回到過去，破我未婚妻個處: （15）

我手頭上有兩張飛，本來我打算一支公去睇，但又唔想曬另外一張飛，最後決定揾埋小曼去睇。

本身我朋友已經唔算多，聽band嘅就更加少，就得小曼一個。

呢一日夜晚八點，我約佢嚟到麥花臣。

入場嘅人數都唔少，近年香港的確係多左人聽band sound。

等緊開場嗰陣，我細細聲同小曼分享我嘅穿越之旅。
 


「喂，細細聲講啲嘢俾你聽，你唔好同人講。」

「神神秘秘咁，有咩想講？」小曼稍稍側頭，將耳仔挨近。

我喺佢耳邊低聲講：「原來對住流星雨許願，願望真係會實現。」

小曼望我一眼，無出聲俾我繼續講。

「你記唔記得我同你講過，Veronica向我求婚嗰日，我對流星雨許過三個願望，真係講你都唔信，我其中一個願望居然真係實現左，早幾日我穿越返到過去2009年，見到未破處嘅Veronica。」



「你話...你時空穿越…返左2009年？」小曼睜大雙眼，露出一副不可思議嘅表情。

「唔好咁大聲，俾隔籬啲人聽到，驚佢地以為我係癡線。」

小曼靜左唔出聲，反應有啲呆。

「我一開始都以為係發夢，後尾用左好多方法都整唔醒自己，先發現原來唔係夢，同埋唔講你唔知，中學嗰時嘅Veronica竟然係一個粗口爛舌嘅mk妹，仲同過一個好mk嘅mk仔拍拖……」

我將穿越時嘅所見所聞分享俾小曼聽。



對方保持一副驚訝嘅表情，好似聽緊又好似無聽緊咁。

「我講左咁耐，你俾少少反應啦，定係你唔信我講嘅嘢？」

「你肯定你真係穿越左…？」

「Woo！！！」

呢個時候，Kolor終於出場，場內觀眾熱鬧起哄，音樂聲加歡呼聲掩蓋左小曼嘅聲音。

我鍾意聽band其中一個最大原因就係，band仔玩live嘅氣氛真心好正，仲可以同周圍嘅觀眾跟住音樂，一齊跳一齊嗌，感覺好hyper好爽。

平時小曼睇band show都會好high，今日就顯得有啲慢熱，去到中後段先開始跟住大家嗌。

歡樂嘅時光過得特別快，Kolor Encore完最後一首歌，兩個鐘頭嘅演唱會就完美結束。



小曼住西灣河，我就住筲箕灣，大家順路一齊搭102返屋企。

「我今日請你聽左場咁正嘅live，下次你有機會你記得請返我睇。」我同佢坐喺巴士上層最前嗰排。

「咪住，聽講呢兩張飛係你阿頭送俾你，你都無份出錢，嚴格嚟講，你唔算『請』我睇。」

「就算唔係『請』咁都叫做係『邀請』，咁我邀請你嚟睇，都算唔話得啦掛。」

「唓~係你揾唔到人陪你睇，先揾我之嘛。」小曼反左我一下白眼。

「哎呀，咁都要串我，早知我一個人去睇都唔益你。」

「咁你可以揾Veronica一齊睇架，點講你都就嚟結婚，你同我兩個去睇演唱會，你唔怕佢知道左會介意？」



「有咩好介意啫，我有問過佢睇唔睇架，佢嫌rock band太嘈所以先唔嚟。」

「咁你穿越嗰啲嘢，你有無同佢講？」

「無呀，點講得出口，唔通同佢講我時光倒流，返到2009年想破你個處，但失敗左咁咩？」

「哈，又係幾難講出口嘅。」

「諗返起其實最衰係事先無準備好，假如早知道訓覺嗰陣會穿越，至低限度我都會著多件衫同著返對鞋，就唔洗搞到自己咁狼狽，又衰得咁難睇。」

「仲有機會嘅…」小曼細聲吟尋。

「嗯？你話我仲有機會？你又知？」

「無，我求其亂咁講下，不過根據我多年睇電影睇劇嘅經驗，通常啲主角都唔會穿越一次咁少，所以我諗你仲有機會，哈哈。」



雖然小曼只係開玩笑，但我覺得都好似都有啲道理。

話曬日劇《求婚大作戰》個男主角都穿越左十一次，我無理由得一次咁少，而且照計上天都唔會咁孤寒，俾得一次機會咁少嘅。

我帶住呢個想法返到屋企，決定今晚著齊全副裝束訓覺，兼袋埋銀包同手提電話，等待睇下幾時出現第二次穿越嘅機會。

結果第一晚，無事發生。

接住嗰二三四晚都係一樣，咩都無發生。

本來以為都無機，殊不知就喺第五晚，我所期待嘅事發生左。