回到過去，破我未婚妻個處: （53）

阿德拎住一個遙控手掣，控制緊一架遙控直升機飛過嚟。

直升機上有一束好靚嘅紅玫瑰，花束嘅中間有一個粉紅色心心。

阿德將直升機慢慢駛近小曼面前，並好有誠意咁表白：「小曼，我鐘意你，你可唔可以做我女朋友？」

小曼面對突如其來嘅示愛，呆左咁唔識反應，其他人就喺旁邊起哄。

對十六歲嘅我嚟講，簡直係晴天霹靂。



佢退後一步，偷偷地收返埋，已經拎左上手準備要送嘅聖誕卡。

阿德見小曼仲未有表示，於是駛架直升機返自己身邊，親自攞住扎花送俾對方，並再示愛一次。

其他人繼續起哄：「應承佢！應承佢！」

小曼仍在猶豫。

「流星原來真係咁靈，仲等咩？你唔係恨左好耐嘅咩，快say yes啦！」



十六歲嘅我喺後面推小曼一把，將對方推到阿德面前。

小曼考慮左好一陣，最後收左阿德嘅玫瑰花。

阿德開心到攬住小曼，其他人為佢地歡呼。

唯獨十六歲嘅我面無表情，百般滋味在心頭。
 
我行到旁邊，搭住佢膊頭：「講左架啦，話左你張卡送唔到出去。」



對方黯然失望，我好明白佢呢刻嘅心情，因為我都經歷過。

當用一個第三者嘅身份見證，我個心一樣係戚戚然。

送唔出去嘅嘢，亦無謂再保留。

佢將張卡隨手dum入垃圾桶，之後假裝若無其事，睇住阿德拖住小曼嘅手，搭住膊頭，表現得親暱。

儘管傷心難受，卻還要強顏歡笑。

食飽之後，就到互送禮物嘅環節。

阿德送俾小曼一條好靚嘅頸巾，小曼就送左一個銀包俾對方。

係我/十六歲嘅我陪佢一齊買嘅禮物。



「哇，你點知想要呢個銀包嘅？多謝你呀！」阿德收到禮物，笑逐顏開：「呢張卡你都係送俾我架？」

禮物盒上攝住左張聖誕卡，小曼一手攞返過嚟，收返埋落手袋：「唔係，呢張唔關事。」

「阿輝，我份聖誕禮物呢？」馬騮伸手問十六歲嘅我拎禮物。

「無喎，你自己都無準備啦。」

「高佬威呢？」

「我可以送你一句終身受用嘅說話，君子有九思…」

「君你條命，食屎啦你！」



本來係送禮物嘅環節，但得四個人有買禮物，除左小曼同阿德，另外就係森仔同Kelly。

「仲有十五分鐘倒數啦，嗰邊人多啲，不如我地過去囉。」

大家覺得森仔提議唔錯，於是就過去沙灘另一邊，比較多人嘅地方等倒數。

而我就無呢個心機倒數，飲完三罐啤酒，又去七仔買多罐，跟住喺沙灘揾個靜啲地方，飲酒消愁。

喺旁邊有個垃圾桶，有個阿伯咁夜都喺度摷紙皮、摷膠樽。

摷下摷下，摷左兩張聖誕卡出嚟。

其中一張就係頭先十六歲嘅我dum嗰張。

我拎上手打開，見到聖誕老人，馴鹿，屋仔彈出嚟。



當然仲有心口黐住兩個木瓜嘅小曼，兼且附帶埋聲效，係一把親自錄嘅聲：「小曼，祝你聖誕快樂！I wish you a Merry Christmas~ I wish you a Merry Christmas~」

除左祝福語，仲有清唱嘅聖誕歌，聽返都覺得好笑。

至於另一張被摷出嚟嘅聖誕卡，個封面都好靚。

我打開一睇，一把女聲配搭住聖誕音樂講：「鐘耀輝，Merry Christmas！聖誕快樂！呢張聖誕卡，特登醒你架，我知你實鐘意，哈哈！」

聖誕卡嘅背景貼左一張大波妹豪乳特寫嘅相，上面有立體嘅聖誕樹同雪花，對波嘅波嚹中間企左一個人仔，人仔上面貼左我個樣，仲有兩滴口水掛喺唇邊。

哈哈！我睇見都忍唔住笑左出嚟。

而呢把聲，好明顯係小曼把聲。



原來佢都咁有心思準備一張聖誕卡。

只不過，點解最後無送到俾我？

「嘭！嘭嘭！」

漆黑夜空升起璀璨嘅煙花。

四周嘅人群開始倒數。

「五、四、三、二、一！」

「Merry Christmas！」

下一秒，時間靜止，眼前出現Kevin破Veronica個處嘅畫面。

隨之，一道白光閃過。

跨越時空嘅隧道，我又回到2021年。