回到過去，破我未婚妻個處: （16）

睡夢中嘅我，首先係耳仔聽到一啲聲音，身體有種飄下飄下嘅感覺。

然後一道白色強光，對住我射埋嚟。

「wee-wee-wee-」古怪嘅聲響持續不斷，且越嚟越大聲。

與此同時，白色強光已變得極度刺眼。

我無法再忍受，睜開了雙眼。



刺眼嘅白光同嘈吵嘅雜音瞬間消失，猛烈嘅太陽光線隨即映入眼簾，耳邊傳來拍波嘅聲音。

望過周圍，發覺自己正身處喺籃球場。

打波嘅人得兩三個，球場中間有兩個著住校服嘅男女。

四眼仔，仲有Veronica。

「…其實…我都鐘意左你好耐…」



「咁你即係應承做我男朋友？」

「好呀，我應承呀，我願意做你男朋友！」

個四眼仔以為自己得到女神歡心，實際只係一場惡作劇。

「哈哈哈！唔係呀嘛！你真係以為我冧你？玩你渣，死傻仔！我點會鍾意你個柒頭！哈哈哈！」

Veronica對住個四眼仔大笑，隨後mk仔Kevin連同兩個揸住電話拍片嘅男仔，從角落頭行出嚟一齊大聲恥笑。



四眼仔俾人笑到無地自容，憤然離開。

嗰四條友見風駛盡𢃇，追住四眼仔嚟笑。

此情此景就同第一次穿越返嚟所見到嘅一模一樣。

Veronica唔覺意跌左張學生證出嚟。

上一次我好心執返俾佢，結果俾對方好人當賊扮。

所以今次由得佢，唔幫佢執。

過左無幾耐，Veronica察覺到張學生證唔見左，同Kevin一齊返轉頭執返。

我盡量離佢地遠啲，唔想俾佢地見到。



等到二人離開球場之後，我先偷偷地跟上去。

早嗰幾晚我除左著曬全套衫褲鞋襪訓覺之外，都有攝高枕頭，反省過自己上次做得唔好嘅地方。

其一，我唔應該成個痴漢/痴線佬咁，當街拉住Veronica，同對方講自己係佢由未來穿越返嚟嘅老公，咁樣唔嚇親人就有鬼。

其二，係唔能夠同Kevin硬碰硬，原因係自己唔夠人地抽，盞喺Veronica面前出醜。

汲取過上一次失敗嘅經驗，因此今次策略有所改變。

我決定拋開自己係佢未來老公呢個身份，當彼此互不相識，重新再追佢一次。

既然我有本事追到二十幾歲嘅佢，我相信自己一樣有能力追得到十六歲嘅佢。



不過講起當初自己同Veronica嘅相遇同相戀，稱得上話係「做愛做出真感情」。

我同佢其實係喺交友app度識。

現實中溝唔到女嘅我諗住玩下app，碰下運氣，點知就俾我match到個大波妹。

我地喺app傾左幾日，我就膽粗粗約佢出嚟，見到對方真人正過張相，就試下展開追求攻勢。

得閒就送下禮物，請下睇戲食飯咁，開頭對方其實都係忽冷忽熱，搞到以為自己做左觀音兵。

直到有一次，Veronica約我落bar飲酒解悶。
 
嗰一晚，我地開左幾支威士忌，大家都飲到貓左，迷迷糊糊上左酒店開房，最後仲上埋床。

俗語有話「酒醉三分醒」，我必須承認當刻醉左嘅我仲保留住幾分清醒，有諗過唔好乘人之危。



只不過對住一個咁正嘅女人，加上自己單身左咁耐，最後把持唔住，喺七分醉三分醒嘅情況下，獻出左自己嘅第一次。

發生過關係之後，對方竟然倒追返我轉頭，跟住好快我地就喺埋一齊。

所以我打算照辦煮碗，用返同樣嘅方法追求十六歲嘅Veronica。

講緊當然唔係用灌醉佢上床呢啲嗱渣招，只係用返送禮物、請食飯、請睇戲呢類正常追女仔嘅招數。

Kevin同Veronica由土瓜灣一路拖住手，慢慢咁行到嚟紅磡家維邨，行左都差唔多半個鐘。

原來Veronica細個就係住呢度。

男方送到門口，同女方依泣左一陣先至離開。



無記錯嘅話，條mk仔陣間會跟區隊練波。

Veronica返上樓，估計佢換件衫，晏少少都會去體育館睇Kevin打波。

而我就執正個look喺樓下等，開場白都諗定，等陣間Veronica落樓，就上前搭訕。

後尾諗諗下又覺得咁樣直接撩佢，似乎有啲唐突同埋老土左啲，於是就想出第二個方法。