念念不忘 都冇迴響: 放榜 一

DSE考生係會經歷兩次放榜嘅：DSE同埋Jupas放榜。

DSE放榜之前果晚，我根本就冇打算過瞓覺，因為我完全唔覺得我會瞓得着。我曾經同遊爍嵐講過，如果瞓唔着可以同我講嘢。不過最後佢都冇搵我，如果唔係我就同謝嬭陵吹左成晚水。(最深刻的印象係：我地凌晨四無啦啦一齊唱迪士尼D歌)

反正第二日朝早返學嗰陣，我記得我全程都真係好緊張，從來冇一次返學我個心會跳得咁快，沿路行個步速都好奇怪，甚至感受到我全個人都喺度震。

一返到課室無啦啦見到三個社工企晒喺度，我哋全校得三個社工，嗰陣心諗唔係啊嘛唔通我哋嗰班啲人考得好差？

反正好快就開始派成績單，個次序係學號攞。





到我真係拎咗嗰張嘢嗰陣我係真係完全未敢睇，我走咗去課室最後個空位，深呼吸左幾口氣先開始睇。

喺幾個月嘅等待，綜合埋我考完嘅感受，我覺得通識係我最有希望嗰一科，我話想個無限次如果我有星，基本上已經入到港大文學院，所以我決定由通識嗰個位開始睇：

5**

人嘅眼球即使聚焦喺某一點，四周圍嘅嘢會變得模糊但係都隱隱約約見到，我望上去見到自己中英文都考得幾好，其他幾科都有4,立即計一計條數，其實我真係幾高分喎，至少比我想像中高分。

六年嚟嘅壓力一掃而空，我立即跑左落地下搵我阿爸阿媽公布喜訊，做興奮到圍住學校跑咗幾個圈，跪埋落過地，大聲常詩歌，周圍搵老師公布喜訊。





後來聽啲人形容，佢哋覺得我當日真係癲咗。而實際上我係真係癲左。

曾經有聽過有人講過：

放榜嗰日你唔係大笑就係大喊。

實際上我後尾諗返起，其實真係有成村人喺度喊，但係我真係太開心，搞到個對比都幾強烈。如果當時我係喊緊嘅人，都有條女興奮大聲叫又跑嚟跑去，我諗我都會幾想叫佢收聲之後打死佢。喺度同當時可能俾我騷擾到嘅人道歉，但係嗰日我真係失去左理智，我真係太開心。

學校有安排到個操場，整咗啲攤位俾輔導組同班主任坐喺度，等人去問佢哋嘢。





嗰陣我見到游爍嵐，佢個樣好似唔係太開心咁。但係佢身邊圍晒佢啲屋企人同埋陳珊蕾同佢D屋企人，所以我都唔係太方便走去問佢野。

我係去到走嗰陣先打咗成大篇嘢去嘗試安慰佢，但係我連佢個分係乜都唔知所以我就講嗰啲無論點都有出路啊，我一定支持你諸如此類嘅話。到最後游爍嵐突然打電話比我，同我講其實佢只不過係比想像中低分，但係個分入佢想入嗰科個boardbass係完全冇問題，表示其實佢仲高分過我。我覺得文憑試其實只不過係一個入大學嘅入場券，老實講我有啲科我都覺得我可能可以高分啲，但係當我發覺我已經夠分，我就完全冇興趣去追究啲乜嘢。所以我都係咁同遊爍嵐講，唔知有冇順利令佢心情變返好啲，不過都睇得出佢其實唔係特別擔心，我鬆咗一口氣。