［愛情純愛］既然忘記唔到佢，不如試下中意我⋯？: 02. 「男朋友」

當分手後見到佢好快就拖住咗第二個，當下真係覺得自己就好似被世界所遺棄一樣，但我卻喺呢個時候，遇上咗同我一樣「被世界所遺棄」嘅人⋯

「想喊就喊。」喺我靠喺佢膊頭上嘅同時佢對我講道，「唔會笑你。」

「呿⋯邊個要喊⋯」我細細聲地抱怨一樣講道

⋯

翌日





我望向岑諾新，佢同佢班朋友一齊，佢臉上又掛上開朗嘅笑容，喺人前嘅佢就係咁開朗嘅一個人

「成日都要咁樣笑⋯好攰⋯」我托住腮望住佢，喺心中默默地講道

岑諾新偶然望向我呢邊，我同佢嘅視線對上，佢朝我笑咗一笑

「哦～」「閃死人啦閃死人～」

佢班朋友見到我地對望着，頓時就喺旁邊起哄，我無奈地耷低頭一笑





「你真係要繼續同佢一齊呀？」一把聲音從我耳邊傳嚟

我朝聲音嘅方向望去，見到余詠妍彎着腰企喺我身旁，微微側着頭望住我

喺班上面大概只有佢知道成件事嘅來龍去脈，因為我淨係同咗佢講，講晒成件事比佢知

「同佢一齊幾好呀～」我托住頭，望住詠妍行到我前面嘅位置坐低

「幾好？」詠妍挑眉，一臉疑惑咁望住我，「真心咩？」





「嗯。」我點點頭，望向課室門口同時，見到張景彥從我地班嘅課室門口經過

我默默地收回視線耷低頭，張景彥就好似我心中嘅缺口一樣，每一次望見佢，我都會跌入去，個心空盪盪的⋯

「你同佢一齊，唔後悔？」詠妍側身坐，手放喺我嘅枱上托住腮，背住岑諾新嗰邊坐

「有咩好後悔⋯？」我回答嘅時候有少許猶疑，但我都係微微一笑地回答道，「岑諾新幾好呀～」

岑諾新幾好呀～有人了解自己心中所想，有人明白自己，唔係一件好事咩？

至少喺我想喊嘅時候，佢會明白我嘅難受，借個膊頭比我倚靠，都幾好呀⋯

「除咗喺佢心入面嘅人唔係我之外。」我側着頭望住詠妍講道，「不過，我心入面嘅人都唔係佢。」

同張景彥分咗手四個月，同岑諾新「拍咗拖」三個月，張景彥仍然係我在意嘅人，佢嘅一舉一動都會觸動到我嘅神經；就好似喺岑諾新眼中，孫慧伶嘅一舉一動一樣





表面係情侶嘅我地，實際上都只係對方嘅水泡罷了，唔⋯用水泡都唔太貼切，應該話我地係同路人，明白對方所想所以一齊

偶爾成為對方嘅樹窿，聽對方嘅心事，愛得深傷得深，一個擁抱一個吻，對我地嚟講只不過係一個安慰，排解對方心中嘅難受同空虛寂寞凍

「聽起嚟，就好似係渣男渣女嘅故事⋯」詠妍對我講道

我聽到後笑咗一笑，的確，聽起嚟就好似渣男渣女嘅故事一樣，不過成功嘅人先叫「渣男渣女」，我同岑諾新，只係「失敗者」

渣男渣女，我做唔起，再講，我地係心甘情願咁做對方嘅水泡，我冇挽佢，佢亦冇欺騙我嘅感情

可能有人會覺得我地咁樣同炮友有咩分別，分別就真係大啦！

我地一齊咗三個月，做過最親密嘅事就真係得kiss，平日都只係拖個手、攬一下，我地冇做過更親密嘅事





「不過你同佢一齊開心就好啦⋯」詠妍放棄勸我，淡淡地講道，「見你同咗佢一齊，好似又幾好咁。」

我望向岑諾新嘅方向，佢同佢班朋友一齊，我諗我地一齊分擔，總好過一人承受

「但你同佢要一齊幾耐？冇可能一直喺埋一齊。」詠妍問咗一個我從來都冇諗過嘅問題

我托住腮沉默落嚟，我喺心中思考着詠妍問嘅呢個問題

講真，我真係，從來都冇諗過呢個問題⋯要同岑諾新一齊幾耐，我都唔知道

「或者等到，我地都忘記咗嗰個人嘅時候，就可以分手。」我笑一笑講道

呢個應該係最標準嘅答案，呢一刻嘅我，心底裏嘅嗰個人仍然係嗰個拎我嚟做代替品嘅張景彥

詠妍回頭望住岑諾新，我都唔知道佢望佢嘅眼神代表住啲咩，不過我嘅直覺話比我知，詠妍嘅眼神係審視緊岑諾新呢個人適唔適合喺我身邊





不過嘛，其實都冇所謂，就算岑諾新同我講要「分手」我都覺得冇所謂，唔會傷心亦唔會開心，我地之間都冇感情

「陪我落去買嘢食。」詠妍對我講道嘅同時企起身，佢好似預咗我一定會同佢一齊去一樣

我摸一摸裙袋，有錢喺入面，咁就唔洗拎銀包啦～

我自然地行到岑諾新嘅身後拍咗佢一下，畢竟喺課室嘛，做戲做全套，佢係我「男朋友」嘛～

「喂！」我企喺岑諾新嘅身後，探頭望住佢，佢回頭過嚟同時佢班朋友都望住我，「你飲唔飲嘢？我落去買嘢飲。」

「哦，好呀。」岑諾新朝我笑一笑，點一點頭，「你飲咩呀？」

「我飲⋯蜜桃茶？」我諗咗一陣之後講道，我眼尾嘅餘光見到佢班朋友望住我地偷笑








IG Link: https://www.instagram.com/nd_cotttoncandy/?hl=zh-tw