［愛情純愛］既然忘記唔到佢，不如試下中意我⋯？: 03. 我怎知道！？

「點解係疑問句？」岑諾新無奈地笑咗一笑，「你幫我決定啦！」

「好啦～」我笑一笑之後，便轉身同詠妍一齊離開課室落去買嘢飲

一離開課室，我嘅笑容便收起嚟，反正都只係要喺大家面前做戲

我買咗一包蜜桃茶一包檸檬茶，蜜桃茶係我飲嘅，檸檬茶，比岑諾新啦

「喺度食埋先番上去～」詠妍直接就搵咗個位坐，我拎住兩包嘢飲坐低喺詠妍對面





我望住詠妍拆開膠袋食嘢，我則將飲管拆咗出嚟，先飲蜜桃茶

此時走嚟兩個女仔，兩個女仔坐低喺我同詠妍身旁，我同詠妍都望一望佢地，佢兩個係我地嘅同班同學

「你地唔番上去食？」坐我身旁嘅女仔問道，佢手上拎住袋魚蛋

「唔啦，喺度埋先上去～好餓。」詠妍笑一笑後又繼續食嘢

我托住頭拎住包蜜桃茶，望住詠妍食嘢





「你買兩包嘢飲嘅？溝埋嚟飲唔驚肚痛呀？」住喺詠妍旁邊嘅女仔望住我手上嘅蜜桃茶同放喺我面前嘅檸檬茶

「包檸檬茶買比岑諾新㗎～」詠妍望住我意味深長地笑道

「哎喲～」「哦～」

嗰兩個女仔同步地望住我笑起嚟

「你兩個好閃囉真心～」坐我隔離嘅女仔叫張希童





「真係呀！」坐喺詠妍隔離嘅李樂恩望住張希童點頭和議，「佢兩個真係好閃～」

詠妍望住我偷偷地笑起嚟，我都唔知可以比咩反應好，因為一切都係假㗎

「係呢係呢～」張希童擺出一副好奇嘅模樣望住我，「有啲好奇蔣倩盈你中意岑諾新啲咩？」

我愕一愕然，詠妍都望住我，佢已經準備好要食花生

「唔⋯」我假裝諗緊自己中意岑諾新嘅原因

我點答你呀！你想我點答？「中意一個人係唔需要理由」咁呀？我同岑諾新都唔係真係因為中意對方而喺埋一齊

我可以點答你我中意佢啲咩⋯？一個連我自己都冇諗過嘅問題，我一時三刻要講啲咩⋯

「我中意岑諾新⋯」我仍然好努力咁諗緊，重複一次問題嚟爭取一下時間，「我中意佢笑起嚟好好睇⋯中意佢喺我面前唔同嘅一面⋯中意佢冷酷好cool嘅一面⋯囉～」





「囉？」張希童聽到我嘅尾音，不禁笑咗出嚟，「你做咩講得咁唔肯定嘅？」

我答得咁猶疑，因為我都唔係中意岑諾新，我點知我「中意」佢啲咩

但我講出嚟嘅point都只不過係事實，佢笑起嚟真係好睇，cool cool嘅時候都好睇，而我又真係見到佢其他人見唔到嘅一面

「Okay啦～我都唔太留意佢嘅～」我尷尬地笑道

「咁佢中意你啲咩？」張希童追問道，今次我更加唔知要點樣答佢

「呃⋯」我又靜咗落嚟

我望向詠妍，佢望住我揚後暗暗一笑，眼神加上表情，完全係話比我知佢等緊食花生，想睇我點答





「我點知佢中意我啲咩⋯」我尷尬地回答道，「我都冇問過佢⋯」

「吓～你地一齊咗幾耐呀？唔係正常都會問㗎咩？」李樂恩感到疑惑

「一齊咗三個月⋯」我就好似普通人一樣回答，唔可以比佢地聽到有破綻

「你唔想知佢中意你啲咩咩？」李樂恩上身前傾，從佢嘅肢體中我可以得知，佢對呢個問題好感興趣，比我呢個當事人更感興趣

「不如去問下佢！」張希童激動地捉住我隻手講道

「吓、吓？」我有啲慌張

點樣拒絕佢好？如果宜家上去問嘅話，我同岑諾新一定好尷尬，但太尷尬嘅話會唔會好明顯、好奇怪？

「行啦！」詠妍笑了笑，故意講道，我不禁瞪大眼望住詠妍





「行啦行啦！」張希童拉我起身，拉住我跑上去課室

我比張希童拉住我跑，詠妍同李樂恩跟喺後面跑

呀⋯！點呀宜家？點先可以推咗佢？

「真、真係去呀？」喺上樓梯嘅時候我問道，我拉住張希童想拖時間，「好尷尬喎～」

「行啦～唔洗驚喎～」李樂恩雙手搭住我膊頭，然後推我行上樓梯

我、我唔係驚呀⋯！而係⋯！

我都未講得出啲咩，就比張希童拉住、李樂恩推咗入課室





「唔、唔好啦！」我對張希童佢地講，回頭望向詠妍，詠妍只係聳聳肩

佢地將我拉到去岑諾新嘅後面，同岑諾新對住企嘅楊朗然望到我地，然後同岑諾新唔知講咗啲咩之後，岑諾新回過頭來望




IG Link: https://www.instagram.com/nd_cotttoncandy/?hl=zh-tw