念念不忘 都冇迴響: 休養

由我逃走果陣開始，我用左好多時間去反思一切。其中最大嘅得着，就係學識點樣同悲傷共處。我用咗一段好長好長嘅時間去悲傷，我甚至不斷咁諗一個人懷抱住咁大嘅悲傷又點樣過落去呢？

喺嗰一段我最悲傷嘅時間，我見得最多嘅係謝嬭陵。其實我一直有啲咩大嘅悲傷嘢都唔會同遊爍嵐講，廢事阻住佢。曾經聽過有個podcast講，真正嘅朋友係當你急需一個人嘅時候可以隨時搵佢，毫無負擔，聽完之後我就覺得遊爍嵐雖然係我最重視嘅人，卻冇辦法達成到呢個準則。但係老實講我唔係太介意，我只不過好希望佢需要一個人嘅時候佢會諗起我，咁樣就已經好足夠了。

反正其實呢個問題我哋討論咗好多次，佢點都唔明點解我唔肯將我啲悲傷同佢分享。所以嗰一排我鋪咗好多放負嘅story又唔係好認佢dm果陣，佢都好努力咁應我story 話我有咩講佢都好樂意聽。果下其實我係有少少感動左嘅，可能其實佢真係肯聽我講嘢，但係咁多年來我都真係唔敢騷擾佢。呢個情況到今時今日都依然未有好大嘅改善，不過好彩我接下來都冇經歷一啲太過傷心嘅事，所以唔需要掙扎同唔同佢講。雖然好幼稚但係我最大嘅心願就係佢好好地，我覺得其實我無論過成點都唔係最重要。

//

反正當我終於做完手頭上所有嘢都要完埋sem嘅時候，唔知點解C大似過我哋好多完sem。有一日睇遊爍嵐ig story嗰陣發覺佢部MacBook壞咗，令到佢做唔到功課好焦急，嗰陣我義不容辭咁樣將我部MacBook借咗俾佢，呢單嘢都少少值得講。





因為我部MacBook其實都有個位擺我哋嘅相，我好鬼怕佢亂開我啲folder之後一切都會一目了然。記得當年睇嗰套Netflix You嘅時候，佢同我分享感受係一早已經估到Peach係鍾意個女主角。呢單嘢加深咗我對佢觀察力嘅認可，雖然我一早都估到佢應該知我鍾意佢，但係如果因為俾佢見到啲Folder而肯定全件事就會好柒，所以借俾佢之前我唯有全部機清咗一次資料就係咁。

反正到佢終於用完部電腦肯還返俾我嗰陣，我依然未傷心完。出嚟食飯嗰陣佢講咗一句嘢令到我最深刻係：

「你應該鬧醒自己啦咁就。」

鬧醒自己。佢係講緊我唔應該尋日喺呢種傷心裏面，但係我亦都會理解左做我唔應該比我自己繼續毫無結果咁鍾意一個人，我唔應該繼續好似痴咗線咁鍾意佢。

//





反正我傷心咗好耐嘅時候，逐漸地我明白我重新獲得自由，我已經冇需要再懼怕；明白已經冇人會再逼我做任何我討厭嘅事，明白往事不可成追憶。因為呢種明白，我開始覺得我無謂將自己困喺以往悲傷嘅回憶裏面，即使有解唔開嘅心結，都唔應該俾佢影響當下嘅我。

曾經有其他hall邀請過我去住，但係苦惱咗一輪之後我都決定拒絕，因為我思考嘅過程我個腦竟然同我自己講，我好享受而家喺屋企嘅生活，我好享受當下好享受今時今刻。而呢種享受呢種快樂，我暫時未想改變佢。

一個看似好簡單嘅道理，我用咗足足幾個月嘅時間先明白。我諗呢啲可能係成長，而未解得開嘅心結，緣份到了就會打開，平日已經無需介懷。我唔敢講我領略咗啲咩大道理，或者成熟咗好多，但我估比佢當初狂妄無知嘅我，我點都會有少少成長嘅，雖然我依然都係未完全放得低遊爍嵐，又或者話其實我唔知點樣先至叫放低佢。