《平行軌跡》: Episode 7 - 幸福摩天輪
「你對你兄弟又幾差架啵。」Shirley照著鏡子道。
「咁妳想我對妳好定還是對佢好呢？」
「Why not both？我似係咁專制嘅人咩？」Shirley向Vincent擺了一個鬼臉。
「咪住先，乜妳講到我專登過佢一棟。」Vincent用食指輕搔自己的臉。
「有咩？有咁嘅事？你會唔會諗多咗。」懶得理會Vincent，Shirley轉身而走。
Vincent截斷跟阿杰的對話後，跟Shirley在另一個主題公園「風流快活」。究竟阿杰是自己誤會了，還是被Vincent刻意誤導呢？答案只有Vincent自己才知道。
「海洋劇場就嚟開始喇喎，不如去睇咗先啦。」拿著節目時間表的Vincent追了上去。
「又好。」
二人找了一個前排位置，好讓自己能看得更加清楚。
「嘩，好快啊佢哋游得，好靚丫佢哋跳上水嘅時候！」看著海豚表演，Shirley不斷拍手歡呼。
「小姐，妳好似睇過好多次架喇喎，有無咁雀躍呢？」Vincent撓著手，不屑地說。
「唓，你唔抵得丫？」Shirley只斜視了Vincent一下。
此時，表演人員向觀眾表示想找兩位現場觀眾一併表演。
「究竟人類接觸海洋生物嘅時候會發生咩情況呢？我哋想邀請兩位現場觀眾嚟到呢度同我哋嘅海豚明星親身接觸一吓喎！」
「我丫！我丫！」Shirley雙手舉高而且高聲呼叫，務求吸引表演人員的注意，她成功了，她被邀請親近海豚明星。
「嗱，一陣我會先同佢握手先，咁你哋留意住我嘅動作，一陣就到你哋架喇。」表演人員伸出右作手出握手的動作，不一會兒，海豚從水中跳上來，用雙鰭跟表演人員握手。
「小姐，到妳喇，試吓，伸隻手出嚟先…」Shirley跟隨表演人員的指示伸出右手。
不料那海豚沒有像對表演人員般跟Shirley握手，更比平時跳得更高，親吻了Shirley。Shirley剎那間不懂反應，觀眾對此舉動無不高聲歡呼，表演人員則打圓場：「嘩…一定係呢位小姐太吸引喇，連海豚明星忍唔住要親近喎。各位觀眾，不如我哋俾最熱烈嘅掌聲呢位小姐同埋我哋嘅海豚明星好嘛？」
啪啪啪啪啪…在觀眾熱烈鼓掌的同一時間，工作人員安排嚇呆了的Shirley回到觀眾席。
「我嘅寶貝公主，連海豚都咁鍚妳，我真係有啲酸。」口裡取笑Shirley，Vincent的手卻在安撫Shirley，在擺弄她的頭髮。
「仲笑人喎，你試吓丫，話唔定你成個嚇到跌落水！」Shirley對剛才的一幕，顯出一絲的羞澀。
看著Shirley咬唇的動作，泛紅的臉頰，以至撥頭髮的嫵媚姿態，Vincent再沒法集中精神看餘下的表演，雙眼再沒有離開過Shirley的雙眼、口唇、上身，以至整個身體，直至…
「喂！喂！行喇！個show完咗喇！仲眼甘甘望住人。」Shirley催促Vincent，著他不要再發呆。
「無辦法，妳仲好睇過啲海豚。」Vincent的視線仍然沒有離開Shirley。
「你咁肉麻架！行啦去睇企鵝丫！」Shirley拿Vincent沒辦法，唯有強行把他拉走。
眾所周知，無論什麼月份，什麼天氣去企鵝館都是冰天雪地的，穿得單薄的遊人，就要忍受一會兒寒冷之苦了。
「嘩，好凍丫！」Shirley甫一進入企鵝館，立刻被寒氣侵襲感到寒冷。
「咦？乜女人唔係唔會怕凍嘅咩？」天氣清涼乾爽，Vincent穿了一件長袖紅黑格仔恤衫，不論在室外還是冷氣地方都很舒適，難為了背心熱褲的Shirley。
「喺呢個時候如果有人拎件外套俾我而唔係潤我就好喇。」Shirley嘟著小咀。
「外套就無喇，愛的抱抱就有一個。」Vincent從後捉住Shirley雙手，環抱著她，二人連成一體地觀看分成幾個群體的企鵝，它們彷如幾個不同的群族，有在跳水的，有在睡覺的，也有站著發呆的。
「喂，你睇吓，啲企鵝都識排隊架！」Shirley既驚又喜，指著正排隊跳水的企鵝。
「係喎，又會咁盞鬼會排住隊咁跳水嘅。」Vincent對此也感到驚奇。
「有人教架嘛，好似我咁，咪教到班鴨仔貼貼服服識乖乖地排隊。」Shirley對於自己的工作很自滿。
「係喎係喎…叻叻呀吓…」Vincent作出一個拍掌的手勢並作出數次拍手的動作，而且語氣敷衍。
「都係快啲出去喇，你個愛的抱抱都無鬼用嘅，凍死我啦。」Shirley逕自走向出口，Vincent也快步跟隨。
「不如玩吓啲機動遊戲啦，妳想玩啲咩？」一出門口便看到過山車，Vincent心裡其實想玩一些刺激的機動遊戲。
「呵，梗係天荒地老流連在……摩天輪啦！」沒有得償所願，Shirley想玩的是比較平靜的摩天輪。
「好鬼多人喎。」Vincent以排隊作藉口。
「唓，度度都多人架啦，你睇吓呢邊，睇吓呢邊，再睇吓呢邊。我哋有教養地排吓隊咪得囉，乖啦。」Shirley捉著Vincent的頭向這邊望又向那邊望，讓他留意到其實每個機動遊戲都有長長的排隊人龍。
三十分鐘後…摩天輪上
「喂，你記唔記得…我哋今個聖誕…要去邊度慶祝呢？」望著萬里晴空，Shirley問起聖誕的約定。
「梗係記得啦，去瑞士睇雪，仲要上少女峰呀嘛。」這是兩人在剛剛過去的聖誕所定下的目標。
「到時你要捉實我架，我畏高架！」Shirley用食指指著Vincent的鼻。
「咁就要睇吓到時我果條格仔頸巾究竟存唔存在喇。」Vincent隨而捉緊指著自己鼻子的手。
「Easy job啦，織條七彩格仔頸巾俾你都得！」顯然Shirley在這方面是高手。
「呀，講起上嚟，其實呢度望落去都幾高…」Vincent有意無意地提及，從摩天輪往下看也是很高的，而其實一踏上摩天輪，Shirley就已經捉緊Vincent的手臂，緊靠著他，只是他習以為常沒有發現，也沒有發覺身邊人無時無刻都需要他的安全感。
（Next：Episode 8 - 熊貓）