕地撥一撥頭髮

「蔣倩盈，知唔知呢題⋯」岑諾新嘅筆指住題目望向我，「蔣倩盈？」

佢嘅筆喺我額頭試輕敲咗一下，我回過神見佢望住我

「嗯？」我微微一笑問道





「諗緊啲咩諗到入晒神？」岑諾新問道，「諗緊⋯張景彥？」

「唔係呀～我呢幾日都冇點樣諗起佢⋯」我頓時搖搖頭，「最近過得太開心，所以都冇咩諗起佢⋯」

「你咁講，我可唔可以理解做同我一齊開心？」岑諾新嘅臉上掛上淡淡嘅笑容

佢咁樣問，令我覺得，好似喺我努力令佢中意我同時，佢都努力咁令我中意佢

「唔知呢～」我笑咗一笑回答道，都唔可以話完全故意咁答呀～

我唔可以每一刻都當佢係我男朋友咁樣相處，咁樣嘅話可能，會更加容易心動起嚟

「咁你同我一齊，開唔開心⋯？」我反問佢同時，將手垂落嚟，偷偷地用食指勾住佢嘅尾指





我抬眼望佢，佢拎住原子筆嘅右手托住下巴，微微將頭擰過嚟望住我




IG Link: https://www.instagram.com/nd_cotttoncandy/?hl=zh-tw