［愛情純愛］既然忘記唔到佢，不如試下中意我⋯？: 47. 生氣了？

「開心。」岑諾新好似冇掩飾嘅打算，雖然我唔知佢係講大話定講緊真心話

對於佢嘅答案，我半信半疑，都唔知佢講真話定講客套說話

「大家咁熟，可以講真話啵～」我側着身面向住佢坐，左手放喺枱上托住腮，「畢竟都聽過咁多秘密，唔差在～」

「你唔信我？」岑諾新笑咗一笑，左手輕輕握住我隻手，我嘅手搭喺佢嘅手心上，「我冇講大話嘅必要。」

「哦～」我微微一笑點一點頭，「冇諗起佢咩？」





我咁樣一問，岑諾新就靜咗落嚟，悄悄地將視線移開⋯

原來佢有諗起佢

「唉～」我無奈地嘆一口氣，然後將手抽回，坐番好個人繼續做功課

「喂喂⋯」岑諾新側着頭壓住右手手臂伏着，左手越過兩張枱之間嘅邊界搭到我張枱上，指尖戳咗我嘅手一下，「你會唔中意？」

我邊有得揀中意定唔中意？我有得揀㗎咩？我又唔係真係你女朋友⋯所以我冇得話唔比你諗，只係⋯





「喂張景彥！你仲唔落去籃球場？等你呀大哥！又話見完阿sir之後到！」

喺走廊又人大叫道，然後朝後面樓梯跑去

我默默地將視線落喺課室窗外嘅走廊，明明知道佢唔會經過呢度，但都係忍唔住一樣望咗出去

「咳！」岑諾新咳咗一聲，好似提示緊我唔好再望一樣

我收回望住外面嘅視線，將視線落喺岑諾新嘅身上，岑諾新耷低頭做功課，就好似冇事發生過一樣





我再瞄咗一眼出面，外面冇任何人經過，我就好似仍然抱住一點期望一樣望向外面

「咳咳！」岑諾新今次咳咗兩聲

「做咩呀？你唔舒服呀？」我望向佢，佢仍然一臉正經咁做功課，心裏有啲想笑，但我都係努力地忍落嚟，認真地望住佢，「洗唔洗飲水？」

岑諾新面無表情地瞄咗我一眼，又默默耷低頭做功課

「你啱啱係唔係有功課嘢想問我？」我將話題轉移到功課上

「冇嘢啦。」岑諾新淡淡地講道

我瞄到佢份功課上有一題漏空咗，睇嚟佢啱啱就係想問我呢題，我不禁一笑，傲嬌啲咩啫～

「比我睇下～我可能識做呢～」我朝佢本功課簿伸手





「唔要⋯我陣間諗下都會識。」岑諾新好似發脾氣一樣，故意唔望我

因為我啱啱望咗張景彥⋯？因為我冇守承諾？

岑諾新故意將本簿移開咗少少，本來我嘅手指都仲掂到本簿，宜家真係完全掂唔到啦⋯

「比我睇下嘛～我教你呀～」我強忍住笑意，將手再伸長啲去拎本簿

今次岑諾新將本來仲掂住掂邊嘅簿直接成本抽起，我成隻手貼住張枱伸到最長都冇用

「喂！你睇少我呀！」我將我張櫈朝佢拉近咗半格

「都話唔洗。」岑諾新偏要同我鬥氣，死都唔放番本簿過嚟





「陣間你又唔識做就唔好啦～」我笑咗一笑，雙手放喺大腿上坐好，「係唔係？最多我唔同你爭啦～你比我睇下啦～」

岑諾新半信半疑地望住我，拎住功課簿嘅右手緩緩地收番番嚟，我偷偷地瞄咗佢手上嘅簿一眼，打算趁佢唔為意一下子拎過嚟

「你就比我睇下啦！」我講嘅同時一下子向佢嗰邊側身伸出左手想去拎本簿

但岑諾新嘅反應仲快過我，好快就側過身避開咗我，但我都蠢唔晒，一下子就捉住咗佢嘅手

「嘻⋯我就話⋯！」正當我想讚自己叻嘅時候，我一抬頭，發現我同岑諾新靠得⋯超、近！

今次我真係愣住咗，因為唔係有心理準備嘅靠近⋯岑諾新都愣咗一下，下意識地微微向後靠

我同佢嘅視線對上，我定睛地望住佢，佢亦定睛望住我

我嘅心跳，加快咗⋯都唔知係因為冇心理準備嘅靠近定係因為開始有中意嘅感覺⋯





心跳嘅聲音直接喺我體內迴響，直接傳到我嘅耳中，今日嘅心跳，格外響亮

岑諾新嘅左手捉住我嘅手肘將我扶住，我眨一下眼，回過神，頓時坐番好

「所以我話比我睇嘛⋯」我微微鼓起兩泡腮

岑諾新收回手，將功課簿放番喺枱上

「嗱。」岑諾新右手托住下巴，左手將本簿遞比我

我接過佢本簿望一望，然後打開書指一指個答案大概出現嘅位置，再將本簿比番佢

「所以你嬲咩⋯」我將放喺自己面前嘅功課簿合上同時問道





「冇嬲。」岑諾新將最後一道空咗嘅題目答案寫上，然後將本簿合上

「真係？」我望住佢問道，「冇嬲？」

「做咩要嬲？」岑諾新將枱上嘅嘢執好放入書包，「冇嬲嘅必要。」

但我明明就感覺到佢好似有啲嬲咁⋯

「喂⋯」我將書包放到枱上同時叫咗佢一聲，只見佢默默地孭起書包，「你唔理我呀？」




IG Link: https://www.instagram.com/nd_cotttoncandy/?hl=zh-tw