回到過去，破我未婚妻個處: （18）
夜幕低垂，呢個鐘數Veronica應該喺公園一角幫Kevin吹緊喇叭。
本來我結婚之後先享受到既野，條mk仔依家已經享受緊，諗諗下條氣真心唔順，所以一定唔可以再俾佢破到Veronica個處。
我喺北角揾左間三星級酒店落腳，酒店樓下有間七仔，門口擺左幾部扭蛋機。
其中一部係扭麵包超人既玩具，我醒起Veronica好鐘意呢款公仔，因此入去七仔唱一百蚊散紙，打算儲夠一套送俾對方。
全套共有五隻，今晚手氣好，扭左十次左右就集齊到一套。
臨訓前，我打電話想約對方聽日出嚟，點知呢個時候先發現，電話一格信號都收唔到。
2021年代嘅電話原來不適用於2009年。
不過唔緊要嘅，橫掂我知佢住邊，要搵佢應該唔難。
到左第二日。
一覺訓醒，我嚟到文具鋪，買左個禮物盒同包裝紙，將套公仔包裝得靚靚，跟住搭車過海到紅磡，打算送呢份禮物俾Veronica，順便邀請佢食飯。
由於紅磡一帶嘅路我真係唔多熟，而且電話又收唔到信號，想用google map都用唔到，結果我落左車過左條天橋，蒙查查咁行左去黃埔。
就係咁啱得咁「橋」，經過嗰「大船」（黃埔吉之島）門口，竟然撞見Veronica。
只但係，佢唔係同Kevin一齊，而係同緊一個金毛仔一齊。
望多兩眼，呢個金毛仔好熟口面…
頂，我記得啦，呢條金毛咪上次喺體育館更衣室，同Kevin一齊換衫嗰條友。
Veronica手上拎住一袋二袋，翹住金毛仔隻手，挨身挨勢咁，表現得頗親熱。
究竟咩一回事？點解Veronica會同呢條金毛一齊？佢地係咩關係？
滿頭問號嘅我偷偷地跟住佢地，睇下搞邊科。
二人行行下嚟到黃埔花園旁邊嘅碼頭。
光天化日之下，男方對女方摸手摸腳，而女方居然唔抗拒，仲主動俾男方攬同錫。
WTF！我究竟睇緊啲乜！明明琴日Veronica仲同緊Kevin一齊，做咩今日換左條金毛仔？
「踏踏踏—」身後突然傳來急促嘅腳步聲。
隨即有三個人經過我身邊，來勢洶洶朝住碼頭圍欄邊方向行去。
我一眼就認得出三人，一個係Kevin，與佢同行嘅兩個男仔，係有份喺籃球場拍片整蠱四眼仔嗰兩個人。
我稍稍再行近，睇下接下來會有咩事發生。
「屌你老母，你條冚家剷勾義嫂！」Kevin一現身就動粗，雙手用力從後推開金毛仔。
好彩個金毛仔下盤夠扎實，否則應該仆左落地。
「Ke…Kevin…點解你喺度嘅…」 Veronica見到Kevin出現，嚇左一跳。
「係我問你先啱，你點解你會喺度？仲要同佢喺一齊？」Kevin怒氣沖沖。
「你…你…你聽我解釋…件事唔係你…」
Veronica都未講完成句，條金毛仔就郁手向Kevin反擊：「屌你老母，郁手郁腳係咪想隻抽！」
「嚟啦！隻抽咪隻抽！仆你個街，我條女你都敢搞！」Kevin拉高衫袖，好似真係想開拖咁。
「係你條女黐埋我度先，擺明佢就冧我多過冧你！」金毛仔撥一撥頭髮，個樣十分得戚。
「頂你個肺，你講咩話！」Kevin想揮拳出手 ，好彩旁邊兩個friend及時㩒住左。
「我無講大話架，呢度係我同阿Ling嘅sms記錄，唔信你自己拎去睇。」金毛仔從褲袋，拎左部摺機攞出嚟。
「喂，你唔好…」Veronica想搶走電話，卻慢左一步。
Kevin拎住金毛仔部電話，睇裡面嘅sms。
「拿，你睇到曬啦，真係你條女揾我先架。」金毛仔話。
「佢講大話架！你唔好聽佢講，明明就係佢成日纏住我！」Veronica反過嚟指控金毛仔。
「下？係鬼我纏住你，sms有曬記錄，你唔好講大話，由頭到尾都係你發我姣。」金毛仔反駁。
「唔係咁架，Kevin你唔好睇部電話，你聽我講，」Veronica搶走Kevin手上嘅電話，「係佢不停咁纏住我，我根本都唔鐘意佢…」
「咁都仲有得解釋？你唔鐘意佢，會叫佢『darling』、『豬豬』？」Kevin個樣「苦過弟弟」，睇嚟受左好大打擊
喺一邊偷睇嘅我都大受打擊，Veronica居然會一腳踏兩船？早幾日明明同我講話，係Kevin背住佢勾三搭四，結果原來佢都有背住Kevin勾佬。
「件事唔係…」
「唔好再講啦！我唔想聽！」Kevin大喝一句，中斷Veronica發言。
「陳嘉玲，你聽住！從來只有我俾綠帽人戴，無人可以俾綠帽我戴！」Kevin不留情面，決斷講分手，「我地分手啦！我送俾你嘅嘢，你唔洗俾返我，我以後都唔想再見到你！」
「唔係咁架，你聽我解釋…」
Kevin充耳不聞，憤然同兩個朋友離開，佢個樣真係好嬲。
Veronica撇低金毛仔，追左上去：「Kevin，唔好走，你聽我解釋…」
「我唔要聽你解釋！記住，係我飛你，唔係你飛我……」
佢地好快由碼頭行遠左開去，而我成個人棟左喺度，個腦一時間轉唔到，呆左咁唔識反應。
呢刻心裡面有一個好大嘅疑問 ：
今日只係23號，聽日先係平安夜，既然喺呢一日佢地兩個分左手，咁點解平安夜Kevin又破到Veronica個處？
上一次穿越嗰陣，我俾人拉左返差館，又因為發燒住左一日醫院，幾乎係skip住23號呢一日，因此跟住落嚟會發生咩事，我對此係一無所知。
但無論點都好，既然Kevin同Veronica分左手，咁代表我依家有機會乘虛而入。