回到過去，破我未婚妻個處: （8）

「喂阿叔，你無嘢下話，隨便睇人啲嘢咁撚無禮貌嘅！」個學生妹走埋嚟，一手搶返張學生證。

近距離見到對方個樣，呢刻我可以百分之一百肯定，眼前呢個學生妹就係我識嘅Veronica。

之前都試過發夢夢見過對方，但未試過夢見佢著住校服同埋講粗口。

「阿Ling，發生咩事？」個mk仔行過嚟，搭住Veronica膊頭。

「頂，呢個阿叔偷我張學生證。」



mk仔一聽完，就好惡咁兇我：「喂！阿叔你咩料呀！我條女啲嘢你都敢掂？」

雖然只係發夢，但見到一個陌生男人咁樣對自己女人摸手摸腳，條氣點都有啲唔順。

再加上係喺自己個夢入面，我就更唔可以失威。

「死mk，邊個係你條女？Veronica係我條女！我鄭重警告你，快啲縮開你隻臭手，如果唔係就咪怪我唔客氣！」我大聲兇返佢轉頭。

「仆你個臭街！阿叔你邊度架？好撚串喎！」



個mk仔瞪大眼怒睥住我，又撥一撥前面執飛輪海陰，懶係型咁問：「阿Ling，你識呢條友架？」

Veronica挨埋去個mk仔度，餵曬波餅：「咪玩啦，我點會識呢啲咁嘅騎呢怪。」

話就話係發夢，但聽到Veronica話自己係騎呢怪，仍覺得有啲hurt。

「喂！死mk，你聽唔到我講嘢咩？我叫你放開手！」我嘗試出手上前分開二人，點知被條mk仔一手捉住左。

「你條木嘴想郁手？就睇下你有咩料到！」條友單手捉住我左手手腕，出盡力向後拗。



痛到我差啲嗌左出聲。

暫時處於下風嘅我梗係唔忿氣，想揮拳反擊，但未出手就俾條友一腳踢落地。

兩個膝頭哥落地，撞到瘀曬，痛到仆街。

好奇怪！真係好奇怪！明明就發緊夢，點解痛楚會咁真實？

我feel到膝頭哥痛到真係好似撞瘀左咁。

「挑！原來無料到！」條mk仔作勢想踢多腳，我立即做出擋隔動作。

一秒之後，feel唔到被人打，只聽到恥笑聲

「哈哈哈！啱先串串貢，點知係條廢柴，早啲返屋企捽藥油啦阿叔！」條mk仔原來只係靠嚇，根本無諗住踢落嚟。



俾條咁嘅mk仔羞辱完，兼且拖走埋自己條女，呢個絕對係一個噩夢。

我唔可以再俾呢個噩夢繼續落去！

好彩由細到大，我都有一個方法幫自己脫離噩夢。

只要喺夢入面掹鼻毛，咁就會即刻醒，次次發噩夢我都用呢招，基本上係萬試萬靈。

我瞇埋眼，伸手指入鼻哥窿，大力扯一條鼻毛出嚟。

「哇頂！」

我痛到大嗌出聲，眼水幾乎都標埋，然後打開眼一睇，發現自己仍然身處喺籃球場。



無理由，點解仲未醒？

我再試一次，掹多一條鼻毛，結果再打開眼，仍然見到個籃球場。

「呼~」

忽然之間，一陣風吹埋嚟，我打左個冷震。

再掹多幾條毛，用埋其他招數整醒自己，結果都係唔成功。

至於膝頭哥嘅瘀傷亦無消失，仲係隱隱作痛。

我開始懷疑自己並唔係發夢，呢一切好有可能都係真實。
 
太陽已經無啱先咁掁眼，我行出球場，喺附近打個轉睇下咩環境。



條街啲人打扮老老土土咁，有人竟然仲著埋啲過氣潮牌，而且絕大部份人手上揸住舊式Nokia或者Sony Ericsson㩒掣電話，掛住條手機繩fing fing下咁。

行左一陣，途徑一間七仔，睇到外面啲報紙，新聞標題寫住「五區公投」。

家下咩年代，仲講五區公投？仔細一睇，報紙日期寫住2009年12月22日。

我當堂打左個突，心諗點解舊報紙都拎出嚟賣，行入去捉個七仔職員問：「唔該，我想要一份今日嘅報紙。」

「先生，鋪頭出面擺左今日嘅報紙，你想要邊份？」

「唔係喎，出面啲報紙份份都寫住09年，全部舊報紙嚟，我想要份新嘅。」

「出面啲報紙全部都係今日最新架。」



「2009年過左好耐啦喎，今日嘅報紙日期點會係呢個？」

「係今日嘅報紙無錯呀，仲有個幾禮拜先過年，所以今日都仲係2009年。」職員回答我。

「下？2009年…?」

「唔好意思，先生如果你唔買嘢，唔該讓俾下一位。」

「你肯定今年係2009年？」我追問。

職員點一點頭回覆：「係呀，先生。」

排喺我後面等俾錢嘅人開始「接接」聲表示不滿，我都唔好意思阻住咁耐，讓返開個位出嚟，離開七仔。