念念不忘 都冇迴響: 外篇：海洋公園 二

其實我同遊爍嵐系海洋公園其實都發生左好多好fun嘅嘢，零零碎碎嘅片段有好多：

我明明已經驚到爆炸都陪佢去玩過山車，結果嗌到拆天笑死佢；唔知點解隻熊貓個樣好鬼似陳珊蕾，我地兩個應該落地獄，但係又真係捉到個精緒，搞到我地都忍唔住笑；玩個旅行節拍嗰陣佢忍唔住瞓咗落我度，佢句感想係：「原來你都幾好攬。」搞到我勁害羞；一齊喺個水母館道影咗幅相，結果比人無限project上嘅展覽牆上面，搞到我地互相想影低對方，場面一度混亂；喺個纜車上面，討論如果個波跌咗落去點算好；仲有熱到爆炸入企鵝館唔係為咗睇企鵝而係為咗涼冷氣... ...

但係最深刻都係我地系果個動感樂園(?) 見到有隻幾得意嘅樹熊公仔可以掟，而遊爍嵐最鍾意嘅就係樹熊，加上我地有買全年飛嗰陣送嘅優惠券，所以我地覺得博下。

只要將4個波成功定入個筒就可以贏一隻樹熊。我哋開始之前仲要上YouTube搵攻略，加上我自問運動神經都唔錯，結果我都掟得幾順利，慢慢抓到個手感，而遊爍嵐慢慢覺得佢椗都只不過係浪費緊啲波，所以最後當我鍾意掟夠8個果陣，我真係覺得我贏咗全世界。

後來我同其他朋友去OP果陣都有嘗試掟公仔，可能因為我已經學識咗個技巧，所以我好順利咁掟多咗隻狗返屋企，嗰陣我個friend開心到手舞足蹈，雖然我都要陪佢笑吓但其實我又冇乜特別大嘅感覺。唔知道係因為我一早已經知道我會成功，定因為為我歡呼嘅人唔係遊爍嵐啦。





反正我阿媽最怕我浪費錢買公仔，佢問起我嗰兩隻公仔機內頭嗰陣，我都話係佢兩個送俾我嘅生日禮物，好彩個海洋公園標誌唔係特別大哈哈。