回到過去，破我未婚妻個處: （61）

唔知係咪Veronica嘅死嚟得太突然，我傷心唔落，亦開心唔落，淨係有一種好唔真實嘅感覺。

下晝佢嘅遺體火化，我諗住去，當係見佢最後一面。

火葬場位置喺昂坪，地方有啲隔涉，我要用ipad上google查先識搭車去。

大家用開google都知，當你search完一樣嘢，咁跟住佢就會經常彈啲相關嘅廣告俾你睇。

呢排我search過穿越符、朱天志、仲有火葬場，google就狂彈啲道士作法、殯儀廣告俾我睇，認真頂佢唔順。



住筲箕灣嘅，上大嶼山要好耐時間，搭車嗰陣無嘢做，我用iPad睇下youtube睇下片，打發時間，有幾次唔小心就㩒左隔籬啲廣告。

其中一個係啲道士作法嘅廣告，大大隻字寫住「雲中道觀，茅山正宗」，仲話「七九九九，施法解咒、減肥變瘦、發財就手、時空穿越、古今漫遊、一符便夠。」

賣告白賣到押曬韻咁，其中吸引住我嘅係「時空穿越」嗰句，意思係咪話有本事幫人穿越過去同未來？

呢個雲中道觀嘅道士係識「穿越咒符」？小曼送俾我嗰道符莫非嚟自呢度？

碌多兩下，發現道觀嘅地址就喺距離火葬場不遠。



於是火化儀式完左之後，我就嚟到廣告寫住嗰間嘅雲中道觀。

呢間道觀同一般道觀無唔同，古舊嘅建築設計，廟裡頭供奉嚴肅嘅神像。

神壇中間坐左個著住藍色道袍，望落四十歲，「地中海」髮型嘅男人。

「唉屌，咁都打唔中！」條友好投入咁打緊switch。

我乾咳兩聲問：「你好，唔好意思，請問呢度係咪雲中道觀？」



「係呀，你想解咒、作法、祈福定係其他服務？」講嘢嘅時候，佢對眼無離開過部switch。

「我係有啲想問下，關於你地宣傳口號嗰句『時空穿越』…」

「哎呀頂！咁都避唔到！」

個道士放低switch，行埋嚟問我：「乜你又想穿越時空？我幫到你呀！你想穿越返去邊一日，返去做啲咩？」

「乜你識『穿越咒符』？」

「唔識喎。」

「咁你又話可以幫我時空穿越？」我問。

「最正統嘅『穿越咒符』的而且確失傳左，世間上亦無人識得施法念咒，只係早幾年俾我研究一個方法，可以重新啟動得返穿越咒。」



「你有方法？」

「of course！我個方法就叫做以咒換咒，你講你個名同出生時辰嚟聽下。」

「鍾耀輝，1993年11月5號出世。」

個道士屈指算一算，隨即眉頭皺左一下：「唔得喎，你本身身上就已經有個咒，所以無得再以咒換咒，睇嚟我幫你唔到。」

呢個「地中海」道士好似有啲本事，拎住我個名同出生日期，就知道我身上有詛咒。

「你講嘅以咒換咒究竟係咩意思？」我問佢。

對方無直接答我，拎左天秤出嚟，手上拎住一道畫滿紅色符文嘅符，上面有一粒七角星，佢介紹話呢道係穿越咒嘅符文。



佢將道符放喺一邊天秤，然後拎左一道空白嘅黃紙，放到天秤另一邊。

我一頭霧水，睇唔明佢喺度做緊乜。

「因為你身上有個咒，所以你做唔到示範。」

佢叫左一個弟子出嚟，並要求弟子放隻手落空白黃紙上。

隨之，個道士口擘擘，念一啲無人聽得明嘅咒語。

大約一分鐘後，空白黃符上現出一啲鬼畫符咁樣嘅紅色符文。

佢拎起符紙，對我講：「你見到本來空白嘅符紙上，依家出現左一堆符文，而呢個呢，就叫做『生育咒』，係一個中左咒後一定要生小朋友，唔生就會無命嘅毒咒，只要我將呢個咒施咒到我弟子身上，咁佢就能啟動天秤另一邊嘅穿越咒，用同等嘅咒術換取穿越咒術，咁樣就為之做以咒換咒，明未？」

我眨眨眼，消化緊佢嘅說話。