念念不忘 都冇迴響: 感想

要寫一篇野概括全個中學生涯嘅感想，係一件冇可能嘅事。但係我後來回望返，都有D特別深刻嘅感受嘅。

第一、嗰啲你原本以為最辛苦嘅日子，回望返全部都係溫柔。DSE果陣真係覺得好辛苦，但係對比於後來人生面對嘅種種挑戰，真係小巫見大巫。加上嗰陣係成個學校嘅環境，根本身邊有好多人支持你鼓勵你，同你一齊渡過。後來我有時會覺得，嗰陣時DSE嘅挑戰真係唔大，但係我身邊有好多好好嘅人陪住我；但係到我後來出到社會面對更加大嘅困難，身邊可以幫我嘅人已經寥寥可數。全件事條數計唔通，卻係一種現實。

第二、盡情青春。中學生涯我做過好多好癲嘅嘢，鍾意左遊客嵐三年已經係其中一項。嗰陣時我肯做好多好癲嘅嘢，或者鍾意佢咁耐都唔勉強自己忘記呢份情感，其實係因為我覺得我仲青春有本錢可以晒。我有時間可以好好鍾意呢個人，我有精力可以做好多好瘋狂嘅事，趁住仲未有架子，唔會有後果，就盡情去青春。我記得我同二班嘅人曾經喺詩歌比賽一齊亂咁跳咗隻舞，呢件事成件事都好柒，但係諗返起我都會覺得超好笑。盡情青春，享受當下，人生冇邊個時間可以做咁多完全唔合理嘅事。

雖然中學果陣無可否認有好多好辛苦嘅時間，依家俾我揀多次我都未必肯返去中學時代，日日朝早七點返學，一返到學校就開始做卷，其實依家諗返起成件事都好匪夷所思，到底嗰陣時係點做到；但係後來我都時不是會諗翻起中學嗰陣某啲時刻某啲場景，先覺得一切都好瀾漫，都造就左後來嘅我。

老實講我對我間中學嘅感情都唔係特別深，因為我始終比較頑皮少少所以都係一個問題學生，成日要同學校作對，結果都俾人特別關注；但係我會多謝我間中學造就左今日嘅我，回望返都有唔少好嘅回憶；多謝嗰陣身邊嘅人冇放棄我陪住我行左六年；最後要多謝我自己，問心無愧咁好好渡過左呢段時光。