《平行軌跡》: Episode 5 - 他約我去迪士尼
清晨的陽光投射到城市每個角落，一陣微風輕輕吹過把窗簾揚起，讓陽光得以從縫隙中擦過阿雪雙眼。
「唔…咦…天光喇？」阿雪拉開窗簾往外一看，映照在她眼簾的是一片萬里無雲的天空。
「太好啦！今日真係一個好日子。」阿雪懷著無比興奮的心情跳下床，口裡哼著輕快的歌曲，從衣櫥拿出一條藍色連身裙，在全身鏡中欣賞了良久。
「啊…要快啲先得，唔可以遲到。」她開始其人生的第一次打扮大業，然而卻被自己的頭髮難到。「呢邊…咁樣…再咁樣…咦…好似唔係喎…哎吔點解果日個姐姐咁輕鬆就整到嘅…」幾經辛苦，阿雪將其招牌All-back馬尾放下來，感覺有點像女神法拉。「好！行得！」
阿雪正要步出家門時，電話傳來新訊息。
「紫月，我哋喺迪士尼門口等，一陣見。」
「收到！！」
…
「歡迎…迪士尼線，我哋…帶你進入…迪士尼嘅奇妙世界。」前往迪士尼的列車內，喧鬧的人聲蓋過列車廣播，這班列車中，有臉上喜孜孜的阿雪。
「迪士尼站，祝大家有奇妙嘅一天。」
「到啦！好緊張！」心急的阿雪立即快步走向迪士尼的入口。
阿雪左顧右盼，只見一群又一群旅行團、一家大細，也有不少情侶，卻找不到她的那位。
「紫月，我喺度。」一名男子呼叫著紫月這個名字，他身穿灰色企領Polo Shirt配搭牛仔褲，神情帶有一種滄桑的感覺。傲雲哥哥，你不如都係叫我做阿雪。」阿雪對紫月這個稱呼感到尷尬。
「唔好意思，我太習慣叫妳做紫月。嚟，我哋過去買飛。」
來到售票處，發生了一件讓阿雪吃驚的事。
「白金卡？！」
「係，有呢一張會員卡，妳未來呢一年就可以想幾時嚟就幾時嚟，自己嚟又得，叫我陪妳又得，同其他朋友亦都可以，妳都唔駛俾錢就可以入場。」
「吓…點得架！我唔可以要架！」
「乖…收咗佢，妳係應該要收嘅，我…做成咗單大生意嘛。」對於何以送迪士尼白金卡給阿雪，傲雲似有難言之隱。
「咁…好啦…」對突如其來的一份「禮物」，阿雪覺得不知所措，一陣溫暖卻湧上心頭。
「你想玩咩先？」
「嗯…巴斯光年！」
「好！不如直接排隊，應該都唔會等好耐。」
「贊成！橫掂我哋有大把時間，今日玩唔晒最多咪下次再嚟過。」
排隊期間，兩人後方傳來一陣喧嘩，不知發生何事，只聽到幾位途人議論紛紛。
「嘩…有無搞錯呀又有人打尖…」「係囉…識唔識規矩架…趕佢哋走啦！」
幸好不愉快事件沒有發生在阿雪身上，轉眼間他們已經排到隊頭。
「唔知後面有無事呢？」阿雪一方面進入遊戲，另一方面擔憂地望向後方正在排隊的人群，冀能對事件略知一二。
「算啦，唔關我哋事嘅…唔好理咁多。」相對地，傲雲的反應顯得相當冷淡。
「吓…哦…」
…
「嘩…乜你咁高分嘅？！」二人分數相差非常多，阿雪對傲雲的分數感到非常驚訝。
「如果識得秘訣其實好簡單。跟住想玩咩？」傲雲只是冷靜地分析，並沒有詳細說明要訣。
「呢個啦…呢個啦…呢個啦…仲有呢個！」阿雪對於每款機動遊戲都有興趣，幾乎每個名字都說了出來。
「睇唔出妳都幾玩得。」可能傲雲並不知道迪士尼的機動遊戲賣點不在刺激。
「哈哈，因為呢度啲機動遊戲好似唔算太刺激！」
阿雪和傲雲玩了很多機動遊戲，阿雪很滿足但仍然有點意猶未盡。
「哈…好攰添！係時候玩啲輕鬆啲嘅嘢，不如去旋轉木馬丫！」
「好。」
二人慢慢走到灰姑娘旋轉木馬。
「咦？你唔玩嘅？」阿雪發現傲雲沒有走向排隊的隊伍，反而走到旁邊的坐位。
「我睇住妳玩，我想坐低休息吓。」
「哦…咁好啦，我去啦！」阿雪表現得像一個小女孩一般向旋轉木馬走去。
阿雪選了一隻灰白色毛髮的木馬，坐上去後，廣播響起：「咁多位王子同公主，灰姑娘旋轉木馬好快就會開始轉動，為咗你嘅安全著想………」
在木馬上，阿雪看著傲雲，心裡默唸：「兜過幾個圈…看木馬旋轉…美夢似是遙遠…仍埋藏著繾綣」
木馬轉動起來，傲雲從阿雪的眼睛消失，幾秒後又再出現，消失…出現，消失…
而傲雲望著灰姑娘旋轉木馬，腦中也泛起不同的影像，讓他沉思起來。
木馬停下來，位置碰巧讓阿雪直視傲雲，這次，阿雪反應得像個情竇初開的少女。
「不如我哋去搵啲卡通人物影相咯？」阿雪想起拍照是去迪士尼必定要做的事。
「好，頭先嚟呢度嘅時候我喺果邊見到布魯圖，而家都應該仲喺度，我哋過去啦。」
果然，布魯圖仍然在與遊客拍照。
「真係喺度喎，我哋快啲同佢影相！」
阿雪飛奔到布魯圖身旁時，只見傲雲站在負責拍照的位置，沒打算與阿雪合照。
「傲雲哥哥，你快啲過嚟我哋一齊影啦！」阿雪卻邀請他一起拍照。
「…好。」雖然傲雲有點不情願，他還是一償阿雪的要求。
咔嚓…咔嚓…
「哈哈…傲雲哥哥…我發現你個樣又幾似高飛架喎…哈哈哈…」除了布魯圖外，他們還與高飛合照了，其中一張是傲雲跟高飛的合照。細看其他合照，能夠發現兩人的合照有種不協調感。
然後天空慢慢由藍色，泛起紅色，再漸漸變黑。
「就嚟放煙花喇！我哋要快啲霸個靚位！」阿雪拉著傲雲到睡公主城堡前面。
煙花璀璨，阿雪沉醉在浪漫的氣氛，依偎在傲雲的膊頭。傲雲則自言自語：「如果…佢都睇到就…」
阿雪：「傲雲哥哥，你啱啱係咪講嘢啊？」
「無…無…妳聽錯喇。」
「我今日真係好開心啊！多謝你！」
曲終人散，遊客心懷滿足地離開遊樂園，阿雪和傲雲亦然。只是不知道是阿雪太高興，還是她本身很遲鈍，又或者傲雲隱藏得太好，她看不到他呆滯的神情，也感應不到傲雲壓抑著的哀傷感覺。
(Next：Episode 6 - 遊樂場)