回到過去，破我未婚妻個處: （5）

「邊個搵你呀，唔覆機嘅？」我好奇一問。

「無乜嘢，唔洗理。」

我一時八卦，拎起佢部電話望下:「咦，Eric佢約你禮拜日去睇流星雨喎…」

「頂你個肺！無問過人就睇人電話，你有無禮貌架？」小曼一手搶返部電話。

「乜你個舊同事Eric又約你去街，但你做咩唔理人？嫌人唔夠靚仔呀？」



「關你叉事咩，死八公，你再敢睇我電話，我就一下筷子插爆你隻眼！」小曼舉起筷子作勢想隊埋嚟。

「唓~睇下啫，洗唔洗咁惡，不過話時話，呢個禮拜日有流星雨睇咩？」

「你想知咪自己查囉。」

「自己查咪自己查。」我打開電話，上google check下。

原來禮拜日仙女座流星雨會掠過香港。



「喂，你睇下，真係有流星雨睇喎，啲人唔係話對住流星雨許願好靈嘅，假如我對住嚟許願，祈求身上嘅詛咒消失，你話work唔work呀拿？」

「唔知喎，你問我我問邊個。」

我碌左一陣電話，睇下天文台預計流星雨經過嘅時間，睇到咁上下就話：「差唔多夠鐘返office，埋單走人囉，今餐你請。」

「乜唔係你爭我一餐飯咩，點解依家變左我請你？」

「大佬呀，你搞到我住左兩日院，呢餐就當係賠償啦，唔講住啦，啱啱食飽就急屎，我趕住返公司屙，張單就你埋啦，byebye。」



「喂鐘耀輝，你唔好走呀喂，今餐係你……」

我扮聽唔到，急急腳鬆人，呢個小曼成日借啲意屈我請食飯，今次終於俾我揾到機會「鑿」返佢一餐，哈哈！
 
返到公司，我趁上司未返，上網再查下關於星期日落流星雨嘅資料。

先唔理向流星許願，係咪可以消除身上嘅毒咒，我咁大個仔都未親眼見過流星雨，假如可以同女朋友一齊睇，應該會幾浪漫。

正當我想WhatsApp約Veronica去睇，咁啱對方呢個時候text我。

佢約我呢個禮拜日出銅鑼灣，仲話準備左個驚喜俾我。

我本來以為係啲情侶間嘅小驚喜，殊不知竟然係一個好大嘅驚喜，直程去到驚嚇嘅程度。

星期日，我應約嚟到Time Square。



我企喺廣場對出空地度等，等左兩個字都未見人。

離我五十米遠處有一隊樂隊喺度busking，吸引左唔少人圍觀。

我等到無嘢做，開始碌電話，忽然間有個細路仔走過嚟，叫我望一望身後嘅大電視。

我擰轉面，抬高頭，見到電視熒幕顯示一個由好多個紅色心心圍成嘅一個大心形圖案。

大心形中間有一行粉紅色字體，上面寫住「Veronica LOVES Fai Fai」（Veronica愛輝輝）。

同一時間，喺隔籬busking嘅樂隊忽然轉左音樂，唱唱下張學友《吻別》轉成Bruno Mars嘅《Marry you》。

剛才圍觀聽歌嘅觀眾擰轉身，當中我見到有自己嘅大學同學，仲有Veronica啲姊妹朋友。



當佢地慢慢圍埋嚟，呢下我大概知發生咩事。

伴著音樂，Veronica從人群中出現，佢手上拎住一束紅色玫瑰，行到我面前。

我額頭開始冒冷汗，心諗唔係玩到咁大下話？

Veronica遞出手上嘅鮮花：「輝輝，我想嫁俾你，你願唔願意同我結婚？」

音樂停左落嚟，隨即圍觀嘅朋友大聲起哄：「娶佢！娶佢！娶佢！」

真係點諗都諗唔到，Veronica居然當眾下向我求婚，而此時此刻嘅我卻唔識反應，內心天人交戰。

應承佢嘅話，我驚自己會好似我阿叔咁噴血而死。

拒絕佢嘅話，眾目睽睽下求婚失敗，對方實會好hurt同埋好瘀，以後怕會成為人地嘅笑柄。



「娶佢！娶佢！娶佢！」旁邊嘅人繼續起哄。

Veronica眼甘甘望住我，瞳孔透露著期待與渴望，等緊我開口say yes。

呢種情況下，我似乎好難拒絕，唯有試下拖延：「Veronica，我係想同你結婚……」

「輝輝你肯應承！？太好啦！我愛你！」

本來接住我係講「但係我可能未完全ready」，可惜個「但」字都未講到出口，Veronica就好興奮咁攬埋嚟。

音樂再次奏起，周圍一片歡呼，圍觀見證嘅朋友同舊同學熱烈祝賀。

我就呆左笑唔出，心諗今次弊傢伙…



過左一陣，突然間有人大嗌：「大家快睇下，係流星雨！」

我抬頭望上天，看見清澈嘅夜空中劃過璀璨嘅流星雨。

人地話對住流星許願會願望成真，於是我瞇埋眼，對住漫天流星，一連許左三個願望。

第一個願望祈求身上嘅毒咒會消失，第二祈求自己長命百歲唔好咁早死，第三係想得到穿越能力，等我回到過去奪取女朋友嘅第一次。

我並奢望所有願望都成真，只求是但一個願望實現，我就已經好滿足。

呢一刻嘅我真心希望流星雨顯靈，能夠實現我嘅願望。
 
接受完一個咁大嘅驚喜，我心情仍未平復。