念念不忘 都冇迴響: 面試

拎咗DSE成績之後，如果冇記錯你大概有幾日時間可以改你Jupas 個次序，跟住去到八月幾先正式Jupas放榜。

因為我想讀嗰幾科係七月尾先interview，所以我DSE放咗榜之後都用咗啲心思去準備個面試。但其實我嗰陣都幾有信心我個分一定入到我想入嗰科，雖然後來我發現我低過LQ，不過嗰陣根據港大個預計分數，我係綽綽有餘嘅，可能就因為呢種自信，令到我面試表現都幾好。

到我終於面完試之後我約左遊爍嵐食飯，嗰陣我都信心滿滿，胸有成竹。

//

係我面晒試之後到遊爍嵐面試，發生咗單嘢嘅。





有一日傍晚我瞓覺瞓得好開心，突然收到遊爍嵐電話。

「喂你做緊啲乜嘢啊？」

「我...休息緊。」

可能我把聲實在係太攰，遊爍嵐同我講左幾句之後話：

「你係咪瞓緊覺？咁我唔阻你休息啦拜拜。」





其實老實講，後來我有思考到如果遊爍嵐打電話比我，我應該話自己做緊乜，佢先會毫無負擔咁繼續同我講嘢。如果我話我休息緊，佢又會覺得阻住我瞓覺；咁我話我睇緊書，你都會覺得阻住緊我睇書。不過諗黎都多餘，遊爍嵐同我根本就唔會煲電話粥，佢又唔會無啦啦打俾我，所以算。

總之時候遊爍嵐同我講番果日佢係去完九某大學面試，出嚟嗰陣有個自稱係學長嘅人跟住佢行出條隧道，之後嘗試抄佢牌。好彩同游爍嵐同組面試嘅人都睇得出佢哋根本就唔識，就叫翻遊爍嵐同佢地一齊走。

老實講當我聽到呢單嘢嗰陣，我係真係非常之嬲。一方面我好嬲點解佢要經歷啲咁嘅嘢，呢個世界有啲咁變態嘅人；二方面我有少少嬲點解遊爍嵐冇啲自我保護嘅技能，即係例如跑走，或者勁少少嗰啲自衛武術果D；三方面，其實我最嬲係真係自己，我唔明點解我咁廢，嗰時佢打俾我點解我唔扮到好精神聽佢講嘢，或者話點解我唔直接約佢面試完一齊食嘢之類，咁我就可以順利咁帶佢走。

反正就發生咗單咁嘅嘢，好慶幸佢最尾都冇事。不過喺度都同各位女讀者講，學識點樣面對呢啲情況真係好重要，希望大家都平平安安，世界上越來越少呢啲變態人渣。