回到過去，破我未婚妻個處: （64）

小曼嘅婚禮喺下晝一點進行。

中咒嘅佢同Eric結婚，必定會無命。

因為佢鐘意嘅唔係Eric，而係我。

我唔可以眼白白睇住佢死。

訓醒教，早餐都唔食，求其笠件黑色hoodie，我就趕去揾小曼。



「叮噹叮噹！」

屋企無人開門。

依家只係十點半，對方似乎已經出左門口。

「嘀嗒嘀嗒嘀嗒—」

大雨繼續落個不停，我拿拿臨截的士趕到中環。



小曼同Eric將會喺中環某間高級茶座，舉行結婚簽字儀式。

半個鐘之後，我嚟到婚禮場地。

茶座四面都係落地玻璃，望出外面會見得到AIA摩天輪。

「轟隆！」

風大雨大，雷聲震耳欲聾。



證婚律師、新郎、仲有少部分賓客親戚已經到左場。

唯獨唔見小曼。

森仔、Kelly同我打招呼，但我無理到，直接行去Eric面前。

「Eric，小曼呢？」

Eric望一望周圍：「頭先仲喺度架，可能行開左，你揾佢有…」

未等佢講完，我就行開左，獨自咁到處搜索。

經過一個包廂門口，見到對方行出嚟。

佢身上著一條純白色嘅長裙：「咦，乜你咁早就到左嘅？」



我二話不說，拖住佢隻手，立即拉走佢。

「喂鍾耀輝，你要拉我去邊？」

「我帶你去結婚登記處註冊，我同你結婚！」

「做咩呀你！唔好玩啦！」小曼fing開我隻手。

「我唔係玩，你身上個詛咒係要同鐘意嘅人結婚，你都唔鐘意Eric，今日你同佢結婚嘅話，係會死架！」

「我…我點會唔鐘意Eric？我係鐘意佢先揀佢結婚。」

「事到如今，你唔洗再呃我，我知你係為左我，先會拎自己條命嚟以咒換咒。」



「我…我…我邊有呃你…我第一次都係同左Eric…我係鐘意佢先會咁…」

我無出聲，喺衫袋拎出嗰一張，對方寫滿告白說話嘅聖誕卡。

一見到張卡，佢眼神充滿驚訝，頓然沉默，講不出說話。

「雖然遲左十幾年，但呢個係我俾你嘅回覆。」

我將2009年平安夜嗰一張無送出去嘅自製聖誕卡，拎出嚟送俾對方。

一打開就彈出立體嘅聖誕老人、可愛嘅馴鹿、白色嘅雪花、以及心口貼住兩個木瓜嘅小曼。

仲有我用好難聽嘅聲音清唱嘅聖誕歌：「I wish you a Merry Christmas~I wish you a Merry Christmas~」

小曼望住我呢張卡，先係呆左一秒，跟住笑左一聲，與此同時，透明淚珠從佢眼角流下來。



「陸小曼，我鐘意你。」我終於講出當年無開口講出嘅說話。

「轟隆！」

Eric見到曬呢一幕，佢行過嚟問：「發生咩事呀，小曼做咩喊嘅？」

小曼不停抹走臉上嘅眼淚，低聲抽泣。

我唔理咁多，一手拖走小曼，Eric睇到呆左唔知發生咩事。

「你…你要帶我…去邊…」

「我地即刻註冊結婚。」



「趕唔切架…結婚唔係話結就結到架…」小曼臉上沾滿晶瑩嘅淚水。

我停住腳步，佢講得啱，結婚係要搞手續，最快都要等一個月：「唔緊要！結婚都係宣個誓、簽個名啫，既然律師都喺度，咁不如我同你喺度直接簽字咪得囉！」

小曼搖搖頭：「唔得架…我已經無左第一次…你…你同我結婚…你會無命…」

「咁又唔得，咁又唔得！咁仲有…仲有咩辦法呀！」我感到極度焦躁。

最後喺Eric追上嚟之前，我決定都係帶小曼走。

今日係星期五，若然喺星期日前，小曼同唔到鐘意嘅人結婚，咁佢就會死。

但如果同Eric結婚，佢今日就會無命。

所以唔理得咁多，拖得一日得一日。