回到過去，破我未婚妻個處: （7）

返到屋企就按照小曼所講，將道符攝左入枕頭底。

臨訓前，我用iPad再check下關於流星雨嘅新聞，網上的確流傳一啲向流星雨許願後願望成真嘅個案，照計我許嘅三個願望應該至少有一個會實現。

第一個願望我係希望個毒咒消失，第二個係想長命百歲唔好咁早死，呢兩個願望有無實現到其實都幾難判斷。

至於第三願望係穿越時空，回到過去破Veronica個處，假設呢個願望成真嘅話，咁我應該時空穿梭左，但到依家都無穿到，咁係咪代表三個願望之中，第三個無實現到，所以頭兩個願望其中有一個實現左？

定還是到頭來一個都無實現？



我左諗右諗，諗到個腦都攰埋都諗唔清楚。

疲倦嘅我打一個喊露，熄燈上床訓教。
 
合埋眼無幾耐，我就進入睡夢之中。

訓訓下覺，突然耳仔聽到「wee-wee-wee」嘅奇怪聲響。

同時身體隱約有種漂浮嘅感覺，然後出現一道光。



有一道白色嘅強光向住我撲面而來。

無幾耐，奇怪嘅聲音越嚟越大聲，白光亦越嚟越掁眼。

最後我頂唔順，成個人扎醒左。

睜開第一眼見到嘅係光猛奪目嘅陽光。

我用手遮擋太陽光線，望一望周圍，發現自己訓左喺一個籃球場邊嘅長櫈上。



雙腳無著鞋，身上著住訓教時著嘅短褲同T-shirt。

睇嚟係發緊夢。

我慢慢坐起身，望見籃球場打波嘅人唔多，得小貓兩三隻，喺籃球場中央就企左一男一女。

二人都著住校服，男嘅瘦猛猛戴住眼鏡，思思縮縮成個毒男咁。

女嘅就典型以前mk學生妹打扮，著住校服但染曬啡髪，條裙短到上膝頭，成對腳露曬出黎，仲著住黑色長襪配「婆仔鞋」。

條女望落好熟口面，再睇真啲，感覺生得有啲似Veronica。

「今日約你出嚟，係有樣野想話俾你知。」個mk學生妹吸一啖大氣，同個四眼仔表白，「其實我一直以嚟，都默默咁暗戀你，你可唔可以做我男朋友？」

估唔到佢除左個樣生得似，連把聲都好似Veronica。



四眼仔dup低頭怕怕醜醜咁問：「阿Ling，你講真架？你真係鍾意我？」

「係呀！我鐘意左你好耐，今日終於鼓起勇氣開口講。」個學生妹身上著住厚厚嘅冬季冷衫，但都睇得出個心口好漲。

我覺得佢越睇就越似Veronica，因為唔單止係個樣同把聲，連身材一樣都咁「有料到」。

「其實…其實…我都鐘意左你好耐…」個四眼仔塊面已經紅到馬騮屎忽咁。

「咁你即係應承做我男朋友？」

「好呀，我應承呀，我願意做你男朋友！」個四眼仔興奮不已，一口就答應。

殊不知學生妹下一句竟然話：「哈哈哈！唔係呀嘛！你真係以為我冧你？玩你渣，死傻仔！我點會鍾意你個柒頭！哈哈哈！」



個學生妹大聲恥笑，睇嚟只係一場惡作劇。

而呢個時候，有三個學生哥從球場角落頭走出嚟，一邊大笑，一邊起哄。

其中一個男仔生得好高，gel住個飛輪海頭，搭住件冷衫，懶係型咁，實際明顯係一條mk仔。

條mk仔行過去一手攬住女仔條腰，露出勝利者嘅姿態，對住個四眼仔講：「你條鹹濕四眼仔唔係以為真係溝到女神下話？我地幾個夾埋玩你渣！哈哈哈！」

「啱先我地幾個影低曬成個過程，等聖誕節完左返到學校就send曬俾全級睇，到時全世界都睇到你有幾柒！哈哈哈哈！」條mk仔發出強烈嘅恥笑聲。

另外兩個男仔都笑埋一份，兼且各自揸住舊式Sony Ericsson推機，對住個四眼仔嚟影。

「阿Ling…你…你竟然玩我？」

個學生妹用輕蔑嘅語氣話：「你個憨鳩仔咁都上當，唔玩你玩邊個呀？哈哈哈！」



俾人咁樣玩法，個四眼仔當然嬲到即刻走人，嗰四條友賤格到追住嚟笑，條女掛住笑，連張學生證跌出嚟都唔知。

我行上前想執返俾佢，驟眼睄到張證上面個名寫住「5D，陳嘉玲」。

呢個名就同Veronica個中文名一模一樣。

外貌、聲線、身材連埋個名都咁相似，莫非…