［愛情純愛］既然忘記唔到佢，不如試下中意我⋯？: 04. 他的「祝福」

「做咩？」岑諾新問我

「冇嘢。」我搖搖頭，望住岑諾新

「岑諾新你中意蔣倩盈啲咩？」張希童直接就問道，「我地問咗蔣倩盈㗎啦～不過當然要知埋你中意蔣倩盈啲咩啦～」

岑諾新望向我，嘴角微微上揚，我一臉無奈仲要苦笑起嚟，岑諾新望向張希童同埋李樂恩，我都唔知點解成件事會發展成咁

「你唔想知咩？」詠妍企喺我身旁問我，下巴靠喺我嘅膊頭上





「唔想⋯」我好快就回答咗佢嘅問題，「我知嚟做咩啫？」

「我地咁friend，你唔介意我地問嘅～」張希童望住我問道

我有得介意咩⋯朋友嘛⋯咁我同張希童同李樂恩都係幾friend嘅，雖然冇詠妍咁friend

「唔緊要嘅⋯」我微笑着講道，但心中只有無奈

我望住岑諾新，岑諾新望住我，佢似乎睇到我眼中嘅無奈，默默地笑咗一笑





「你真係答咗佢地？」岑諾新問我

「佢答咗啦～你驚佢唔答但要你答呀？」李樂恩笑一笑講道

喺佢地耳中聽起嚟，岑諾新問嘅嘢就好似係想知道我有冇答佢地，定只係叫佢答但我冇講；但喺我耳中聽起嚟，我知道佢嘅意思係「你真係諗到嘢答佢地？」；我望住岑諾新點點頭，佢點點頭表示明白知點做

「你中意蔣倩盈啲咩？」張希童問岑諾新

「中意佢⋯」岑諾新邊望住我邊諗，我嘅心中只有無奈，得其他人先興奮，但我一啲都唔興奮，「唔知喎，冇諗過呢個問題。」





岑諾新做得好！不過搞到我啱啱答咗佢地好似好傻仔咁添

「吓～」張希童同李樂恩一臉訝異

「可能中意佢⋯夠可愛？」岑諾新嘅回答係疑問句嚟

「點解係問句？」詠妍不禁笑起嚟問道

「因為我都冇諗過呢個問題。」岑諾新聳聳肩，「中意就中意㗎啦，可以有咩理由？而且，中意一個人要理由㗎咩？」

大家聽到都興奮地起哄，大概只有我同佢兩人唔太在意，有啲似置身事外一樣

⋯

我就好似平時一樣，等埋岑諾新先走，情侶大概都係會咁樣做





「你等佢呀？」詠妍行到我嘅座位前問道

「嗯。」我點一點頭，望一望岑諾新，佢仲執緊嘢，「不嬲都等埋佢⋯」

「好啦，我只係再問下。」詠妍聳肩一下，然後轉身同張希童佢地一齊走，「下星期見啦！」

我望住詠妍同張希童、李樂恩離開嘅背影，心裏有啲羨慕

「我都好耐冇同朋友一齊走過⋯」我喺心中默默地講道，視線落喺岑諾新身上，「不過⋯」

不過，我怕⋯

「咦⋯？」我偶爾望到自己嘅手心邊污糟咗





應該係啱啱上堂用鉛芯筆寫嘢，手又抹咗落去整到黑黑的

「岑諾新！」我行到去岑諾新嘅座位前，佢正準備孭起書包，「我想去個toilet，你等我～」

我對佢笑一笑後行出課室，反正都唔趕，去個toilet洗個手先再走都唔遲～

我去到toilet洗一洗手，然後好快就行出去番課室，仲要番屋企呢～

我啱啱踏出洗手間，一個男仔朝我迎面行嚟

張景彥⋯！

「倩盈⋯」佢輕聲地叫出我嘅名

我不禁停喺原地，心裏有啲慌，但我都係強擠出微笑；宜家我臉上嘅微笑，一定好難睇⋯





「嗨～」我故作輕鬆地同佢打招呼，「你去toilet呀？」

「係呀⋯」佢見到我嘅微笑後怔了怔，然後微微點頭，「聽講你⋯同咗岑諾新一齊⋯」

「哦⋯係呀⋯」我點一點頭，努力地撐着微笑

「見到你冇事就太好啦！」阿彥朝我一笑，我睇得出佢臉上掛着一個真心嘅笑容，「我仲擔心⋯」

「唔會～」我唔想再聽佢繼續講落去，頓時打斷佢，「我唔緊要啦～你同佢一齊，都好開心呀～」

我努力地撐起嘴角，但我嘅嘴角卻同我嘅雙手一樣，微微地顫抖着⋯

「你同佢一齊開心就好啦～」阿彥衷心地祝福我一樣講道





「嗯嗯！」我頓時回答，什至都唔想去望佢臉上到底係咩表情，「我番去先啦～佢等緊我！」

我冇聽阿彥嘅回答，直接朝課室行去，岑諾新孭住書包坐喺自己嘅枱上，拎住手機把玩着

我急步行番埋位，孭起書包

「行啦～」我喺孭起書包同時講道，然後朝門口走去




IG Link: https://www.instagram.com/nd_cotttoncandy/?hl=zh-tw