《平行軌跡》: Episode 4 - 港女的幸福星期日
「我叫林憶芊，朋友會叫我Shirley啦，姐妹會叫我芊芊啦，同事同班鴨仔會叫我芊芊老師喎，仲有個傻佬私底下會叫我…呵呵呵…由細到大，每個人都好鍚我，有邊個敢逆我意呢，都無好下場嘅，嘻。同個傻佬拍咗三年拖喇…一次交都無嗌過架！梗係啦！因為佢咩都會就晒我，不過唔好以為我好刻薄佢喎，只係一個願打，一個願捱，其實我哋完全係糖黐豆，打風都打唔甩！不過最近佢老死，又即係我好朋友，呀李櫻杰就唔係幾掂，話俾女飛喎，所以我哋諗住下個禮拜陪佢散吓心囉，順便去浪漫吓啦。其實呢，我都有剋星架，呢排學校班大帝都唔知咩事鬼咁唔聽話，真係搞到我皺紋都多幾條！所以今日要同好姐妹去大出血！嗯…呢件定呢件好睇啲呢？咁著好唔好啲呢，定係咁樣？」
Shirley正在家中精心挑選外出的衣著。
「得未呀大小姐，蚊都瞓喇，天都黑喇，妳去飲咩揀著咩都搞咁耐。」電話傳來的聲響傳到整間房間，是因為開啟了揚聲器，那把女性的聲音很不耐煩。
「哎呀妳自己行住先啦我到咗再join妳丫，俾多十分鐘我！」
「一於咁話啦bye bye！」
放好電話後，Shirley 繼續其襯衫大業。
「果隻Tiffany呢，出得街就唔可以求求其其架嘛，梗係要精心挑選啦，唔通好似佢咁T記牛仔褲咩，好啦！決定咗。今日就著你哋啦。出發！」身穿吊帶背心，外加中袖外衣，與及半身短裙，著上短boot的Shirley準備去找Tiffany。
三十分鐘後…
「好囉好囉…大小姐終於都到，等到我頸……都長埋呀。」Tiffany已經坐在咖啡室喝著咖啡。
「哎呀，唔好意思囉，我知妳唔會咁小器嘅～」
「唓，我今日係出嚟relax嘅，先唔會辛苦自己，去邊好呀？」
「先攻佔西武！再殺埋街舖！去皇室堡！搶減價貨！」
「聽落會幾攰啵。」
「行到攰就停低按一按摩先！」
「咁行得未呀？」
「喂，妳飲完嘢咋喎，我呢？」
兩小時後…咖啡室外，繁華街道上
「好囉好囉終於有得去Shopping囉。」
「放鬆啲啦香港人，放假就係要悠閒嘛。」
「快啲去睇衫啦，條街真係好鬼多人，隨時撞死呀。」
二人在人堆中尋找狹窄的空間，在人與人之間的小缝隙中穿梭，不敵人群的力量，也不知道是被擠進還是自己步入一間只有不足百呎的時裝店，裡面擠滿了一件又一件的衫、裙，還有leggings，店內有一名紮馬尾的女孩正在度身，加上店員和Shirley二人，店內空間已經所餘無幾。二人聽到女孩向店員表示希望試身。
「唔好意思呀小姐，我哋呢度係不設試身。」店員意外地有禮貌表示不設試身服務。
「吓…咁啊…唔緊要啦。」女孩一臉腼腆地放下屬意的長裙。
「喂，睇吓呢個細路女，妳覺唔覺得佢好有改造空間？」Tiffany雙眼彷彿發光一樣。
「咁鬼八卦嘅妳，喂，Tiffany，妳想點呀？」
「妹妹，想買衫俾邊個睇呀？」Tiffany本身從事形象設計有關的工作，而且非常多事。
「吓…嗯…係咁嘅，下個星期日佢約我去迪士尼…咁所以我想轉一轉形象啲俾個驚喜佢囉。」女孩對Tiffany沒有戒心，把自己的問題完全表露。
「哦，男朋友吓嘛，等姐姐幫吓妳手啦，首先係妳個頭…咁樣俾返少少陰…咁樣…咁樣梳…咁樣紮，妳睇？係咪成個人唔同晒？」Tiffany運用其觸覺把女孩的髮型轉化。
「嘩…係啊係啊！多謝姐姐！」女孩對著鏡子一望，對自己的新髮型顯得很雀躍。
「去迪士尼…妳打算買呢一類衫？」Shirley忍不住要加入討論。
「嗯…有咩問題啊？」
「問題就大啦，咁樣著法一啲少女味都無。」Shirley的左手托著下巴，表現得像一個評審。
「吓…咁點算啊？」女孩因聽見批評而慌張起來。
「呢件連身裙啦！長度適中得黎又可以反映到妳獨特嘅曲線，再加對過膝襪添，Tiffany妳有咩意見？」
「呢個構思都幾好…不過妳要留意吓妳對鞋，妳今日著呢對sneaker又唔似sneaker，總之都唔知似乜，要換過第二對。」
「無錯無錯…唔…咁就差唔多喇…不過好似仲差咁啲嘢…呀！仲要襯條頸鏈咁就fit晒，花紋方面簡簡單單蝴蝶或者四葉草都已經可以！」
Shirley同Tiffany妳一言我一句，當女孩不存在。
「嘩…救命啊…我俾妳哋左一句右一句搞到一頭煙喇。」對兩人的意見，女孩感到頭昏腦脹。
「咁…不如我地一齊行，咁我哋咪可以一邊行一邊幫妳執囉。」Shirley率先提議同馬尾女孩一齊shopping。
「都好啊…橫掂我都係自己一個無咩方向咁走…係喇，妳哋可以叫我阿雪。」原來這位女孩正是阿雪，為了讓傲雲驚喜，正進行準備功夫。
「妳可以叫我芊芊。」Shirley報而親切的微笑。 「Tiffany，雖然我叫Tiffany咋，唔代表我不需要Tiffany！」
「哈哈…低能婆，人哋又唔係妳男朋友，妳講俾人知做咩姐。」Shirley笑到肚攣。
「做咩姐，咁Tiffany真係我摯愛喎。」
「好啦好啦，我哋去第二度幫阿雪揀嘢啦。」
四小時後…又是那繁華擠迫的街道，三人找到一個小角落可以站著談話。
「齊晒！芊芊姐姐包妳下個禮拜日無往而不利！哈哈！」
「嗯！多謝妳哋啊！我今日真係獲益不淺！」
「祝妳好運啦！我同芊芊走先喇。再見！」Tiffany搭著芊芊膊頭跟阿雪道別，從背影看，二人卻像一對男女。
「一定！有緣再見～～」阿雪就此跟兩位女仕道別。
「哈，芊芊妳睇吓，結果今日我哋咩都無買，反而搞到個女仔大出血。」二人發現自己整天都沒有購物。
「無所謂啦，最緊要都係出嚟happy happy，妳話係咪？」只因為醉翁之意不在購物。
「妳有妳嘅道理呀。」
「哈，I love Sunday！」Shirley伸伸懶腰。
（Next：Episode 5 - 他約我去迪士尼）