回到過去，破我未婚妻個處: （54）

「I wish you a Merry Christmas…I wish you a Merry Christmas…」

「鐘耀輝，Merry Christmas！聖誕快樂…」

穿越返到嚟2021，連隨手上兩張聖誕卡都帶埋返嚟。

Veronica個處就無破到，但卻發現左佢身上嘅秘密，以及小曼呢張無送出去嘅聖誕卡。

另一件重要嘅事係，我留左六個六合彩冧巴俾阿叔，佢有左筆獎金，所以唔洗為左筆保險賠償金而送命。



換句說話講，阿叔應該無事返生左。

我將兩張聖誕卡放好，換件衫洗個臉，過去隔籬樓阿叔住嘅單位揾佢。

「叮噹！」

我按左幾次門鈴，等左一陣有人開門。

但開門嘅唔係阿叔。



「你揾邊位？」開門嘅阿伯問我。

「我揾…鐘漢明…」

「無呢個人，你揾錯地方啦。」

嗯？無理由架？阿叔中左六合彩，有錢俾Shirley醫病，佢應該無死到先係架。

我立即打開電話，開返阿叔張車頭相睇下。



張相並無消失，上面嘅去世日期亦同之前一樣，咁代表左阿叔真係無返生。

跟住再check返2009年12月22日嘅開獎號碼，同我俾佢嗰六個一模一樣。

唔通對方無買到？無可能，有個未來人同你講呢幾個號碼會中，就算唔信都照買啦，加上我提左佢咁多次。

咁係邊度出左問題？

我百思不得其解，離開阿叔嘅舊址，喺樓下買個麵包返上屋企，咁啱撞正老豆老母返嚟。

「你返嚟做咩？你同個女人解除左婚約未？」老豆第一句就問。

「未…」

「咁邊個俾你返嚟！走！」老豆又試再趕我走。



講起婚約，事情發展到呢刻，我同Veronica頭婚事究竟要點處置，呢樣真係要揾對方講個清楚。

我咬住塊麵包，搭車過沙田揾Veronica。

殊不知一落車，離遠就見到對方上左一架銀色房車。

從外形以及車牌號碼判斷出，呢架正正喺Kevin架車。

我拿拿臨截架的士跟過去，睇下佢地去邊。

然而一對偷情嘅男女，除左去酒店開房仲會去得邊。

佢地拖住手嚟到尖沙咀一間酒店，二人啲神態舉止，彼此間嘅親暱行為，就同2009年我所見嘅毫無分別。



望住咁大頂綠帽，兜頭笠落嚟，換係任何一個男人都會火滾。

我氣沖沖大力拍打佢地入住嘅酒店房門，乾脆嚟個抓姦在床。

「姦夫淫婦！快啲開門！」

赤裸上身嘅Kevin開門，房入面嘅Veronica正除緊衫，佢見到我出現，嚇左一跳：「輝…輝輝…點解...你喺度嘅？」

我氣上心頭，一手推開Kevin，踩入酒店房內：「呢句說話應該係我問你先係！枉我一直咁信你，你竟然俾綠帽我帶！」

「唔係呀，你誤會啦，件事唔係你想象中…」

Veronica強行解釋，但我出言打斷：「誤會？你兩條友孤男寡女，衣衫不整咁喺間酒店房度，咁都仲有得誤會？你係咪當我傻架！仲有，我已經知道左你身上有詛咒嘅事！」
 
「你...知道左？你...係點知架…」Veronica驚訝到碌大雙眼，露出不敢相信嘅表情。



我反問返佢：「我問你，當初你係咪因為破左我個處，所以先被逼同我一齊？」

「我...唔…」Veronica口窒窒，唔識點答。

「阿Ling，呢個問題你唔識答，就等我幫你答！」

Kevin著返件面衫，哄埋嚟睥住我：「係！無錯！如果唔係當日阿Ling唔飲大左，同你呢條青頭仔上左床，咁佢就唔會同你條粉腸一齊！」

「算啦Kevin，唔好講啦！」Veronica想叫停Kevin。

「反正都通曬天，仲有咩好隱瞞。」

於是Kevin完完整整將成件事嘅始末講一次。



得出嘅結論同我諗嘅一樣，Veronica同一齊唔係因為鐘意我，而係佢唔想死。