念念不忘 都冇迴響: Last day 二

我揼低個頭，因為游爍嵐寫嘅字係我視覺水平嘅相反，加上我又唔想特登揼低個頭太多會出現無限雙下巴，所以我都冇特別想去睇佢寫咗啲乜嘢。

接下來繼續同各位老師同學影相，連校工同校長都比我集埋郵。

遊爍嵐後來搵左我一次，佢系我心口個位補畫左佢個樣，同埋又影多咗一輪相。我好感謝佢有咁做，因為第二次用相機影相個質素好好多。不過每次我地影相嗰陣，我都唔知我隻手應該擺邊度好。所以我唯有扮搭住佢個頭，結果出到嚟見到成個胸位。遊爍嵐見到之後問我點解咁生疏，我都唔知點答佢好明明其他人我都有好順利咁搭住佢哋。其實一直以來我都唔鍾意同遊爍嵐有太多身體接觸，其他人明明都冇乜所謂。

好彩最後我發現有一張就得啱個位成件事睇落冇咁怪，我想係我到而家為之依然都好珍藏嘅嘢張相。

慢慢地天色漸暗，學校得翻我地一級中六，依然系學校依依不捨，想尋遍每個角落，嘗試重拾當時丁點嘅回憶。





我重新去到4樓，中三個班房。人去樓空，我坐翻系我地第一次一齊做果兩個位，檯面上面已經冇左當初果個哈哈笑。雖然全件事好合理，鉛筆畫嘅畫，過左足足三年，佢一定無可能依然存在。

不過我依然每張檯望左次，直到真係搵唔到，我先慢慢離開中三個班房。其實成件事都真係好傻，某部分嘅我依然都留左系當時，只不過人臉桃花相映紅，全個班房得翻我，最後離開嘅都係我。

另外我都去搵左遊爍嵐系學校嘅VA大小藝術品影相，後來我send翻比佢果陣，佢遊爍嵐話佢本人都唔記得要影低，表示笑左。

最後我地全班二班一齊去左party room 挽，而精英班自己都有去party room,不過我知道遊爍嵐同陳珊蕾都冇去到，佢地兩個自從中五就醉心讀書，佢班人又非常小圈子，所以佢地冇去全件事都非常合理。