回到過去，破我未婚妻個處: （17）

接近傍晚時分，太陽開始落山。

我喺屋邨附近徘徊，等待對方出現。

十幾分鐘後，一個咬住珍寶珠，著住粉紅色hoodie同黃色boot，露出一對白滑肉髀嘅女仔，向住我呢邊方向行緊過嚟。

我撥返整齊啲頭髮，清一清喉嚨，大步行上前問佢：「小姐唔好意思呀，你可唔可以好心借二十蚊俾我？」

Veronica含住珍寶珠，掃視我一眼。



我皺埋眉頭，擺出一副焦慮嘅表情：「頭先我唔小心跌左銀包，身上無曬錢，所以先想問你借少少錢搭車。」

Veronica眼神帶著懷疑，唔知係咪以為我係騙子。

佢考慮左一陣，先拎個銀包出嚟。

「哇，好多謝你呀，你住呢頭架？不如留個電話同名，我搵日還返俾錢你？」

我一輪嘴講出預先度定嘅對白，點知佢只係拎左兩蚊出嚟。



「呢度兩蚊雞，唔洗還架啦，剩低嗰十八蚊你問其他人借啦。」

「梗係唔得！受人恩惠必需湧泉相報，兩蚊都係錢，一係我地約個時間出黎，到時我俾返錢你？」我堅持要還錢俾佢。

「都話唔洗囉！」Veronica拒絕我，急急腳走左。

計劃暫時唔太順利，但我係唔會咁快放棄。

我即刻截架的士，趕去體育館附近嗰一個巴士站，根據上次經驗，Veronica會經過呢度。



等左一陣，見到對方喺遠處逐步行近。

我詐假意dup低頭，扮唔小心無睇路撞埋佢度：「哎呀，sorry，sorry，有無撞親你？」

「有無搞錯，睇路呀嘛！」Veronica抱怨。

「咦！又係你呀，乜咁啱嘅，我地真係好有緣！唔講你唔知，原來我個銀包漏左喺巴士站，全靠你嗰兩蚊我先搭到車返轉頭攞返渣，不如你留個名同電話，揾日我請你出嚟食餐飯多謝你呀？」

對方瞄我一眼問：「你請我食飯？」

「無錯！我請你食飯，日本野啱唔啱？」

佢諗左幾秒，然後講：「9988 3221，呢個係我電話。時間地點我地再約啦，係咁先。」Veronica終於留低聯絡方式。

我即刻拎電話記低。



對方講完就行遠開去，我對住佢背影嗌：「我叫鐘耀輝，我會call你架啦！」

拎到佢嘅電話，總算係向成功邁出左重要一步。
 
天色已全黑，時候都唔早。

我坐上巴士，準備返位於筲箕灣嘅屋企。

呢次穿越返嚟，我帶左電話、銀包同鎖匙，咁就唔怕無錢搭車，亦唔怕無門口入。

經過一個鐘既車程，終於返到屋企門口。

我拎出鎖匙開門，但唔知點解開極都開唔到，仲『kick』住左喺入面掹唔返出嚟。



呢一刻我先醒起，門口鐵閘把鎖換過嚟，依家屋企呢把係舊鎖，我手上揸嘅新鎖嘅鎖匙。

咁就無辦法啦，只好㩒鐘等老豆老母開門。

「叮噹！叮噹！叮噹！」

響左幾下，無人開門。

唔通無人喺屋企？

我再試下chok幾下條鎖匙，睇下掹唔掹得出嚟。

「...成世人都係咁大頭蝦，身份證都可以唔記得帶，好彩未上船。」

「一時唔記得左啫。」



走廊傳來一男一女嘅聲音，我擰轉頭望過去。

係我老豆老母，今次有門口入啦。

「阿爸阿媽！」我對佢地打招呼

「喂！你係邊個？你喺度做咩？」我老豆大嚇一驚。

「我咪你地個仔阿輝。」

「哎呀呀！你都幾大膽架喎，你當我盲架？你分明就個賊，夜媽媽喺我屋企門口想爆格，唔認都算，仲喺度認親認戚，豈有此理！？」我老豆嬲到青筋暴現。

「你聽我解釋先…」



「俾我地斷到正都仲有咩好解釋？拎住條萬能匙想爆我地格？」我阿媽過嚟一嘢用力猛走條匙。

我嘗試辯解：「呢條係我地屋企鑰匙，唔係咩萬能匙…」

「拿！我警告你快啲走，否則咪怪我地唔客氣！」我老豆突然擸起門口把掃把對住我。

「仲同呢條友講咁多托咩，直接報警啦。」我阿媽攞出電話，㩒緊三條九。

「唔好報警！我真係你地個仔，我有證明架。」我喺褲袋巢個銀包出黎，諗住俾張身份證佢地睇。

「啪！」我老豆堅係嚟真，用個掃把棍fit落嚟我隻手度。

我痛到連銀包揸唔穩。

「喂？係咪三條九？我屋企俾人爆格，唔該你快啲派人嚟。」我阿媽好似打通左電話。

「你條粉腸仲唔肯走？係咪想食多我一棍？」我老豆繼續揮動手上嘅掃把，我阿媽就話：「差佬嚟緊架啦，精嘅你好走！」

兩老當正我係賊，睇嚟都好難平心靜氣聽我解釋，咁既情況下，都係走人先。

我執返個銀包，調轉頭走人。

慶幸嘅係銀包入面啲錢，都夠我揾間三星級酒店住兩晚。