《平行軌跡》: Episode 6 - 遊樂場

「馬建鋒，你兩個喺邊呀？我企咗喺飛越太空山好耐喇！」阿杰很不耐煩，一邊左踱步右踱步，一邊向電話另一邊的Vincent怒吼。
 
「咩話？我哋喺越礦飛車喎，你有無搞錯咗啲嘢呀？」Vincent明顯身處在遠方。
 
「痴線架？最能夠代表我哋嘅主題公園嘅過山車喎，唔係呢度真係有鬼喇。」
 
「呢位哥仔你邊度鄉下呀？最能夠代表我哋喎，我哋呢個城市喎。」
 
「OK OK…咁而家點呢？話陪我散心但你兩條友又唔喺度，我散步就有份。」
 




「咁樣啦，我哋今晚喺老地方劈鋪勁嘅，不醉無歸喇好無？」也不知Vincent是不是認真的。
 
「仲可以點？你再老點我睇吓我反唔反你枱…」阿杰對此也沒什期望。
 
「得啦得啦，今晚見！」又是一記無情的終止對話。
 
「唉…條友仔，不過有乜計？有佢做兄弟已經算係咁…」阿杰落寞地自言自語。
 
突然變成一個人，阿杰突然變得漫無目的，呆望手上的白金卡，又抬起頭來，凝視飛越太空山。
 




「呢張就你嘅…呢張就我嘅…咁嚟緊一年我幾時想嚟你就要陪我嚟…無得抵賴架。」
 
「嚟咪嚟，我睇妳一年嚟得幾多次。」
 
阿杰突然笑了一聲，是苦笑？是冷笑？是傻笑？可能連他自己都不知道。
 
「行快啲啦，玩多次玩多次！」
 
「又玩？！玩咗五次喇喎，玩過山車但係又黑媽媽乜都睇唔到，隨時一嘢批咗我個頭落嚟都唔知，都唔知有乜好玩。」
 




「你係唔玩啦嘛？你唔玩我自己玩。」
 
「得得得…玩玩玩…」
 
沉思良久，阿杰沒有走向飛越太空山，轉而走向巨大的巴斯光年：「等我射死晒你班契弟！當你哋係Vincent個死仔咁射！」
 
玩機動遊戲當然少不免要排隊，阿杰形單隻影，顯得人丁單薄。一名婦人拉著一名小孩沒理會排隊的人龍，逕自左穿右插向前走，她的手袋更撞到阿杰。
 
「喂，排隊啦阿嬸。」阿杰一手拉著婦人的膊頭。
 
「我細路哥玩丫嘛。」
 
「乜嘢人玩都要排隊架啦，後面啦唔該。」
 
「你報警丫，你厚多士呀你厚多士！你無丁丁！你無丁丁！你無丁丁！你厚多士你又唔係洋蔥圈又唔係差人！」婦人連珠爆發地說出一些別人難以理解的語句，漸漸惹來騷動。




 
「排隊啦八婆！」「以為自己大晒呀？」「呢度唔係俾你嚟架！」責罵聲此起彼落。
 
婦人終按捺不住，與排隊的人發生推撞，首當其衝的是阿杰，他的眼鏡被婦人弄跌在地上。最終引起工作人員的注意，婦人逃之夭夭。可憐阿杰的眼鏡就此報銷，一邊鏡片完全碎裂，另一邊也只能看到有限事物，而且其中一邊耳托飛脫，不知到哪裡了，他也再沒有興致玩巴斯光年。
 
「唉…無妄之災…」阿杰的世界變得朦朦朧朧，彷彿所有東西都只是殘影。
 
滿懷心事的阿杰在迪士尼列車上坐了一圈又一圈，各種機動遊戲，不同卡通人物出現在他眼前一次又一次，他都沒有留意。
 
「咁快就一圈，呢個迪士尼實在太細喇！我哋遲啲要去東京迪士尼玩多次！」
 
「吓…東京好喎有高達睇，嘿，之不過不如去石景山遊樂園啦，好似仲搞笑喎。」
 
「你！乜！嘢！意！思！丫！我落車唔理你啦！」
 




「喂…喂…喂！妳聽我解釋先啦…」
 
列車不知道第幾次到達幻想世界車站，阿杰終於下車了，他仍然是漫無目的地行，不自覺來到瘋帽子旋轉杯。
 
「我唔理呀，東京迪士尼我就一定要去架喇！你唔應承我就整到個咖啡杯瘋狂自轉，轉到你暈！」
 
「知喇，頭先講笑咋嘛咁鬼小器都有嘅。」
 
「點知你幾時講笑幾時認真喎…衰人。」
 
「咦，唔嬲喇喎，到我轉到妳暈喇！」
 
「邊有咁容易，睇吓邊個暈先！」
 
「好好好…停喇喂，停呀人哋停咗喇仲轉。」




 
「咩姐，唔理你呀，我哋快啲過果邊同公仔影相。」
 
阿杰走到跟卡通人物拍照的地點，隱若看到一對男女跟高飛和布魯圖在拍照。
 
「嘩…呢個男人同高飛直頭係兩兄弟。唔…又會咁大個女都同阿爸兩個人嚟迪士尼嘅。咦！個女仔由髮型到衣著都幾得咁喎，最衰副眼鏡爛咗，睇唔真個樣…一日最衰都係果個八婆…」

阿杰透過半爛的眼鏡勉強看到一點二人的樣子，加上從衣著和氣息感覺到，二人的年齡有一段距離，而且是一段甚大的距離。
 
不知不覺夜幕低垂，煙花徐徐昇起。
 
「如果我住喺度就好喇…日日都有煙花睇…」
 
「簡單啦，我第時喺外國買座城堡俾妳，日日放煙花俾妳睇。」
 




「唓，搵鬼信你丫，你顧掂自己先啦。」
 
「咩呀，我個樣好唔掂咩而家。」
 
「李櫻杰！」
 
「咩…咩事？」
 
「I love you…」
 
「傻妹…I love you too.」
 
不同時間的不同人物，看相同地點的相同煙花，阿杰百感交集，只嘆煙花易冷：「煙火…最後…也會退燒？」
 
(Next：Episode 7 - 幸福摩天輪)