回到過去，破我未婚妻個處: （63）

凌晨三點，訓唔著嘅我起身出廳飲杯水。

飲完水就返入房，不過無訓返落床，而係開燈坐喺書檯前，唉聲歎氣，抱頭懊惱。

小曼個咒係要同鐘意嘅人結婚，問題係佢同個Eric拍得個幾月拖，究竟係咪鐘意都難講。

如果佢唔係咁鐘意，咁樣結婚嘅話，佢咪會......

唉...我都唔敢諗...



呢鋪點算好呀，小曼佢唔可以有事架！

煩躁之際，我望見檯面上嘅兩張聖誕卡。

喺我之前從2009年帶返嚟嘅，一張係我整，另一張係小曼嘅。

「鐘耀輝，Merry Christmas！聖誕快樂！呢張聖誕卡，特登醒你架，我知你實鐘意，哈哈！」

見到對方咁有心思整嘅聖誕卡，不安嘅心稍稍揾到一絲平靜。



聖誕卡個背景貼嘅係一張大波妹嘅相，而相片嘅一角，唔知係咪膠紙黐得唔實，甩左出嚟。

就喺呢個時候，我見到卡個底原來係有字。

我將成幅大波妹相撕落嚟，望見張卡上面，有十幾行好工整嘅字。

「給鐘耀輝，

Surprise！沒想到大波妹背後竟然藏著字吧？是不是感到十分驚喜？哈哈哈！



這是我第一次送聖誕卡給人，亦是第一次跟人表白。

你沒看錯，我送這張卡給你，是來和你表白的。

其實，我一直喜歡的那個人是你，而不是阿德。

坦白講，一開始我是對阿德有好感在先，後來同你個「死人頭」相處久了，就好似撞邪一般，喜歡上了你。

我肯定自己是撞了邪，否則又怎會喜歡上一個樣子普通，讀書一般，英文又不好，而且又經常嘲笑我平胸的「薯嘜」。

你不要誤會，我不是在貶低你，我只是想表達自己並不喜歡，別人眼中完美的阿德，但卻很喜歡這個憨憨居居，平平凡凡的你。

你不要怪我用這麼間接的方法，來跟你表白，因為我臉皮薄，生怕被你當面拒絕，所以才選擇將我想對你講的說話，都寫在聖誕卡上面。

我故意將右上角的膠紙貼得沒那麼緊，我猜喜歡大波妹的你，必定會看得仔細，留意到鬆掉的一角，哈哈！



鐘耀輝，如果你也剛好喜歡我，願意接受我的表白的話，那麼可不可以也送回一張聖誕卡給我？

如果你不接受的話，那麼就丟進垃圾桶，當什麼事都沒發生，繼續跟我做朋友，見到面也不要提起這件事，好嗎？

最後讓我認真說一句：

我喜歡你。

希望你接受我啦！哈哈！

陸小曼
二零零九年十二月二十四號 」

望住一行一行嘅字，眼淚一滴一滴咁滴落嚟。



原來，小曼從中學開始就一直鐘意我。

點解...點解我咁蠢？

點解當時我咁都睇唔出，仲傻下傻下推佢俾阿德？

點解我當時明明鐘意小曼，卻唔大膽一啲，同對方講出自己嘅心意？

我真係好無用…好無用…好無用...

懊悔嘅眼淚如決堤一般從眼角流下來。

如果我可以勇敢啲同佢表白，或者一切都會變得唔同。



但如今後悔都無用，我已經無得返轉頭...

等陣...我仲有道穿越符！

我抹掉眼淚，即刻摷返枕頭底嗰道穿越咒符。

禿頭道士話只得七次機會，過左七次道符就會失效。

而道符上嘅數字正是「柒」字。

雖然話就話道符已失效，但希望出現一次奇績，祈求道符能夠俾多次機會我再穿越一次。

今次我唔要破Veronica個處，我要搶先阿德一步，同小曼表白。

凌晨三點半，抹乾眼淚嘅啪半粒安眠藥，並將道符放入枕頭底，懷著盼望嗰心情，瞇埋眼訓教。



「嘀嗒嘀嗒嘀嗒—」

滂沱大雨，雷電交加。

朝早十點，我俾雷聲嘈醒。

個天黑黑沉沉，而我所期盼嘅奇績並無發生。

穿越並無出現。