回到過去，破我未婚妻個處: （6）

返到屋企，我唔敢將Veronica求婚嘅事同老豆老母講，因為我驚講出會激死佢地，暫時唯有瞞得就瞞。

至於喺中學同學嘅Whatsapp group度，有人收到風知道左我被求婚嘅事，亦有人話本來都收到邀請到場祝賀，只係唔得閒最後無去到。

個group加埋我總共有六個人，全部都係我從中學玩到嘅好朋友，出到嚟做嘢之後大家少見左，不過間唔中都會約下食飯，而佢地每個都知我身上有詛咒嘅事，所以佢地有幾個半開玩笑半認真咁喺個group度講：

「輝哥話過唔娶處女做老婆就會死，咁你個未婚妻係咪處女先？哈哈！」

「肯定係先會結啦，阿輝不如分享下俾女女求婚係咩滋味？」



「輝哥就happy啦，你家下條女又大波又係處，執到啦你……」

班友左一言右一句，想覆都覆唔切，加上自己家下無乜心情，乾脆將電話較做靜音，丟埋一二邊唔理算。

坦白講，Veronica準備咁多嘢同我求婚，我其實心入面係開心嘅，證明佢真係好中意我，但開心得嚟我又感到好擔心。

我唔想重演我阿叔嘅悲劇。

婚禮上吐血身亡，啲血噴到一地都係…



啋！大吉利是！唔好諗埋啲衰嘢，我對流星許過願，上天有好生之德，一定會實現我嘅願望，哪怕係一個都好。

Veronica求完婚，就開始著手揀日子註冊，隔無幾日就彈啲日子俾我揀，我就詐假意扮忙，扮到唔得閒理呢啲住。

因為揀完日子，下一步就係見家長，我就仲未諗到點同老豆老母講呢件事，所以都係拖住一排先比較好。

呢日，我約小曼到常去嘅冰室，一齊食個lunch，順便同佢呻下。

我未同佢講Veronica求婚單嘢，不過佢都喺個六人中學group度，我諗佢應該都知咩事。



「…嗰陣Veronica話有個驚喜俾我，我以為係送禮物嗰啲，點知佢竟然係求婚，仲搵埋我啲大學舊同學，同埋佢自己啲朋友一齊見證，你知唔知我嗰下真係打左個突，諗都無諗過佢會咁主動求婚，又大電視示愛又搵埋band唱歌，好大陣仗……」

我憶述返嗰陣時嘅情景，小曼係隔籬聽，無出聲。

「做咩靜左唔出聲，比啲反應嚟啦。」講左咁耐講到口乾，我飲一啖可樂止渴。

小曼望我一眼，督一督面前杯凍檸茶入面塊檸檬：「見你一輪嘴咁講，咪等你講完先，咁你地諗住幾時註冊，同埋你阿爸阿媽同意左啦？」
 
「未，我仲未同佢地講，我都唔知點開口好，最煩係Veronica催我揀日子註冊，我決定拖得就拖，等到我諗好點開口同老豆老母講先再算。」

「呢啲嘢有得拖架咩，瞞唔到幾耐渣喎。」

「呢個我都知，不過講真嗰句，嗰日如果唔係咁多人睇住，我可能都唔會應承，你知我咩身世架啦。」

「唓~咁驚死咪唔好結。」小曼話。



「唔應承都應承左，咁仲可以點？慶幸嗰日禮拜日，真係有流星雨出現，我對住嚟許左三個願望，假設是但一個應驗嘅話，咁我就有救啦。」

我同小曼講自己許左嘅嗰三個願望。

對方聽完，「哦」左一聲，然後話：「如果唔靈驗，咁你咪會死？唔係啦，你爭落餐飯今日好請，我驚以後無機會…」

「閘住！真係啋過你把口，呢兩日我上網做過research，外國有人對流星許完願，之後第二日就中左頭獎，我信我嘅三個願望至少有一個會成真，仲有我根本無爭你餐飯，唔好再屈我啦下。」

「食屎啦，咁都唔認數。」

小曼lur住話我爭佢餐飯，我真係頂佢唔順：「算啦算啦，餐飯等我結完婚又死唔去先還啦，今餐就各自各俾。」

「你係先好講。」小曼拎錢俾自己嗰份，順手喺銀包拎左一道符出嚟。



「琴日我day off，去左大嶼山行山，沿途經過一間道觀，入去參觀一下，順便求左道護身符，我見唔洗錢我幫你求多左個。」

「咩護身符？」我拎上手睇一睇。

「個道士話呢道護身符俾大師施過法，據說只要將佢放喺枕頭底，咁就能夠解除厄運同惡咒。」

「齋睇個樣，道符好普通渣喎。」

道符同一般嘅平安符無咩分別，手指公咁大嘅size，上面用黃底紅字寫住一啲平常人睇唔明嘅符文。

唯一特別嘅係，中間位有一個七角星嘅圖案。

「睇樣睇唔出架，總之有大師施過法，你今晚返到屋企，將個符擺喺枕頭底就得架啦。」

我本身就唔多信呢啲符令嘅嘢，不過見唔洗錢有嘢袋，照收都無壞。