回到過去，破我未婚妻個處: （55）

我有講過我同Veronica相遇嘅故事，我兩個係喺交友app度認識。

原來就喺我地相識嗰段時間，Veronica正同Kevin嗌交同冷戰，所以佢先down左app嚟揾人傾計，攝下時間，順便揾水魚請下食飯，攞下著數咁。

本來我都只係一條水魚嘅角色，但有一日佢發現Kevin block左佢個電話，因此心情變得好差，所以就揾左我呢條水魚出嚟，請佢飲酒。

殊不知佢同我都飲大左，仲喺迷迷糊糊嘅情況下上左床。

飲大左做錯事好平常，好死唔死我係青頭仔，佢身上又有個「處男咒」，佢破得我個處，就一定要同我結婚，否則就會死。



同佢一齊無幾耐，Kevin就下左啖氣揾返佢，自此佢地兩個就成日偷偷地見面。

佢個心一直都係鐘意Kevin，只係出於無奈先被逼同我一齊，甚至要同我結婚。

呢三年嚟，喺佢心目中，我只係一個求生用嘅水泡，Kevin先係佢鐘情嘅遊艇。

咁試問我仲點樣繼續，同一個唔鐘意自己嘅人結婚？

「原來呢三年嚟所有嘢都係假嘅，你根本無鐘意過我，既然係咁，我都唔可以同一個呃左我三年嘅人結婚。」



「唔好呀，剩返兩個月我就二十八歲生日，你唔同我結婚嘅話，咁我會死架！」

Veronica拉住我，眼角流出淚水：「輝輝，我唔想死，我知係我對你唔住，係我偷偷地同Kevin一齊俾綠帽你戴，但其實你都有偷偷地同小曼出街，你地成日一齊食lunch，又去睇live show，只係我一路詐唔知，既然你都同小曼有嘢，不如我地大家一比一打和當無數...」

「我同小曼點同，我地兩個都無嘢，又無上過嚟酒店開房，根本就唔得比。」我反駁。

「你認唔認都好，總之我淨係想求你唔好取消婚約，因為我真係唔想死...」

如果我唔同佢結婚，佢就會死，問題係如果我同佢結，咁就係我死。



「有樣嘢之前一直都無話你聽，其實我身上都有一個詛咒，假如我同你結婚嘅話，我都會死。」

一路以嚟瞞左咁耐，呢刻我終於對對方坦白講出，自己家族詛咒嘅事。

佢聽完第一時間嘅反應係唔信，或者係唔願相信。

「輝輝...對唔住...如果你仲係好嬲我...條氣吞唔落嘅...你可以打我鬧我...但我求下唔好取消頭婚事…」Veronica泣不成聲，一邊喊一邊講。

就連剛才好勞氣嘅Kevin，都擺低姿態求我：「雖然阿Ling呃左你，只不過佢對你就算無愛情，但都有感情，你咪睇在一段三年嘅感情份上，我求你同佢結婚救佢一命。」

「但…但我講嘅都係真話，我就咁結婚都會死…」

點不知佢兩個出到跪低呢招嚟求我。

Veronica跪喺我面前，喊到收唔到聲：「一次呀…輝輝你就幫我呢一次…我求你唔好唔同我結婚…」



人非草木，孰能無情。

雖然我真係好嬲，嬲佢呃左我三年，只但係無論幾嬲都好，我同佢始終有過一份感情，我都唔忍心見住佢死。

同時間最大嘅矛盾係，我自己條命都好重要，我同佢結婚，自己都會無命。