「失」婚大作戰: （二十五）

前前後後穿越左五次，卻無一次成功同Wendy分到手。

除左第一次係因為自己分手分得唔夠好之外，另外四次嘅失敗，原來係因為Wendy。

原來佢同我一樣，都穿越返左過去，只係我一直無察覺。

至於呢個時候，婚禮時間其實已經到左，但我同Wendy仲未現身教堂。

我地兩個同兩隻精靈一齊喺間房裡面。





間房時間停頓，四周圍黑媽媽。

「你係我阿哥又好，唔係又好，我都唔理，總之我只想同你一齊完成呢個婚禮。」

Wendy知道我地係兄妹嘅事，而佢並唔介意：「依家本日記已經俾我毀屍滅跡，其他人唔會有機會發現我地嘅關係，所以你唔洗擔心人地嘅閒言閒語。」

「人地唔知，咁我地呢？」我問。

「都話我唔理，我淨想同你一齊、同你結婚，其他嘢我都唔會理。」Wendy態度堅決。





打從心底，其實我都唔捨得Wendy，好想同拋開世俗枷鎖，同佢一齊踏入教堂。

「阿康，我知你都唔忍心拋棄我，畢竟我地一齊左五年，大家都係真心愛彼此，咁既然係真心相愛，點解唔可以喺埋一齊？」

Wendy抓緊我雙手：「我相信真愛係唔應該有任何局限，愛就係愛，我淨係想繼續咁樣拖住你雙手，同你一起度過以後嘅歲月。」

對方嘅不顧一切打動左我。

我無諗到，佢一個女仔愛得咁義無反顧，我男人老狗反而婆婆媽媽。





佢講得無錯，相愛嘅人喺埋一齊有何不可？

假如人生只得一段真愛，而真愛就係你眼前呢個人，如果唔好好抓緊嘅話，錯過左就唔會有二個，到時豈不是會悔恨一生？

童話故事都話俾我地聽，真心鐘意一個人，就算對方係隻野獸都唔緊要，甚至喺希臘神話中，有好多亂倫相戀嘅故事。

既然係咁，咁咪當自己係童話故事或者神話故事中嘅主角，勇敢咁衝破一切有形或無形嘅枷鎖，成就眼前一段真愛。

何苦折磨自己，逼自己離開最愛嘅人？

愛就係愛，愛就係大於一切，包括身份嘅局限。

頓時間，我整個人豁然開朗。

「Wendy，你講得啱，既然真心相愛，相戀結婚有咩問題？係咪兄妹都好，呢啲根本唔重要，重要嘅係我地喺埋一齊。」





講完呢句，我忍唔住錫左Wendy一啖，然後緊緊咁攬住佢。

佢亦緊緊咁擁抱我。

本應呢個係一個動人嘅時刻，可惜身邊兩隻精靈卻喺呢個時候嘈交，破壞曬氣氛。

「點解我少左兩杯雪糕嘅？係咪你偷左？」Mary指控Jacob。

「你都傻嘅，我幾時偷過你嘢？」Jacob否認。

「明明我有三十杯，食左七杯，點解會得返二十一杯？肯定有兩杯俾你偷左？」

「你有證據就攞出嚟，唔好亂咁屈，啱先我一直都喺呢間房，幾時得閒偷你啲雪糕！」





見兩個友成個細路咁喺度嘈交（雖然佢地真係細路），我要行過去調停：「你兩條友無端端又嘈咩？」

「你嚟評下理，Jacob明明偷左我啲雪糕，但就死口唔認扮無做過。」

「我都話左啱先一直喺呢間房，邊得閒偷你雪糕，你唔好一味靠屈，俾啲證據嚟睇下？」

「好呀，你要證據，我即刻揾俾你睇！」Mary「噔」一聲憑空消失

一分鐘之後，Mary又憑空出現返喺間房。

「拿，你要嘅證據！」Wendy拎住一沓相。

上面影左Jacob偷偷地打開雪櫃偷雪糕嘅舉動。

「呢啲相你…你帶你影架？」Jacob俾人斷正。





「你係無呃我，啱先你係無偷到雪糕，而係喺三日前偷左呀嘛，頭先我穿越返去前幾日，逐日去摷證據，果然就俾我喺三日前，捉到你做嘅『好事』。」

「唓，一時攞錯左啫，最多咪還返俾你囉。」Jacob摷個衫袋，「咦？點解揾唔到嘅？」

「唔洗揾啦，啲雪糕喺我度。」Mary隨手拎出兩杯雪糕，「我穿越嗰陣，順手將兩杯雪糕偷返翻嚟。」

「咁...咁其他我啲雪糕呢？」

「我偷偷地喺三日前食曬你剩低嗰啲，呢個就當係俾你嘅懲罰，哈哈！」

「有無搞錯！你快賠返啲雪糕嚟！」

佢兩條友喺度爭嚟爭去，爭兩杯雪糕，但Mary穿越過去，偷食Jacob雪糕嘅事，卻啟發左我一樣嘢。





Mary回到三日前，食左Jacob啲雪糕，導致今日Jacob本來仲剩低嘅雪糕消失曬。

咁如果我返到過去，燒左本日記，咁本日記咪都直接消失？

咁之後慧姨就唔會睇到本嘢，唔會拎本日記揾我，揭發Wendy嘅身世，繼而我同Wendy都唔會知道呢件事，無需再顧慮咁多，咁就可以開開心心結婚。

只要無左本日記，咁嗰啲咩阿哥唔可以同阿妹結婚嘅煩惱，就會隨之而消失。

我將呢個諗法講俾Wendy聽。

對方聽完都十分認同：「只要本日記由一開始無出現過，咁慧姨、我同你就唔會知入面嘅內容，咪我地唔洗煩係咪哥哥妹妹嘅問題。」