念念不忘 都冇迴響: 討論

人嘅心態會係一連串不知不覺嘅事情間改變。經歷過大風大浪，取而代之嘅係一種平淡，一種重新審視，一種平平無奇。我都分唔清自己係拼命無恙，定真係安然無恙。我偶爾都係會諗起遊爍嵐，但係當初嗰種愛意反而已經冇咁明顯，只係我唔知點解我依然會諗起呢個人，依然好想係佢身邊，我甚至有諗過好唔好不顧一切直接同佢講我鍾意佢。

當我慢慢喺一個摸上嘅過程中，我同遊爍嵐再見面再講嘢，慢慢地都發現咗啲新嘅體會同感覺。以前我一直都覺得我哋兩個係天造之作，我一直覺得我哋非常之相似，呢個世界冇人比佢更加合適我。但慢慢啲我發覺我哋啲價值觀都唔係特別相近，例如我個人富有儀式感、反而佢係跨年都可以喺度打機，完全唔覺得有咩特別；我好強調兩個人之間要維繫友誼，就算唔可以成日見面都可以交換下情報，定期關心下對方，但係佢會覺得自己嘅日常生活好無聊唔明有啲咩好分享；我會覺得呢段關係最理想就係兩個人互相做主動聯絡對方，但偏偏佢真係一個好被動嘅人，我同佢討論過一大輪點解我好想佢做主動，但係最尾佢都唔明。

喺種種嘅矛盾之下我開始發現，可能咁多年我太過專注於佢嘅好我哋嘅相似之處，已完全無視咗佢真實係一個點樣嘅人。所以其實我幾鍾意聽《羅生門》呢首歌

「迷戀蔽眼 才給美化
但其實 真懂得我嗎
那動人時光 不用常回看
能提取溫暖 以後渡嚴寒 就關起那間房




最動人時光 未必地老天荒
難忘的 因你太念念 才難忘
容易抱住誰十年 最難是放」

經過咗好多討論之後，我同佢強調左其實我真係好鍾意聽到佢講嘢，有時同佢見完面我好怕佢會唔再應我ig dm,令到我冇藉口再去搵佢。但係慢慢啲我都明白到，即使我同佢嘅價值觀差幾遠都好，其實我見到佢有嘗試過跟上我嘅價值觀。

遊爍嵐唔止一次同我講，其實佢個private ig淨係用嚟同我講嘢。其實我都覺得呢一類人好神奇，點解佢平時可以完全唔聯絡佢啲朋友。雖然我覺得佢應該唔覺，但係如果比着我，我會覺得好孤單，所以我非常之希望佢唔好覺得身邊一個人都冇，我希望可以陪佢好耐好耐，俾佢知道其實世界上仲有人一直都肯喺佢身邊，一直都係咁在乎佢。