念念不忘 都冇迴響: 不忘

喺呢個世界，我好似只係喺四個人面前承認過我鍾意遊爍嵐。

第一個係我飲醉酒唔小心講咗嗰個；第二個係謝嬭陵，我寫時間錦囊俾佢嗰陣講咗個真相，點鬼知佢轉個頭同我拆咗個時間咁耐所以知道咗；第三個係已經出咗櫃嘅一個小學同學，個世界就係咁細，我小學同學同遊爍嵐竟然讀同一科所以識左，雖然佢哋唔熟；第四個就係我中五中六個同桌，林程荌。

林程荌同我兩個平日都好忙所以好小機會見，直到又到左我就生日嘅時候佢先捨得約我，請我食飯。友人再見，未至於不如不見，只係我地都知道對方唔係生命中有幾重要嘅人，所以平日都唔會強求聯絡對方。

交換現況，重提往事，因為我知道佢知，所以我同林程荌講起遊爍嵐都冇乜避忌：

「其實我估唔到遊爍嵐肯聯絡我，佢冇我想像中咁冇心肝。」





「哈哈哈哈冇心肝，呢句話你講咗咁多年都係咁講。」

「我同佢而家嘅情況幾好，我覺得我而家整體個情況都幾好，個人成熟咗冇咁不切實際。」

「係咩但係我不嬲都覺得你好實際。」

「就單憑我鍾意咗遊爍嵐咁多年呢件事，都睇得出我個人痴人說夢話啦。」

「你而家仲鍾唔鍾意遊爍嵐？」





「我都唔知。」

「你呢啲叫做念念不忘，至少你而家依然都係會講起佢。」

講起佢。其實自從入咗大學之後，我真係好少同任何人提起遊爍嵐。我只會將我嘅想念同埋喜愛放喺心裏面，我從來都冇諗過我呢啲就係叫做念念不忘，可惜都冇可能有迴響。

//

後來有一次同遊爍嵐出街食食吓嘢，我問佢最近Story post左個飯係喺邊度買，因為睇落好好食。遊爍嵐好認真咁答完我之後笑左笑話





「早知就答你係我男朋友買，我想睇吓你會有咩反應。」

其實我可以有咩反應，就算俾佢成功整蠱到我我咪一樣只可以講恭喜？我覺得佢可能係提醒緊我，終有一日佢都係真係會有一個男朋友，叫我心息算。