［愛情純愛］既然忘記唔到佢，不如試下中意我⋯？: 45. 正式約會（下）

「我想食⋯想食⋯想食⋯」我努力地思考着自己想食啲咩，人生最大難題大概如此，忽然間我靈機一動，「想食香香雞！」

「好。」岑諾新對我微微一笑

雖然岑諾新成日都冷冷淡淡咁，不過我覺得佢咁樣都唔係壞事，至少唔係口花花嘅嗰種男仔

有啲冷淡、有啲成熟、有啲穩重⋯大概係一個可靠嘅人

「你食唔食？」我將袋炸雞粒遞到佢面前，順手地將一枝竹籤遞比佢，「我叫咗多辣粉。」





岑諾新默默地拎起竹籤食咗一件，對我點點頭，我對佢笑咗一笑

我地企喺一旁食嘢，打算食完先再行，岑諾新一手拎住竹籤一手拎住手機睇

我企喺佢對面，手捧住裝雞粒嘅紙袋

「今日我地完全冇講過關於前度嘅事～」我心裏有啲開心，覺得自己邁出咗一步

「小心小心～」





一把低沉嘅男人聲傳嚟，我望過去見到一個著住短袖衫嘅男人推住手推車行緊過嚟，我連忙向前行一步

我先啱啱邁步，腳踭落地，岑諾新一手就捉住我將我朝佢拉去

等到手推車過咗之後，我微微抬起頭望佢，佢緩緩鬆手，將竹籤放入紙袋中

「動作好快⋯」我喺心中不禁講道

佢啱啱好快手就將我拉埋去，完全冇猶疑





「食完啦？」岑諾新問我

「嗯，食完啦。」我點點頭，拎住紙袋行去離我地唔遠嘅垃圾桶掉

我同岑諾新又再喺附近行，隨便行下唔同地方咁，畢竟都冇咩特別想去嘅地方

「你有冇想去嘅地方？好似淨係陪我行咁⋯都冇同你行你想睇嘅嘢⋯」我有啲唔好意思地問岑諾新，「你有冇邊度想行下呀？我可以陪你去！」

「冇咩邊度特別想去⋯」岑諾新諗咗一諗後回答，「你唔洗覺得唔好意思。」

「真係冇？真係？」我認真地追問道，「有嘅話你真係可以同我講。」

「真係冇。」岑諾新望住我不禁一笑

我唔知岑諾新佢係真係冇咩地方想去定純粹唔好意思同我講，畢竟第一次約會，唔多唔少都會有啲緊張





同之前同佢一齊出去食嘢嘅感覺好唔同，今日大概係認真嘅約會模式，之前就好似係同一個普通朋友一齊出去一樣

今日我地一齊食埋晚飯先番屋企，佢同平時一樣將我送到番去屋企樓下

「今日好開心！我地星期一見啦～」我同岑諾新講拜拜，行咗一日都已經有啲攰

「嗯，星期一見。」岑諾新微笑道

我轉身朝大堂行去，行咗兩步我記起咗啲咩好重要嘅事，我頓時回頭

「岑諾新⋯！」我將岑諾新叫住，本來已經轉身走嘅岑諾新停落嚟，回頭望向我

我走向佢，行到佢嘅面前停低





「今日，我地未攬⋯」因為手無處安放，所以只好輕輕地雙手尾指扣着

岑諾新微微一笑、點一點頭，然後張開雙臂輕輕地攬住我，作為今日約會嘅結束

好似唔知由幾時開始，每一次佢送到我番嚟，分別嘅時候，我地都會輕輕攬一下，好似已經成為咗一個習慣

「星期一見，今日好開心。」岑諾新微微耷低頭對我講道

佢輕拍咗我後腦勺兩下，然後鬆開咗手，今次我真係轉身入大堂

我除咗鞋之後直接行入房，拎出嗰個放咗喺袋入面嘅公仔，轉身行到書包前蹲低，將個公仔扣喺書包嘅拉鍊上

「一對⋯」我望住公仔時不禁諗道

X⋯X⋯X





今日同平日有啲唔一樣，今日我冇同蔣倩盈一齊番學，冇咩好特別嘅原因，單純地因為我遲咗起身，唔知邊個幫我拍熄咗個鬧鐘，搞到我遲咗起身

「新！」

忽然有人大聲咁叫我，我頓時回頭望，見到楊朗然小跑着跑向我

「早晨呀喂！」楊朗然捉住我膊頭晃咗兩下

「早晨⋯」我見到佢一臉興奮咁，心裏唔知點解有啲無奈

「我差啲都認唔到你！」楊朗然鬆開捉住我嘅手同我並排行

「點解⋯？」我疑惑地問，總覺得佢又要開始講啲咩令人疑惑嘅事





「我本來打算上嚟拍你，但見到你個書包掛咗個好可愛嘅公仔！我即刻就猶疑咗一下到底係唔係你！」楊朗然激動地講道，仲特地後仰望向我書包，「你不嬲都唔掛呢啲嘢喺書包㗎⋯」

「哦⋯」一時間我都唔知可以比啲咩反應佢先係




IG Link: https://www.instagram.com/nd_cotttoncandy/?hl=zh-tw