回到過去，破我未婚妻個處: （62）

個道士繼續解釋：「不過呢，以咒換咒始終都唔係最正統嘅施咒方法，所以效果係無咁好，最正統嘅穿越咒符，能使人穿越過去或未來任何一個時間點，而且穿越次數無限制，但呢個以咒換咒方法，就只得七次機會，每次都只可以返去同一個時間地點，所以穿越前一定要諗清楚，以及穿越嘅目標係乜嘢。」

聽完佢呢番說話，令我諗起自己過去幾個禮拜穿越嘅經歷。

我打開電話，將之前影低嘅枕頭底嗰一道符，俾個道士睇：「呢道符係咪你整架？」

「係呀！無錯呀！乜你之前有嚟過咩？點解我無印象嘅？」

「呢道符係一個女仔俾我…」



「咁我有印象啦，個女仔係咪留短頭髮，年紀大約係二十六七歲嘅？」

「係呀！佢係咪同你以咒換咒，嚟啟動道穿越符？」我連忙追問。

「Yes Right！」

我驚訝到無法相信：「咁…咁即係話…佢中左你啱先講嘅『生育咒』？」

「咁又唔係，每個咒都係因人而異，佢中嘅咒叫左『情愛咒』，佢一定要同鐘意嘅人結婚，若然唔係嘅話，就會無命。」



「同鐘意嘅人結婚都算係詛咒？」我感到有啲奇怪。

「呢啲全部係古老嘅咒語，古代個個係盲婚啞嫁，同邊個結婚係聽老豆老母講，而唔係揀自己鐘意嘅人嚟結，所以喺古代，呢個咒好毒架。」

「小曼因為中左呢個咒...所以要揾個鐘意嘅人結婚...但都唔洗咁急架…」我自言自語。

「我差啲唔記得講，『情愛咒』正常係無一個限期嘅，但你朋友身上嗰個就唔同，佢要喺七個禮拜內同一個鐘意嘅人結婚。」

「點解係七個禮拜？」



「呢個係對應返穿越符嘅七次穿越，一個禮拜穿越一次，合共七個禮拜，呢樣嘢你應該好清楚。」

唔怪得小曼要咁急住同Eric結婚，原來佢中左毒咒…

佢係咪傻左？做咩要以咒換咒，拎自己條命嚟較飛？

「咁中左嗰個『情愛咒』，有無得解？」

道士數數手指：「你係咪已經穿越左七次？」

「我穿越左六次，miss左一次。」我回答。

「如果你未用曬七次機會，咁可能仲有得解，但依家就無辦法啦。」

我沉默無言，思緒一片混亂。



「講真，你個friend對你都算唔話得，好多人都想穿越，但就唔肯付出代價，佢咁有義氣幫到你咁盡，你真係要好好多謝佢。」

小曼聽日就要結婚，而我呢刻先佢中左詛咒嘅事，離開道觀，我立即打電話俾佢，想問清楚佢為咩咁冒險嚟幫我。

而我call爆機都無人聽，唔知係咪忙緊結婚啲嘢。

我極之擔心，中左詛咒唔係講笑，隨時會無命。

去到夜晚，佢先覆返我機。

「搞咩無端端打左幾十電話嚟，揾我咩事？」

「你咁急要結婚，係因為你中左咒，係咪呀？」



「你…你講咩…」

「你唔洗再瞞我，今日我去過雲中道觀，見過個禿頭道士，佢同我講曬你以咒換咒嘅事，你要七個禮拜內同鐘意嘅人結婚，否則就會死，你知唔知咁樣做好危險，為咩你要拎條命嚟較飛？」

佢諗左幾秒，語氣好認真咁講：「因為，我唔想見到你死。」

「……」

我窒左一下，答唔上話，跟住佢又笑一笑話：「哈哈，你放心啦，無事嘅。Eric係我鐘意嘅人，我聽日就佢結婚，到時結完婚咪乜事都無囉，好啦，有咩聽日先講啦，bye bye。」

小曼匆匆忙忙咁收左線。

呢一晚，我失眠訓唔著，成晚諗住小曼嘅事。

儘管佢叫我唔洗擔心，但我係完全放心唔落，但又咩都做唔到。



個腦好亂，個心跳得好快，好驚佢會有事。

呢種憂心又無力嘅感覺，猶如一舊大石咁壓住我，令人抖唔到氣，我只能求神拜佛，祈求對方大步檻過。